Niya ba i kinab-pukas nu Allah andu su sinugu nin, sa paped-sabutan kanu inib-pasaday nu a mga mushrik.
Na lalakaw kanu sya sa lupa sa pat-ulan andu tuntayi nu i sekanu a mga Mushrik na di kanu makalipus sa Allah andu su Allah i mapalusak kanu mga kafeer.
Andu pasabut abpun sa Allah andu su sinugu nin kanu mga taw a iganat kanu gay a masla (ika-sapulu kanu Jul-hajj) su Allah andu su sinugu nin na di kuyug kanu pasad nu mga mushrik andu su Rasul, na amayka ad-tawbat na makag-kapya salkanu, amayka manda kanu, na tuntay nu i di kanu maka-lipus sa Allah (sa siksa), andu panudtul ka sakanilan a mga kafeer i siksa a masakit.
Ya tabya na su nakab-pasaday nu a mga mushrik a dala nilan gubala su pasad andu dala silan pangenggat sa apya isa kataw a makad-tabangay nilan, ka ipa-sampay sakanilan su pasad nilan kanu tadtab nin, su Allah na kalilinyan nin su magilek.
Amayka nalepas su mga ulan-ulan a haram i kambunwa, na bunu nu i mga mushrik sa apya andaw nu mabaratamu andu kwan nu silan andu kipegi nu (sikani nu)silan andu pagayani nu silan kanu langun a bagayanan, na amayka mid-tawbat silan andu mid-sambayang silan andu minenggay sa Zakat, na pandaya nu silan, su Allah na bangampun a malimu.
Sa kanu mga mushrik a bagubay salka-na pa- ubay ka, ka andu nin makineg su kadtalu nu Allah (Qur-an) mawli na ipa-sampay nengka i kahanda nin (isigkil sa lugal a maka- lilintad i ginawa nin) ka silan a mga taw na dili mga mataw.
Panon i ka-aden na pasad kanu mga mushrik sa Allah, andu su sinugu nin-ya tabya na su pib-pasadan nu lu sa Masjidil Haram, na taman adtidtu silan salkanu na tidtwani nu silan, su Allah na kalilinyan nin su mga magilek.
Panun ka o namamesan (gakames) kanu nilan, na dala pangabungan nilan salkanu a kad-suled andu pasad, pad-suwaten kano nilan sa ngali nilan (banunuwaten kanu) na gabensi su mga atay nilan andu ya madakel sakanilan i nakalyu sa inugut sa Allah.
Inid-sambi nilan su mga ayatan nu Allah sa paydu a alaga, na ini-sapal nilan (kanu mga taw) su Agama nu Allah, silan a mga taw i mawag a benal i kanilan a pang-galbeken.
Di nilan tuganulen sya kanu mga bamamaginugut i kad- suled, andu pasad andu silan i mga taw a mga tibaba.
Amayka mid-tawbat silan andu mid-sambayang silan andu minenggay sa Zakat- na suled nu bun silan sa Agama andu pidtinatad nami su mga tanda kanu mga taw, ka ando nilan katawan.
Amayka binengkas nilan (bininasa) su pasad nilan sa ulyan a kinab-pasad nilan andu pid- talwan nilan sa mawag su Agama, na im- bunwa nu su kanga-unutan nu kafeer, ka silan na dala sapa nilan, ka basi tumlen silan.
Di nu pamun silan bunun su mga taw a binengkas nilan su pasad andu nag-kahanda nilan i kapa-mugaw kanu Rasul andu silan i minabpun (mid-tibaba) muna salkanu paganay, na ngentu ika-gilek nu silan? su Allah i wagib a ika-gilek nu, amayka benal a bamaginugut kanu.
Imbunwa nu silan, ka siksan nu Allah silan kanu mga lima nu, andu palusaken nin silan andu tabangan kanu nu Allah sakanilan, andu paka-ulyan su mga laleb nu mgabamaginugut. (gamutan sa makapya sa ginawa nilan)
Andu iyawa nu Allah Taala i lipungat nu pusung nilan (mga bamaginugut) andu tawbaten nu Allah su mag-kahanda nin, su Allah i mataw sa mapayag-masulen..
Ngentu ga-antap nu i pasagadan kanu sa dapan katawi (mabatalu) nu Allah su min-jihad salkanu andu (ngintu) dala umbal sa salakaw sa Allah (a saligan nin) andu su sinugu nin andu su mga bamaginugut sa (makadtabang lun lu sa kanu apya su masulen nin? Su Allah i mataw kanu pang-galbaken nu.
Dala kanu mga Mushrik i tumuganul sa mga masgid nu Allah T sa pad-saksyan nilan sa ginawa nilan i ka-kafir, silan i nagugul i mga galbekan nilan, andu silan na lu sa naraka.
