Alif Laam Meem Saad (Su Allah i mataw kanu ma'ana nin.)
Nan su kitab (Qur-an) initulun salka (Muhammad) na di ma-aden sa laleb nengka i kagagetan, ka andu nengka maka-pakagilek kanu mga taw(a kafeer) andu makapatadem nengka kanu mga bamamaginugut.
Unuti nu su initulun salkanu (Qur-an) abpun sa kadnan nu, na da kanu munut sa salakaw lun i kamalan nu, ka paydu i katadem nu atawka maka- indaw salkanu.
Andu madakel i dalpa a bininasa nami (sabap kanu kadusan nu taw nin) nakama sakanilan su tyuba nami sa magabi atawka malmag.
Na dala den nadtalu nilan sa kanu kinawma na tyuba nami sakanilan, ya tabya a nadtalu nilan na sakitanu basen i mga dupang a mga taw.
Na idsan nami su mga taw u ngin i pidtalu nilan kanu sinugu, andu idsan nami bun su mga sinugu u ngin i pidtalunu mga taw.
Na panudtulen nami sakanilan (su ping-galbek nilan sa dunya a nawna) andu dala salkami i di nami silan ambantayan.
Andu su timbangan (lu sa gay a mawli) na bantang i kamukum, na su mawgat timbangan nu mapya nin, na silan a mga taw a namaka-untung.
Su mapegkag manem i timbangan nin a mapya-na silan su mga taw a linapis nilan su ginawa nilan, sabap kanu kapedsangka nilan sa mga ayatan nami.
Andu saben-sabenal a pinan-dalpa nami sekanu sya sa lupa, andu binaluy nami salkanu i maka-paguyag nu, na paydu i kad-sukur nu.
Andu saben-sabenal i binaluy nami sekanu andu pinab-palas nami sekanu, mawli, na pidtalu nami kanu mga Malaa-ikat i sujudi nu si Adam. na sinumujod silan, ya tabya na iblis ka dala amung sumujud.
Tigu Allah ngin i nakasapal salka sumujud sa sinugu ko seka? tigu iblis saki i mapiya salkanin (Adam) ka binalu yako nengka abpun sa apuy, na binaluy nengka (si Adam) abpun sa lupa.
Tigu Allah, ambaba ka, dala kadayt nin i kamamasela nengka sya sa surga, lyu ka den sa surga-ka seka na kuyug ka sa naka-lusak.
Tigu iblis- kadnan ku pag-kalendu ka i umur ku.
Tigu Allah seka na malendu i umur nengka
Tigu iblis, kadnan ku kagina ka tinading ako nengka, na palnen ko silan kanu lalan nengka a matidtu (su agamanu Islam)
(Tigu iblis) mawli na alawan ku silan sa sangulan andu taligkudan nilan andu tampal sa kawanan nilan andu biwang nilan, andu dala maparuli nengka kanu kadakelan sakanilan a makad-sukur. (kanu Allah)
Tigu Allah lyu ka den ka seka i pangimbulatan a nalipungetan, taman kanu munut salka a manusya, na panun ku su naraka salkanu langun.
Andu hee seka Adam tana ka andu si kaluma nengka sya sa surga, sa pangan kan kanu sa andaw i pegkyugan nu, na di nu samupegi i nya ba a kayu, ka mabaluy kanu abpun kanu mga dupang.
Sinasat silan nu shaytan, ka andu gapayag kanilan su nadapengan a awrat nilan sangulan nilan dwa, tigu shaytan nya kinasapal nu Allah salkanu sa nya ba a kayu, na mabaluy kanu dwa a datu sya sa surga, atawka matatap (dikanu den makalyu) sya sa surga.
21 Andu midsapa su shaitan (kani Adam) sa saben-sabenal a saki tigin na kuyug aku sa kanu magungaya salkanu.
Tinutulun nin sa makadulat, guna nilan kananami su ungan nu kayu na napayag sa uman isa sakanilan (Adam-Hawa) sangulan na kaped nin, uman isa na nakakwa sa lon a kayu a nakadapeng nin kanu awrat nilan atawka sangulan nilan andu tinawag nu kadnan nilan (pidtalu nu Allah) ka naba ini-sapal ku salkanu intu ba a kayu, andu ka naba pidtalu ku salkanu su shaytan na satru nu a mapayag
Nya pidtalu ni Adam silan kani Hawa kadnan nami na dupang nami i ginawa nami, amayka di kami nengka ampunen andu ika-limu, na makuyug kami kanu mga taw a nangalugi.
