Tasbih ka sun gala nu kadnan nengka a mapulu.
Sekanin (Allah) i minaluy a napabpalas.
Sekanin (Allah) i minukul andu tinumutulu.
Sekanin (Allah) i napambwat kanu mga utan.
Binaluy nin i nagangu a malupat.
Batyan nami salak (Muhammad) na dili nengka kalipatanan.
Nya tabya na kahandan nu Allah, ka katawan nin su mpayag-masulan.
Pakalamwan nami seka sa lalan a mapya.
Pangindaw ka sa ambalaguna a indawan.
Nya ma-indaw na su magilak.
Andu sanggila sa indawan su darwaka.
Antu bas u makaludap sa naraka.
Mawli na di minatay (andu makatana) atawka dili makambibyag (andu agkapya).
Saben-sabenal a naka-untung su mid-sutti.
Andu linabit nin su Allah a mid-sambayang.
Ugayd na ibalabi nu su kawyag sa dunya.
Su akhirat i labi i kapya nin andu dala tadtab nin.
Saben-sabenal a nalabit kanu kitab a nawna.
Lu kanu kitab ni Ebrahim andu si Musa.