Nya tumuldu sa mga masgid nu na su nangimbenal sa Allah andu gay a mawli andu pad- sambayang andu pan-zakat, andu dala ika- gilkin a salakaw sa Allah, na di abpalis na nakuyug silan kanu nangatutulu.
Na ngentu ka binaluy nu su kaped-tuludu sa peg- kagi andu su kaped-tuganul sa masgidil haram- sa mana bun nangimbenal sa Allah andu gay a mawli, andu min-jihad sa lalan sa Allah, dili silan maka-pagidsan lu sa Allah andu su Allah na di nin tutulun su mga Zalimeen. (padsakutu, limban, talimbuten)
Su silan a mga bamaginugut, andu nagambilid (mib- palin) andu min.-jihad sa mga tamuk nilan andu ginawa nilan, na masla i bangkatan nin lu sa Allah, andu silan i mga taw a nanga- badtugan.
Papeg-kalilinin nu kadnan nilan, silan kanu limu abpun sa Allah, andu masuwat, andu su surga i kanilan, sa dala kadtaman nin.
Dili den silan makalyu sa surga, su Allah na lu salekanin i balas a masla.
Hee sekanu atagin a mga bamaginugut, di nu pembaluya su mga lukes nu andu pagali nu a igkalimuwa nu (unutan) amayka ini-labi nilan su ka-kafir kanu kapa- ngimbenal, ka anteyn i mamaluy kanilan san salkanu (kaunutan) na silan i mga taw a Zaalimun. (pedsakuto, limban, talimbuten)
Adtalu ka i amayka su mga lukes nu atawka mga wata nu, atawka mga suled nu atawka mga kaluma nu, atawka su kadakel nu, atawka su mga tamuk nu a bamantyalin nu, atawka su dagangan nu sa kagilkan kanu sa dili maka-untung atawka su pagkalebanan nu- ka nya nu galilinyan sa Allah andu su sinugu nin andu su Jihad sa lalan sa Allah, na angap kanu den mun, ka tumpalaken kanu nu Allah sa (tyuba) andu di nin tutulun i mga taw a Faasiq.(nakalyu kanu kasugwan i galbek nin)
Saben-sabenal a tinabangan kanu nu Allah kanu madakel a kinam-bunwa andu su gay nu a naliliniyan nu su kadakel nu na dala makang-guna salkanu su kadakel nu, mig-kasimpit salkanu lupa su lupa a mawlad, mawli na tinumaligkud kanu sa balalaguy kanu.
Mawli na pinatulu nu Allah i makatana kanu Rasul nin andu su mga bamamaginugut andu pinatulu nin i mga Malaa-ikah sa dala nu maylay andu siniksa nin su mga kafeer, ka maytu ba i balas nu mga kafeer salkanu.
Mawli kanu antu, na taliman nu Allah su tawbat nu mag-kahanda nin andu su Allah i bangampun a malimu.
Hee sekanu atagin a mga bamamaginugut saben-sabenal su mga mushrik na Najasun, na di silan maka-supeg sa masjidil haram sa ulyan na lagun nilan ba niya (kag-kagi atawka umrah) na u kagilkan kanu sa ka-miskinan- na di abpalis na pagkakawasan kanu nu Allah kanu limu nin amayka nag-kahanda nin, su Allah i mataw sa mapayag-masulen.
Imbunwa nu su di bangimbenal sa Allah andu gay a mawli, andu di nin ipa-haram su iniharam nu Allah andu su sinugu nin, andu di bagagama sa agama a bantang (Islam) abpun kanu mga taw a inanggan sa kitab (Yahudi-kristiyan) taman sa makanggay nilan i buwis kanu mga lima nilan andu silan na mababa i palas nilan. (bangalimbaban silan salkanu)
Andu pidtalu nu mga yahudi na si Uzair i wata nu Allah andu pidtalu manem nu kristiyan si Aisha i wata nu Allah, antu ba i kadtalu nu mga ngali nilan, pagidsan nilan i- kadtalu nu mga kafeer a nawna sakanilan a namulkan nu Allah silan kanu ipadtabu nilan.
Binaluy nu mga yahudi su ulama nilan andu su kristiyan su ulama nilan (mga pari) a mga kadnan a salakaw sa Allah andu su Aisha a wata ni Mariam, na dala ini-sugu sakanilan (yahudi- kristiyan) ya tabya na simban nilan i kadnan a sawalu bu (Allah) ka dala kadnan a wagib a simban- ya tabya na su Allah, mahasutti sekanin kanu langun nu iped-sakutu nilan.
Kyug nilan (mga kafeer) na mapandeng nilan su sigay nu Allah kanu mga ngali nilan, na di manda su Allah ya tabya- na masampulna nin su sigay nin (Islam) apya di kaswatan nu mga kafeer.