Tigu Allah, ambaba kanu lusa dunya sa pagukagen nu kaped su kaped nin andu aden kadtakenan nu gagalu lu sa lupa andu aden kawyagan nu sa taman a timpu nin. (di pan matay)
Tigu Allah lu kanu ba paguyag, andu lu kanu bun ba matay, andu lu kanu bun ba makambwat (sa lupa) sa kabangkit sa dunya.
Hee sekanu a tupo nu Adam saben-sabenal a initulun nami salkanu i balegkas a makasapeng sa awrat nu andu balegkas a mapya i palas nin andu su balegkas a gilek sa Allah na minuna i kapya nin sa langun a nalabit antu, namba na kaped kanu mga tanda nu Allah, ka malmu-lamu sakanilan i makatadem. (ma-indaw silan)
Hee sekanu a tupu nu Adam, di kanu ma-fitnah nu shaytan sa mana su kina palyu nin kanu duwa a lukes nu sa surga (Adam-Hawa) sa ibpagawa nin sakanilan i balegkas nilan, ka andu gaylay nu isa i awrat a kaped nin, na kaylay kanu nin (shaytan) andu su mga tagapeda nin, na di nu silan kaylay, binaluy nami su mga shaytan a silan i tagapeda nu (mga taw) di bangimbenal sa Allah.
Andu amayka makang-galbek silan sa maledsik,na ya nilan kadtalu na naparuli nami kanu mga kalukesan name andu sinugu kami nu Allah sa nya ba, adtaluka (Muhammad) su Allah na di samugu sa maled-sik andu di nin isugu i madtalu nu (sa makadawa kanu)sa Allah i di nu katawan.
Adtalu ka (Muhammad) ini-sugu nu Allah i kambantang andu patidtu nu i mga biyas nu sya kanu Masjid (apya ngi nagalbek, andu apya andaw matabu) andu pangeni kanu salkanin (Allah)su ikhlas salkanin su agama, ka binaluy kanu nin (paganay) na makam- balingan kanu bun salkanin. (Allah)
Su kaped na natutulu, su kaped na wagib sa kanilan i katadin, kagina silan na binaluy nilan i mga shaytan a sinimba nilan a salakaw sa Allah andu ya nilan pagantapen na natutulu silan.
Hee sekanu a tupu nu Adam, kwa nu i ipebpalas nu sya sa kanu mgamasjid andu kan kanu andu inum kanu andu di nu mapasagad- mapad-subra. (su galbek nu) ka di kalilinyan nu Allah pamaka-sagad (a galbekan)
Adtalu ka (Muhammad) antayn i sinumapal sa kapalasan a pinambwat nu Allah kanu mga ulipen nin andu su mga mapya ridzki adtalu ka(Muhammad) kanu mga bamamaginugut i sakanilan(Mu'min-kafeer) sya sa dunya su mga palas, na kanu mga Mu'min bu manem sa gay a mawli (I kapya na palas), mamba i kaped-tinantad nami kanu mga ayatan kanu mga taw, ka andu nilan katawan.
Adtalu ka (Muhammad) i nya ini-sapal nu Allah na su mga maled-sik a mapayag andu masulen andu su mga kadusan andu su makasagad (galbekan aped-subra sa atulan) sa dala kawagib nin, andu su kasakutu sa Allah, ka dala initulun nin a tindeg nu (kanu kaped- sakutu) andu makad-talu kanu sa Allah sa di nu katawan.(maka-pandalbut su Allah)
Andu uman isa na aden ajal nin (aden ukulin) na amayka nakawma su ajal nilan na di makasundul su waktu nin (oras nin) na dibun maka-sunud.
Hee sekanu a mga tupu nu Adam, makawma bun salkanu i mga sinugu, abpun salkanu (manusya a tupu nu bun) a mamanudtulan salkanu kanu mga ayat ku, na su magilek sa Allah andu nagumbaya, na dala gilek nilan (kanu kapatay) andu di malidu i ginawa nilan. (kanu pang-ganatan nilan)
Andu su mga taw a napan-dalbut kanu mga ayatan nami, andu ma-masla kanu ayatan nami, na silan tigkwan sa apuy, silan na dala de kalyu nilan sa naraka.
Dala linumawan sa ka dupang (na taw) a pid-tebwa nin su Allah sakalbut, atawka ka pinan-dalbut nin su mga ayatan nin, silan na masugat nu umun nilan abpun sa kitab (umun a mapya, andu malandu a umul)taman sa amayka makawma sakanilan su mga sugu nami (Malaa-ikah a pem-bugkut kanu nyawa)na imatayan nilan den, nadtalun nilan (Malaa-ikat) andaw den su pad-simban nu a salakaw sa Allah Ya nilan mad-talu na-natadin salkami, (di nami katawan andaw nakab-pawang) andu mid-saksi silan kanu ginawa nilan sa silan i mga taw a mga kafeer.
