Yɩɩbã sã n wa yɩ (Dũni wã yikri).
Yɑgsd pa nɑ n zĩnd a wakatã n kɩɩsd ɑ yɩɩbã ye.
N sikdẽ (neb kẽera) la a zẽkdẽ (neb kẽere).
B sã n wa rigims Tẽngã rigimsg tεkẽ.
Tɩ tãensã sãeeg sãeegr tεkẽ.
N lebg wala tom sẽn sẽege.
La rɩtg zãma wã, bõe la rɩtg zãma?
La goabg zãma wã, bõe la goabg zãma?
La põsdbã sẽn yaa põsdbã.
Bãmb la b sẽn pẽneg-b rãmb ne Wẽndã.
B bee neema arzãn-rãmbã pʋsẽ.
B yɑɑ sul wʋsg sẽn yi rãeenem rãmbẽ wã.
La bilf sẽn yi yaoolem rãmbẽ.
N be gãas zut sẽn nags ne sãnem.
B yaa sẽn kɩl a zug n togl taaba.
Kom-bãaneg n gilimd b zutu sẽn yaa duumdba.
Ne ko-teese sẽn tɑr yʋʋse, la ko-tees sẽn pɑ tar yʋʋse la rãɑm sẽn zoet ɑrzẽnɑ pʋgẽ.
B zut pa zabd a pʋgẽ, b yam pa yikd me.
La tɩ-biis sẽn yaa bãmb sẽn tũusdi, b sẽn rate.
La Liuuli nemd sẽn yaa bũmb ning bãmb sẽn nonge.
La Huurun ʿAyn (pʋg-nin-yalems sẽn yaa neere).
Sẽn yaa wala lʋ'ʋlʋ'ʋ (kĩndi) sẽn be zẽeng mumd pʋgẽ.
Tɩ yaa rolb ne bũmb ning bãmb sẽn da yɩ n tʋmdẽ wã.
B pa wʋmd gom-zaal a pʋgẽ, b pa wʋmd gom-beed me.
Sã n pa sẽn yete :\"tɩlgre! Tɩlgre\".
La rɩtg zãma wã, bõe la rɩtg zãma?
Bãmb bee mugnug tɩɩs tẽngr sẽn bale (pa tar gõose).
Pa tar wãagre, pa mongr me.
Tõnd yẽbga bãmb yẽbgr tεkẽ.
N maan-b tɩ b yaa pʋg-sɑdba.
N yaa rʋla n yaa reem-n-taase.
Tɩ yɑɑ sẽn nɑ n kõ rɩtg zãma wã.
B sul wʋsg sẽn yi rãeenem rãmbẽ wã.
La sul wʋsg sẽn yi yaoolem rãmbẽ wã.
La goabg zãma wã, bõe la goabg zãma?
Bãmb bee seb-tʋʋlg pʋgẽ la ko-kaeedga.
La maasem sẽn sobg ne bug zõose.
Bãmb ra yɩɩme, wãnda taoore, n yaa wʋm-noog rãmba.
B na n tigim-b lame n tʋg wakat ning b sẽn mi wã.
B ra yɩɩme n yetẽ: \"rẽ yĩnga tõnd sã n ki n lebg tom la kõba, rẽ yĩng tõnd yaa b sẽn na n yik-b rãmba?
Yeele: \"ad rẽenem rãmbã la yaoolem rãmba.
B na n tigim-b lame n tʋg wakat ning b sẽn mi wã.
Rẽ poorẽ, ad yãmba, yãmb a mẽnemdba n yaa yagsdba!
La tɩ yãmb na rɩ Zakʋʋm tɩɩgã (Tok sẽneg tɩɩga).
N yũud-a, yʋgemd sẽn tar koyũud n pa tɩgd bãag yũubu\".
Wãnde la bãmb sigb zĩig Rolbã raare.
Tõnd n naan yãmba, y pa na n kõ sɩda?
Yãmb pa yã bũmb ning y sẽn kiigd sẽn yaa mani wã?.
Yaa yãmb n naand-a bɩ yaa Tõnd la Naand-a?
Tõnd korda kũumã yãmb pʋgẽ, la bũmb ka tõe n gɩdg Tõndo.
Tɩ D tedg yãmb bilgri, la D yẽbg yãmb y sẽn pa mi pʋgẽ.
La sɩd la hakɩɩka yãmb bãnga yẽbg rãeengã, yãmb pa na n tẽege?
Yãmb pa yã bũmb ning yãmb sẽn koodã,
Yaa yãmb n kood-a bɩ, bɩ yaa Tõnd la Koaadba?
La tɩ Tõnd sã n da tʋlla, D na maan-a t'a yaa sẽn zendge, tɩ yãmb kell n maan yel-soalma.
Pa woto ye! Tõnd yaa b sẽn mong-b rãmba.
Yãmb pa yã koom ning y sẽn yũudã.
Rẽ yĩnga yãmb n sik-a sawatẽ bɩ, bɩ yaa Tõnd la Sikdba?
La tɩ d sã n tʋlla, D na maan-a t'a yaa miisinga, yãmb pa na n pʋʋs barka?
Yãmb pa yã bugum ning yãmb sẽn widgdã,
Yãmb n yẽbg a tɩɩgã bɩ, bɩ yaa Tõnd la a Yẽbgdba?
Tõnd maan-a lame t'a yaa (Laahr Bugmã) tẽegre, n leb n yɑɑ wʋm-noogo la nɑfɑ ne kẽn-kẽndbɑ.
Bɩ f yɩlg f Soab-zɩsgã yʋʋre.
M na wẽen ne ãdsã lʋɩɩs zĩisi.
La ad a yaa wẽeneg sẽn bedem tɩ yãmb sã n da miime.
Ad a yaa Alkʋrãan Wagelle.
N be gaf sẽn tar gũub pʋgẽ.
Pa sɩɩsd-a, rẽnd b sẽn yɩlg-b rãmba.
Yaa sẽn sig n yi bõn-naandsã Soab nengẽ.
Pɑ Gom kãeesã la yãmb yagsda?
La y rɩk y sẽn dɑ sõmb pʋʋs bɑrkã, n maand lagem-n-taare, ne y sẽn dik yãmb rɩtlã n teesd ne bõn-nɑɑnse lɑ y yagsd Wẽnd neemã wã?.
La yõor sã n wa ta koekoay-londẽ.
La Tõnd n pẽ-a n yɩɩd yãmb la yãmb pa ne ye.
La yãmb sã n da yɩɩme n yaa b sẽn pa tõe n yik-b rãmba(kũumɑ poorẽ).
Y lebsd-y-yã-a lame, tɩ y sã n yaa sɩd rãmba.
La sã n yaa b sẽn pẽneg-b rãmba.
Yaa vʋʋsem la Raeehaan tɩɩse (yũ-noodo) la Arzãn bʋgsgo.
La sã n yaa rɩtg zãma wã.
Rẽnd \"tɩlgr be ne-fo\" tɩ sã n yɑɑ rɩtɩg zãmã.
La sã n yɩɩme n yaa yagsdb n yaa menemdbã.
Yaa sigbu, ko-tʋʋlg pʋga.
Bɩ f yɩlg f Soab-zɩsgã yʋʋre.