Sekanin a Allah i sinumugu kanu sinugo nin (Muhammad) sa tutulu andu Agama a benal (Islam), ka andu nin maka-payag kanu langun nu Agama (sa nya ba i Agama a bantang) sa apya di kaswatan nu mga mushrik.
Mga bamamaginugut saben-sabenal a sekanu kadakelan kanu mga ulama nu yahudi andu su mga ulama nu kristyan a pegkan sa mga tamuk nu mga taw sa batil andu padsapal (kanilan su kapegkan nilan sa haram) kanu Agama nu Allah andu pang-gadungen nilan (ipedtagu) i bulawan andu pilak andu di nilan ipam- baranggiya sa lalan sa Allah, na panudtul ka sakanilan i siksa a masakit.
Su gay a pakalgan (bidsulan) sa apuy su tamuk a (ginadung) na ipilinsa kanu kasangulan nilan- takilidan nila, taligkudan nilan, namba su ginadung nu kanu ginawa nu, nanami nu su lalaw nu ginadung nu lu sa dunya,
Saben-sabenal a bilangan nu mga ulan lu sa Allah na sapulu andu duwa ulan (salagun) sya kanu kitab nu Allah, kanu kinabaluy sa mga langit andu lupa, a pat i haram (i kambunwa lun) antu ba i Agama a matidtu, di nu dumupang su ginawa nu (manibaba kanu sa namba a pat ulan) andu imbunwa nu su mga mushrik langun, mana bun kapem-bunu nilan salkanu langun andu tuntay nu su Allah na salta kanu magilek sa Allah.
Saben-sabenal su di nilan kaped-taldu kanu namba (ulan-ulan a haram) na pakawman sa ka- kafeer nilan, pakatadin pan sakanilan a mga kafeer, pabpakain nilan sa isa a lagun ando ipe-haram nilan sa isa a lagun, ka andu makad-tabway kanu iniharam nu Allah, na pamakayd nilan bulawa su iniharam nu Allah pinag-kapya nilan su kawagan nu mga galbek nilan andu su Allah na di nin tutulun su mga taw a kafeer.
Sekanu a mga bamaginugut dala salkanu u pidtalu salkanu i ganat kanu ambunwa sa lalan sa Allah, igkawgat kanu sya sa dalpa nu (dikanu abpalin kanu walay nu) naswatan nu i kawyag sa dunya (kumin) sa Akhirat? na dala sa kawyag sa dunya su kawyag sa Akhirat (dili makagaga su kapiya na dunya sa Akhirat) ya tabiya na paydu gayd su dunya.
Amayka di kanu gumanat (sa pen-jihadan) na siksan kanu nin sa siksa a masakit andu sambyan kanu nin sa salakaw salkanu (a mga taw) a di nu kagkaydan silan sa apya paydu, su Allah na kagaga nin su anggaga-isa.
Upama di nu tabangan su (Muhammad) na tinabangan den nu Allah sekanin kanu kina-palyu nu kafeer salkanin, a kadwa nu dwa kataw (Muhammad-Abubakar) a lu silan sa takub, a padtalu nin kanu kaped nin (si Abubakar) dika palidu i ginawa nengka, ka su Allah na salta salkita, na pinatulun nu Allah su kinatana andu binagel nin kanu Malaa-ikat nin sa dala nu maylay andu binaluy nin su kadtalu nu mga taw a kafeer i nakababa andu su kadtalu nu Allah i naka-pulu andu su Allah i mapulu a mataw.
Ganat kanu magidsan i matwa-manguda (kawasa-miskinan) andu an-jihad kanu sa mga tamuk nu andu ginawan nu sa lalan sa Allah, ka namba i makag-kapya salkanu amayka katawan nu.
Umana bu ka ganima na masupeg atawka dikena gayd mawatan na inunutan ka nilan,ugayd na mawatan a balakawan (lu sa Tabuk) andu adsapa silan sa u paka-gaga kami bu na munut kami den salka (Muhammad) pambinasan nilan i ginawa nilan, andu su Allah na katawan nin i mga malbut silan.
Pinasagadan kanu Allah (inampun ka nu Allah) kanu kina-sugut nengka sakanilan (sa di den munut silan) ka andu mapayag salka (Muhammad) su pambenal andu katawan nengka manem su mga malbut.
Di magetaw sa kaunut nin su mga bamaginugut sa Allah andu gay a mawli sa kan-jihad nilan sa mga tamuk nilan andu ginawa nilan andu su Allah i mataw kanu mga magilek sa Allah.
Nya bu magetaw salka (Muhammad) sa ka-unut nin sa kambunwa na su di bangimbenal sa Allah andu gay a mawli, andu mindwa- dwa i mga atay nilan, na silan kanu kapen-dwa-dwa nilan i bagalang-alang silan.