Tigu Allah ludep kanu,kanu mga taw a nawna pan salkanu a Jin andu manusya sa naraka, uman makaludep su isa na mulkan manem o kaped nin, taman sa amayka na ma-kang gay sa den silan tanan (lu sa naraka) na adtalun o kawli kanu nawna i kadnan nami silan banan (a nawna sa naraka) i tinumading salkami, na inggay ka sa takep a apuy, tig nu Allah uman isa na aden takep nin (matakep) ugayd na dinu katawan.
Ya manem adtalun nu nangawna kanu na ngoli na dala salkanu i sya salkami i katinggya nu (dikena sabap salkami i kinatadin nu) na nanami nu su siksa sabap kanu pamantyalin nu (peng-galbekan nu) a mga kadusan.
Su mga taw a napan-dalbut kanu mga ayatan name andu mima-masla silan na di magukat sakanilan (di kabukatan) i mga bengawan nu langit andu di maka-ludep silan sa surga-taman sa di maka-ludep su unta kanu pasu na lagun, na mamba i kabalas nami kanu mga ped-sakutu.
Aden sakanilan lu sa naraka i ikam a apuy andu apuy kanu pulu nilan a pegkalaw- kalaw, andu mamba i kapem-balas nami kanu mga salimun. (ped-sakutu, talimbulen)
Andu su mga bamamaginugut andu minggalbek sa mga mapya, di nami ibpa-lyugat kanu isa i di nin magaga, silan tigkwan sa surga a di den silan makalyu. (lu sa surga)
Andu inawa nami kanu mga laleb nilan su kandi-dilipungeta (su lipunget a nagedam sa sya pan sa dunya) sa pilagilay sa kababan nilan i mga pulangi andu madtalu nilan i pujin tanu su Allah a tinutulu tanu nin sa nya ba andu di tanu maka-tuntul o dikena bu tinutulu tanu nin, saben- sabenal su kinawma nu sinugu nu kadnan na bantang andu tinawag silan lu sa surga sa nan demba su surga a pina-warisan nu Allah salka nu sabap kanu pang-galbaken nu a mapya.
Andu tinawag nu taw sa surga su taw sa naraka sa naparuli nami den su inibpasad nu kadnan nami salkami a benal, na ngintu naparuli nu mambu su inib-pasad nu kadnan nu a benal?tig nilan uway, aden mapatuntay kanu pageltan nilan sa su mulkanu Allah na nanget den kanu mga taw a salimeen. (ped-sakutu, talimbulen)
Silan na iped-sapal nilan su agama nu Allah andu pangilayan nilan sa kabigkugan nin atawka katilan nin andu silan na ped-supaken nilan su gay a mawli. (di balityaya sa gay a mauli)
Andu nakab-pagaltan sakanilan(nakadapeng) andu A'raf (landing a mapulu I nambetadan nin)a aden mga mama kanu pageltan nu naraka andu surga, (silan a mga mama) na katawan nilan i tanda na naka-surga andu naka-narakah andu tawagen nilan i mga taw sa surga, sa sajahatra kanu den (lepas kanu den) sa silan antu a dala makaludep sa surga sa pakyug a benal silan paludep.
Amayka pasangulen silan (ipaylay sakanilan) sya tampal kanu taw na naraka, na ya nilan madtalu na kadnan nami dikami kumuyug kanu mga Zaalimeen. (pad-sakutu limban,talimbulen)
Andu tawagen nu taw sa pageltan (lu sa A'raf) i mga mama a mga kafeer (a katawan nu bananawag) i mga tanda nilan (sa taw na naraka) sa tig nu bananawag dala makang-guna salkanu su kadakel nu (tamuk a linimud nilan sa sya sa dunya) andu su ini-mamasla nu.
(Su Allah na adtalwan nin su mga kafeer) kanu sa di silan i kalimu nu Allah? sa dikena namba su mga Mu'min a mid-sapa Ludep kanu (a mga bamamaginugut) sa surga sa dala gilek nu, andu di malidu i ginawa nu.
Andu tawagen nu taw sa naraka su taw sa surga, sa natutung kami den, pasiki kami nu pan sa ig atawka ngin a ini-ridzqi no Allah salkanu,ya nilan madtalu (taw na surga) na ini-haram nu Allah (su ig, atawka pagken sa surga) kanu mga kafeer.
Silan su mga taw a binaluy nilan su agama a iped- simpang andu dalmetan andu nadulatan silan o kab-paguyag sa dunya, na saguna na tagaken nami silan-ka tinagak nilan bun i nya ba a gay, (lupan silan sa dunya) andu su kapa-pegkayd nilan kanu mga ayatan nami a pad-supaken nilan.
