Yaa bõe yell la b sogsd taaba?
Kɩbar ning bãmb sẽn yõsd taab a pʋgẽ wã.
Tek woto! B na wa n bãnge.
Rẽ poorẽ tek woto! B na wa n bãnge.
Tõnd pa maan Tengã t'a yaa sẽn yεdge?
La tãensã tɩ b yaa sẽn kɩ?
La D naan yãmb buk a yiibu (pag la raoa).
La D maan yãmb gõeemã tɩ yaa sẽn yõgne.
La D maan yʋngã tɩ yaa lidbu.
La D maan wĩndgã tɩ yaa vɩɩm baoobo?
La D me yãmb yĩngrã (sa-gãnd) kegems a yopoe.
La D sik n yiis sawat-yũnugdsẽ wã koom sẽn kiigdi.
Tɩ d na yiis ne-a bõn-bεεla, la bõn-tobdɩ.
La pʋt sẽn tob n bidimsi.
Ad welgrã raar yãka raare.
Raar ning b sẽn na n fʋʋs Baorgã tɩ yãmb wat sull-sulli.
Tɩ b pak saagã t'a legb ragnoya.
La b sãeeg tãmsã tɩ b legb wala ko-sɩɩga.
Ad Gεhannem ra kor n gũudame.
N yaa lεbeng zĩig ne kedgdbã.
B yaa zĩidb a pʋgẽ zamaan-woko.
B pa lembda pʋgẽ maasem, pa bõn-yũudi me ye.
Sã n pa ko-kaeedem la nod-meto.
Ad b ra yɩɩme n pa tẽed geelg ye.
La b yags Tõnd tagmas-rãmbã (aayae rãmbã) yagsg tεkẽ.
La bũmb fãa Tõnd tigim-a lame ne gʋlsgo.
Bɩ y lembe! Tɩ D pa na n tol n paas yãmba, sã n pa naongo.
Ad wẽn-zoεtbã tara paoongo.
La pʋg-sãdb sẽn yaɑ reem-n-tɑɑse.
La ko-tees sẽn pid n demse.
B pa wʋmd a pʋgẽ gom-zaala, pa zĩrimbeed me.
Yaa rolb sẽn yi fo Soabã nengẽ, lɑ kũun sẽn seke.
Saag la Tẽng Naaba, la bũmb ning sẽn be b yiibã sʋk Naaba, sẽn yaa yolsg Naabã, bũmb bɑ ɑ ye pa so gomd a nengẽ ye.
Raar nĩng ɑ Gibriil la malεgsã sẽn nɑ n wa n yãnes n tedg taaba, b pa gomde, sã n pa ned ning Yolsg Naab sẽn kõ-a soab sore, t'a yeel sẽn zemsde.
Rẽ la sɩdã raare, bɩ ned ning sẽn rat-a, bɩ a bao lεbeng zĩig n tʋg a Soabã nengẽ.
Ad Tõnd bugsa yãmb ne naong sẽn pẽnege, raar ning ninsaal sẽn na n wa get a nus a yiibã sẽn tʋme, tɩ kɩfr yetẽ \"M sã n da paam n yɩẽ tom, (pɑ são)\".