Upama benal a pegkyug silan bagunut na pinagadil nilan i kasangkapan (kambunwa) ugayd na dala kalilini nu Allah sa maka-unut silan, pinag-kawgat nin i ginawa nilan andu pidtalu sa kanilan nu mga Munafiq i sya kanu den kanu di bamangunut.
Upama naka-unut bu silan salkanu na dala makawma (makad-tabang) nilan salkanu, ya tabya kag-kalubay nu andu betadan kanu nilan sa di kapamagayun, ka ya nilan kyug na fitna salkanu, ka aden salkanu i pakikineg (malityaya) sakanilan andu su Allah i mataw kanu mga kafeer.
Saben-sabenal a bagapasen nilan i ma-fitna kanu (sa papamagukagen kanu nilan) sa unan pan a nya ba andu kinalid nilan salka i mga galbek, taman sa nakawma su Haqqn andu napayag su kyug nu Allah (a kataban) na silan na nanga-bansi.
Andu kaped kanu munafiq i magetaw salka sa dili munut (sa kan-jihad) andu di aku sumiksa, na nakabetad silan sa fitnah sa dala nilan ka- unut andu su naraka Jahannam i langkap kanu mga kafeer.
Amayka masugat kana mapya na mabansi silan a munafiq, amayka masugat ka na mapasang na ya nilan adtalun na saben-sabenal a nakwa tanu su kyug tanu paganay andu mawa silan (tagaken ka nilan) a gangagalaw silan.
Adtalu ka i dala makasugat salkitanu a salakaw kanu inukul nu Allah salkitanu, sekanin iped-tuganul salkitanu andu sekanin a Allah iped-tawakal nu mgabamamaginugut.
Adtalu ka i dala bagangapan nu salkami ya tabya na isa kanu dwa a mapya (kapeg-kataban atawka ka-saheed) andu bagangapa kami salkanu sa ipasugat kanu nu Allah sa siksa abpun salkanin atawka su lima nami, na pagangap kanu den mun-ka sekami na bagangap kami bun sa katyuba salkanu.
Adtalu ka imbaranggya kanu sa kyug na ginawa nu atawka padtagalen kanu, na di bon pad-taliman salkanu, ka sekanu na mga taw kanu a mga faasiq. (nakalyu sa sugwan su galbekan)
Andu dala paka-angga sa katalima kanu mga sadaqah nilan, ya tabya na na kinag-kafeer nilan sa Allah andu su sinugu nin andu di silan sambayang ya tabya na kangapok silan andu di silan ambaranggya sa tamuk ya tabya na gategel bu.
Na dika sakali su mga tamok nilan andu su mga wata nilan, ka ya kyug nu Allah na i siksa pan sakanilan sya sa dunya (su tamuk andu su wata nilan) andu maka-langgak silan kanu kad- sakratal-mawt nilan andu silan na kafeer.
Adsapa silan sa Allah sa kuyug silan salkanu, na dikena kuyug silan, kagina silan i mga taw a mategel ma-mitna.
Upama mana bu ka aden kapalaguyan nilan atawka kalindungan nilan atawka kaludepan nilan na lu ba silan abpawang mamagayas.
Aden bun sakanilan a mga Munafiq manileg salka (Muhammad) sya kanu sadaqah, amayka kanggan na mapiya i ginawa nin andu banangin andu amayka dala kanggay na silan langun i nalipunget.
Antu ba ka naswat silan kanu inumun nu Allah andu su sinugu nin andu pidtalu nilan natabwan salkami su Allah sa anggan kami bun nu Allah kanu limu nin andu su sinugu nin, ka sakami na lu kami kalilini sa Allah.
Su mga Zakat na kanu faqeer andu mga miskinan andu su panggalbek lun andu su balayaman i mga pusong nin andu su nanga- tamukan andu su nakam-bayadan andu so Jihad sa lalan sa Allah andu su natanaw (di pakawli sa inged nin) a faradu i kakwa nilan abpun sa Allah andu su Allah i mataw sa mapayag-masulen.
Andu kaped sakanilan (Munafiq) na banakit sa ginawa nu nabi andu kadtalu nilan kau nabi i manuliman gayd (si Muhammad) adtaluka sakanilan i kapanuliman nin i mapya salkanu, kanu bangimbenal sa Allah andu su mga nangimbenal kanu nangimbenal andu su limu kanu mga nangimbenal salkanu, su silan antu a papeg-kasakit kanu nabi na sakanilan i siksa a masakit.
Padsapa silan sa Allah san salkanu, ka andu nu kaswatan silan, na su Allah andu su sinugu nin i wagib a panunuwaten amayka benal silan a mgabamaginugut.
Dala nilan katawi su taw a supaken nin su Allah andu su sinugu nin na lekanin i naraka, a tatap kanu naraka antu ba i kalusak a masla.
