Kodi yakudzera, (iwe Mtumiki) (s.a.w) nkhani ya Qiyâma (imene idzaphimba anthu ndi zoopsa zake)?
Nkhope zina tsiku limenelo, zidzakhala zonyozeka,[425]
Zogwira ntchito yotopetsa kwambiri.
Zikalowa ku Moto wotentha kwambiri.
Zikamwetsedwa mu kasupe wotentha kwabasi.
Sadzakhala ndichakudya koma minga.
Yosanenepetsa (thupi) ndiponso yosathetsa njala.
Nkhope zina tsiku limenelo zidzakhala zosangalala.
Zidzakondwera ndi malipiro a zochita zake (za pa dziko lapansi).[426]
M’minda ya pamwamba (Jannah).
Sizikamva m’menemo mawu oipa, (otukwana ndi kulaula).
Mmenemo muli kasupe woyenda (mokongola).[427]
Mmenemo muli makama a pamwamba,
Ndi zikho zoikidwa bwino (pamaso pawo),
Ndi misamiro yoikidwa bwino m’mizeremizere
Ndi mphasa (zamtengo wapatali, carpet) zoyalidwa ponseponse.
Kodi (akunyozera kulingalira zisonyezo za Allah), sakulingalira kungamira idalengedwa motani?[428]
Ndi thambo (limene akuliona nthawi zonse) m’mene lidatukulidwira (kutali popanda mzati)?
Ndi mapiri momwe adakhazikitsidwira (molimba)?
Ndi nthaka momwe idayalidwira.
Basi, kumbutsa (anthu) ndithu iwe, ndiwe mkumbutsi.
Sindiwe wokakamiza anthu (kuti akhulupirire).[429]
Koma amene anyoza ndi kukanira (ulaliki wako),
Allah amulanga chilango chachikulu zedi.
Ndithu kobwerera kwawo ndi kwa Ife basi.
Ndipo ndithu kuwerengedwa kwawo kuli kwa Ife.