Panggeda-gada su mga Munafiq sa aden maka- tulun a sulat a manudtul kanu dalem nu pusong nilan, adtalu ka i pagungat kanu den, ka su Allah na pagemun nin bun su pang gada-gedan nu.
Andu amayka inidsan nengka silan na ya nilan idtalu na pen-dalmet kami bu, adtaluka sakanilan (Muhammad) ngintu su Allah andu su mga ayatan nin andu su sinugu nin i bagumpaken nu?
Da kanu den pandawa (pebpalaw) ka mig-kafeer kanu sa ulyan a kina pag-Islam nu, u bagampunen nengka su kaped salkanu (Muhammad), na siksan nami bun su kaped, kagina silan a mga taw na bara-dusa.
Su mga munafiq a babay-mama, na silan bun tanan makad-tatagapeda, iped-sugu nilan i mawag andu iped-sapal nilan i mapya andu kag-kamen nilan i mga lima nilan (idsingit nilan su mga tamuk nilan sya sa lalan sa Allah) nalimpangan nilan Allah na pinalimpangan silan u Allah, su mga munafiq na silan i mga taw a faasiq. (nakalyu kanu suguwan su galbek nin)
Pinagadilan nu Allah su mga munafiq babay-mama andu su mga kafeer, sa apuy sa Jahannam a tatap silan, su apuy i mataw sakanilan andu namulkan nu Allah silan, andu aden pan siksa sakanilan a dala kadtaman nin.
Mana bun su nangawna salkanu (mga munafiq) silan pan i mabagel salkanu andu madakel pan i mga tamuk nilan salkanu andu mga wata na inayadan nilan su inumun nu Allah sakanilan, (inilingan nu) sa nangangayadan kanu sa kanu umun nu, sa mana bun su kinapanga- ngayadan nu mga taw a nawna salkanu kanu umun nilan andu linumudep kanu sa mana su linudapan nilan, silan a mga taw i nagugul i mga galbek nilan sya sa dunya andu lu sa Akhirat andu silan i mga taw a nangalugi.
Ngintu dala makawma sakanilan su tudtulan kanu nangawna sakanilan a Qawm nu Nuh andu si A'ad andu si Thamud andu su Qawm nu Ebrahim andu su mga tagapeda nu Madyan a Qawm nu Shu'aib andu su dalpa nu Qawm nu Lut, nakawma i mga sinugu sakanilan sa mga mapayag, na dala sa Allah i dupangen nin silan, ugayd na silan bun i dinumupang sa ginawa nilan.
Andu su mga bamaginugut babay-mama na silan bun mamakad-tagapada, isugu nilan su mapya andu isapal nilan su mawag andu itindeg nilan i sambayang andu inggay nilan i Zakat, andu paginugutan nilan su Allah andu su sinugu nin, silan a mga taw i ika-limu nu Allah silan, su Allah i mapulu a mataw.
Inibpasad nu Allah kanu mga bamaginugut babay-mama i mga surga a balagilay sa kababanin ig a tatap den silan sa surge andu pegkalbenan a mapya lu sa surga a tatap andu kaswat abpun sa Allah a nya pan masla antu a i untung a masla.
Seka a nabi-jihad ka su mga kafeer andu su mga munafiq, andu paka-pasangi ka sila andu ya nilan kad-takenan su apuy andu mawag a benal a kambetadan.
Pedsapa silan sa Allah sa dala nilan madtalu, na saben-sabenal a pidtalu nilan i ka-kafeer andu mig-kafeer silan sa ulyan a kina pag-islam nilan andu aden pinagapas nilan a dala nilan mapas andu dala silan adtagas ya tabya na kinanggay nu Allah sakanilan sa limu nin andu su sinugu nin, na amayka mid-tawbat silan na antu ba i makag-kapya sakanilan amayka manda silan (di silan tumalima sa Agama) siksan nu Allah silan sa siksa a mapasang sya dunya endo lusa Akhirat nando dala kanilan siya sa lupa i tumaladu sakanilan andu dala tumabang sakanilan.
Aden bun sakanilan i mib-pasad sa Allah sa amayka anggan kami nin sa limu nin, na mangimbenal kami sa mabagel andu makuyug kami kanu mga taw a mga mapya.
Guna den bagenggay nu Allah silan kanu limu nin na inidsingit nilan andu dala manem silan paginugut sa Allah ka mimbalawag silan.
Ini-asek sakanilan i ka-munafiq sa atay nilan taman sa gay a mawli a mabaratemu nilan su Allah sabap sa da nilan tumana su pasad nilan sa Allah andu sabap kanu kapen-dalbut nilan.
Ngintu di nilan katawan i gatawan nu Allah su masulen nilan andu kapagadunga nilan andu su Allah i mataw sa gayb.
Silan na panilgen nilan su ped-sadaqah sa sunnat kanu mga bamaginugut andu bagenggan nilan su dala sakanilan, na bagumpaken nilan intu ba a mga taw a pamakakwa, su Allah Taala i bagumpak kanu mga munafiq andu sakanilan i siksa a sangat i kasakit nin.
Ipangani nengka sakanilan sa ampun sa Allah atawka dili, na apya pan makapitu pulo nengka silan ipangani sa ampun na di bun ampunan nu Allah sakanilan su dusa nilan kagina silan na pigkafiran nilan su Allah andu su sinugu nin andu su Allah na di nin tutulun su mga taw a fassiq (nakalyu kanu kasugwan su galbak nin).
Nagalaw su dala pamangunut kanu sinugu nu Allah andu dala silan kyug an-jihad sa mga tamuk nilan andu ginawa nilan sa lalan sa Allah, andu pidtalu nilan da kanu pangganat ka mayaw a timpu, adtalu ka sakanilan I nya pan mayaw I naraka, u mana bu ka makafaham silan.(makatuntay silan).
Na paydu I kadtatawa nilan, ya madakel I kaulyang nilan ka balas nu mga galbek nilan (a ka munafiq).
Amayka kaulyan nengka pan su kaped sakanilan selaka sa kaunut (kambunwa) na adtalu ka sakanilan i da kanu a banal bagunut salaki andu da kanu a banal mamung ambunwa salaki sa apya ngin a satru, ka ya nu naswatan I ka-ayan paganay, na ayan kanu den kanu di pamakaunut ( sekanu sekanu den kanu di bamagunut).
Andu dika a banal sumambayang I minatay sakanilan, andu daka tumindeg sa kubur nin, kagina silan na pigkafiran nilan su Allah andu su sinugu nin andu minatay silan sa fassiq (nakalyu kanu suguwan su galbak nin).
Na daka mabimban sa mga tamuk nilan, mga wata nilan, ka ya kahanda nu Allah mna I siksa skanilan sya sa dunya (su tamuk wa nilan) andu makalanggak silan sa kalyu na nyawa nilan andu silan na mga kafir.
Andu amayka nakatulun I surah sa pangimbanal kanu sa Allah andu in-jihad kanu salta kanun Rasulullah na nagatew selaka su makalag i gatamanan nin sakanilan, andu pidtalu nilan i tagak kami nu den salta kanu gangatabun.
Naswat silan sa kuyug silan kanu di pamakaunut andu tinutupan nu Allah I mga pusong nilan, na silan na di silan makafaham.
Ugayd na su rasulullah andu su mga namaginugut na in-jihad nilan I mga tamuk nilan andu ginawa nilan andu silan na sakanilan den su mga mapya andu silan a mga taw na silan i namaka untung.
Inid-tatalanga nu Allah i mga surge sa pilagilay sa kababan na mga lawas na ig tatap den silan sa surge antu ba a badtugan untung a masla.
Andu nakawma su bamendawa sa dal aka-unut abpun kanu mga arab, ka andu kasugutan silan andu minayun bun su napandalbut sa Allah andu su sinugu nin, dili abpalis na masugat su mga kafir sakanilan nu siksa a masakit a mapasang.
Dala dusa nu di pakaunut sabap sa malubay andu su pandalu andu su dala kaparuli nin a mambaranggaya nin, dala dusa nilan amayka ikhlas I pusong nilan sa Allah andu su sinugu nin dala lalan a kandusa nu mga mapya a mga taw, andu su Allah i bangampun a malimu.
Andu dala bu dusa nin su mamakawma selka a papedtbang selka asal na makaunut silan, ya nengka nadtalu na dala makadtabang ku selkanu na minawa silan sa su mata nilan na gapanu na lu (bagulyang) sa lidu na ginawa nilan sa dala sakanilan i kam-baranggya.
NYa bu aden lalan sa kasiksa lun na su mga taw a bagataw selka na silan na mga kawasa silan, ka naswat silan sa makuyug silan kanu gangatabun andu tinumbukan nu Allah su mga atay nilan na silan na dili mataw.
(Su mga munafiq) na di mawa silan amayka nakowli kanu (lu sa Madina) adtalu ka sakanilan i da kanu pandawa ka dili name pangimbanalen, ka pinakawatan nu Allah salkami i tudtul selkanu andu gaylay nu Allah su galbek nu andu su sinugu nin, mawli na makambalingan kanu bun lu kanu mataw sa mapayag-masulen (Allah) na inggay nin selkanu sub alas nu pang galabakan nu.
Adsapa silan sa Allah salkanu ( mga Muslim) amayka makawli kanu abpun sa (Tabuk) ka andu nu silan kapasagadan na ginawa, na dinu silan bumimiyas, ka silan na maladsik andu ya nilan kadtakanan su naraka a blas nilan kanu kapen dalbut nilan.
Padsapa silan selkanu (mga Muslim) ka andu nu kaswatan silan, na u kaswatan nu silan na su Allah na di nin ka swatan su mga taw a linumyu sa inugut sa Allah.
Taw sa dalem a mga arab i muna i kakafir nin andu ka nunafiq nin andu dala sabut nin kanu mga dulunan a inutulu nu Allah kanu sinugu nin andu su Allah i mataw sa andadayt.
Andu kaped sa taw sa dalem ya nilan kataw (talima) sa ipambaranggyan nin ( sa lalan sa Allah) na nalapis andu pagangapan kanu nilan sa kawagan na manggula na kanilan su kawagan a manggula (tyuba), andu su Allah i pakakineg a mataw.
Andu kaped sakanilan i bangimbanal sa Allah andu gay a mawli, andu ya gatagu sa ginawa nin kanu ipambaranggiyan na ipadsupeg nilan sa Allah andu su dua nu sinugu, na saben-sabenal sa supeg nilan intu sa Allah ka paludepan nu Allah silan kanu limu nin, su Allah na bangampun andu malimu.
Su nangawna mag-Islam a mga muhajir andu su mga Ansar andu su mga nakatundug a minunut sakanilan sya kanu mga mapya, nasuwatan nu Allah silan andu nasuwatan nilan mambu su Allah na pinangadilan nu Allah silan sa surge a belagilay sa kababan na ig, sa dili den silan makalyu, antu ba i untung a masla.
Andu su kaped kanu ambala-bala selakanu a taw sa dalem i mga munafiq andu kaped sa taw sa Madinah i bananalusan s aka-munafiq, di nu katawan silan, sekami I mataw sakanilan, siksan name silan sa makaduwa-duwa, mawli na lu manem silan makabpawang sa siksa a masla.
Su mga kaped manem a nangimbanal sa mindusa silan a mkadsimbul nilan i galbek a mapya andu mawag na kalu-kalu tawbatan nu Allah silan (taliman su kapangumbaya nilan) ka su Allah na bangampun a malimu.
kwa ka kanu mga tamuk nilan i sadaqah (zakat) ka andu nengka makadsutti sakanilan andu indua nengka silan, ka su dua nengka i makapatana sakanilan, andu su Allah i pakakineg a mataw.
Di nilan katawan su Allah i pedtalima kanu tawbat nu mga ulipen nin andu su mga zakat nilan, ka su Allah na sekanin i padtawbatan a malimu.
Andu adtalu ka anggalabek kanu, ka gaylay nu Allah su mga galbak nu andu su sinugu nin andu su mga bamaginugut andu makambalingankany lu sa kanu mataw sa mapya masulen (Allah) na inggay nin selkanu I balas nu panggalabakan nu.
Andu su kaped manem na bamamati sa kyug nu Allah o dikna siksan ninsilan atawka tawbaten nin silan andu su Allah I mataw mapandadayta.
Su mga tew a minumbal sa masjid a ipandelat(ipembinasa) andu kakafiran andu ipa-pebpipitas kanu mga bamaginugut andu padtakanan nu nangawna a pembunwa sa Agama nu Allah andu su sinugu nin andu padsapa silan sa dala kahanda nilan, ya tabya mapya, na su Allah i padsaksi sa kanu mga Munafiq na mangalbut.
Da kanu dumampu samba a masjid, ka su masjid a pimbalay a nakaudsad sa gilek (Masjid Quba) kanu gay a kinowma sa madinah na wajib i lu kaba dumampu, aden mga mama lu ba a malilini gayd silan sa kadsutti na su Allah na malilini mamalas kanu mga taw a barasutti.
Dili makapagidsan i pimbalay a nakaudsad sa gilek sa Allah andu kaswatan nin, ka antu ba i mapya kumin kanu pimbalaya sya nakaudsad sa bibil na kalut sa naraka a lu naudtang sa naraka su mimbalay andu su Allah na di nin tutulun su mga taw a zalimeen (padsakutu,limban,talimbuten).
Dili gapinda nu pimbalay nilan a masjid i kapen dwa-dwa nu pusong nilan, ya tabya na nakapangatas kanu mga pusong nilan ( lupetan su pusong nilan taman sa matay) andu su Allah I mataw sa mapayag-masulen.
Saben-sabenal a sinamyan nu Allah kanu mga bamaginugut andu su tamuk nilan, sa kanilan su surge a pambunwa sa lalan sa allah sa maka patay silan, atawka silan I matay ( ma shaheed), pasad a banal lu sa tawrat andu injil andu Qur’an andu su tinumuman sa pasad nin sa Allah na agkalilini kanu sa pasad nu a inibpasad nu ka antu ba I badtugan a masla.
Su antu ba a mga taw na midtawbat a pedsimba a pebpuji, peb pwasa a pa ruku, pedsujud, pedsugu sa mapya, pedsapal sa malat andu peb parihalan nin su kumpasan nu Allah andu panudtul ka ( Muhammad) kanu mu’min I namba.
Dala kanu Nabi andu su mga bamaginugut ipangani nilan sa ampun sa Allah i mga mushrik apiya pan ngin I kabpagali nilan lun sa ulyan na napayag sakanilan i silan a mga taw na narakka.
Andu dala kanu kab-pangani ni Ebrahim sa ampun kani ama nin, ya tabya na pasad a inibpasad nin kani ama nin, na guna mapayag salkanin i satru nu Allah si Ama nin na linemipuwas, ka si Ebrahim na bara tawbat a matigkal.
Andu dala sa Allah i tadingen nin i tew sa ulyan na kina tulun nin sakanilan taman sa mapayag sakanilan su nganin a ipegkagilek nilan, su Allah kanu anggagaisa na katawan nin.
Su Allah na lekanin su pitu lapis a langit andu lupa, banguyag a bangimatay, andu dala selakanu i selakaw sa Allah i tumaldu andu dala tumabang selkanu.
Saben-sabenal a tinawbat nu Allah su nabia andu su mga muhajir andu su mga ansar a namangunut kanu nabi sa timpu a mapasanag, sa ulyan a pakasibay den su pusong nu kaped sa kanilan, mawli na pinadtawbat nu Allah silan sa katatap sa Agama, ka su Allah na malasam sakanilan a malimu.
Andu tinawbat bun su talu kataw a dala pamangunut sa tabuk sa ulyan pan I kinapsang sakanilan a benal, ka mana den padtikupan na lupa silan i ganggiginawa nilan andu naantap nilan i dala kalipus nilan kanu Allah, ya tabya na lubun salkanin Allah mawli na tinawbat silan ka andu silan makadtawbat, ka su Alla i padtawbatan a malimu.
Sekanu a mga bamaginugut ikagilek nu su Allah andu ambenal kanu sa kadtalu, da kanu andalbut.
Dala sa taw sa Madinah andu su ambala-bala sa(madinah) kanu mga taw sa dalem I aden pan di munut kanu rasulullah kanu pabpawangan nin andu wajib i ilabi nu su nabi kanu ginawa nilan, ka dala man maksugat sakanilan a kainum atawka lugan atawka gutem sa lalan sa Allah andu dala kadumpwan a kagilkan su mga kafir andu dala gakwa nin abpun kanu mga kafir apya ngen a makwa, ya tabya na inisulat bun sakanilan I galabak a mapya, ka su Allah na di nin dadagen su balas nu mga taw a mga mapya.
Andu dala pambaranggyan nilan a magidsan i manot matiwalu, andu katepas nilan a bogan a dikna nakasulat bun sakanilan, ka andu kabalasan silan nu Allah sa mapya a balas nu pnggalbek nilan.
Andu dala manem kanu mga bmaginugut i bagibpaden silan belakaw, ugayd uman isa tumpuk bun a zukliya, su natabun i mangagi a ipamandu manem kanu ginumanat amayka makawli silan, ka andu silan makatuntay (makaingat).
Hee sekanu atagin a bamamaginugut. Imbunwa nu su masupeg salkanu a mga kafeer andu maparuli nilan selkanu i kapasang, andu tuntayi nu su Allah na salta kanu mga taw a magilek sa Allah.
Andu amayka initulun i surah (Qur’an) na kaped sakanilan na yanin kadtalu a antayn selkanu a nawmanan na iman sa nya ba a yat? Na su mga bamaginugut na silan nadsinggumanan I iman andu silan i sangat a malilini.
Su mga taw a nakadalem kanu atay nilan i dalu a (kamunafiq) na nawmanan i kaladsik nilan sa labi pan I kaledsik ( a pakauman lun) andu silan i mga kafeer.
Ngintu di nilan gaylay i gafitna silan sa uman lagun sa maka-isa atawka maka-duwa, mawli na dibun silan adtawbat, andu dili silan ma-indaw.
Andu amayka initulun i surah na mamagilaya silan (a mga munafiq) sa (adtalun nilan) ngintu aden pakeylau selkanu apya isa kataw (sa namba)? Mawli na ginumanat silan, pinaganat nu Allah su mga pusong nilan sa haqq, ka silan na di makafaham.(makatuntay).
Saben-sabenal a nakwma i sinugu abpun salkanu a mapulo salakanin i makapasang kanu ummat nin a masagikel salkanu sa kagkapya nu, malasam a malimu kanu ummat nin.
Na amayka manda silan tumalima na adtalu ka i su Allah i mataw salaki, na dala kadnan a salakaw salkanin a padsaligan ku, andu sekanin tigwan sa Ars a masla.