Andu saben-sabenal a pinawman nami silan sa kitab (Qur-an) a pid-tinatad nami sa kataw a tutulu andu limu kanu mga taw a bangimbenal.
Dala kapagangapan nilan ya tabya na su kadedsa nilan (kasiksa sakanilan) su gay a kawma nu kadedsa nilan (kasiksa) na madtalu nilan i nalipatanan muna (linipatanan tanu i nya ba a gay) sa benal su kinawma nu sinugu nu kadnan tanu,na ngin i nya aden pan makad-tabang? ka tabangan tanu nin, atawka makam-balingan tanu (lu sa dunya) ka anggalbek tanu sa salakaw kanu ping-galbek tanu (a mawag) na saben- sabenal a nalugi nilan i ginawa nilan, andu natadin sakanilan (su mga barahala nilan)a ipedtatabu nilan. (kanu Allah)
Saben sabenal so kadnan no naso Allah, a sekanin ba e minaluy kanu mga langit andu lupa sa naka-nem gay,mawli na mibpapulu sekanin kano arsh nin, ipen- dapeng nin su magabi kanu malmag a ped-tuntuten o magabi su malmag sa malengkas (andu binaluy nu Allahu Taalah) su sanang andu su mga bitun,sa andaw i kyug nin sabap kanu sugwan nin, ka lekanin a Allah su langun a binaluy andu su kyug, mahasutti su Allah a kadnan o langun a inaden nin.
Panganin kanu sa kadnan nu sa ambaba kanu andu pageltan a masulen-mapayag, su Allah na di nin kalilinyan i sagad i katanug nin.
Andu da kanu maminasa sya sa lupa sa ulyan a kina-pagkapya lun andu pangeni kanu sa Allah sa dalem a gilek andu kad-sukur, sa limu nu Allah na masupeg kanu mga taw a pebpiya-piya.
Andu sekanin a Allah I pedsugu kanu mga sambel a malilini so taw, a lat nu sambel su ulan, (pakaygis su ulan sabap kanu sambel) taman sa amayka migkawgat den su dadtem na ibubu nami (pa-ulanen nami) kanu dalpa a minatay (lupa a minatay) patulunan nami sa ulan, na pinagemaw nami sabap kanu ulan imbalangan a mga unga, maytu bun ba i kapagemaw nami kanu namamatay-kamalmu- lamu salkanu i makatadem kanu sa kapatay.
Su dalpa a mapya na gumamaw su mga bagatu lun sa kahanda nu kadnan nin, su mawag menem na di gumamaw su bagatu lun, ya tabya na mawag bun, mamba i kapeb-payag nami sa mga ayatan kanu mga taw, ka andu silan makad- sukur
Saben-sabenal a sinugu nami su Noh lu kanu Qawm nin andu yanin pidtalu na samba nu su Allah, ka dala salkanu i kadnan a salakaw salkanin, ka saki na kagilkan aku salkanu sa siksa kanu gay a masla. (kabangkit sa dunya)
Pidtalu nu gawnutan kanu mga Qawm nin i sekami na ya nami kaylay salka (Nuh) na tadin ka sa mapayag.
Tig nu Nuh kanu mga taw nin, dikena aku buneg, ugayd na saki na sinugu aku abpun kanu kadnan nu dunya.
Iped-sampay ku salkanu su sugwan nu kadnan ku andu bangindaw aku salkanu andu aden katawan ku abpun sa Allah a di nu katawan.
Ngintu nagayp kanu sa nakawma salkanu i indawan abpun sa kadnan nu sa sya kanu mama a bangsa nu bun? Ka andu kanu nin kapa-kagilkan, ka andu kanu kagilkan, ka malmu-lamu ika-kalimu salkanu.
Na pinan-dalbut nilan, na linepas nami sekanin andu su mga kaped nin sya kanu bagedan andu pinageldami su napan-dalbut kanu mga ayatan nami, ka silan a mga taw na pisek i mga atay nilan.
Andu sinugu nami lu kani Adin i suled nilan si Hud, ya nin pidtalu na mga taw ku samba nu su Allah ka dala salkanu i kadnan a salakaw sa Allah, na ngintu ka di kanu kagilkan.
Pidtalu nu kawnutan o mga kafeer kanu Hud sekami na ya nami kaylay salka na untangaw ka andu bagantapen nami i seka na pen-dalbut ka.
Tig nu Hud mga taw ku dikena aku untangaw, ugayd na sugu aku abpun sa kadnan nu dunya.
Iped-sampay ku i sugwan nu kadnan ku salaki andu saki na bangindaw aku a mapayag salkanu.
Ngintu ka nagayp kanu sa nakawma salkanu i indawan abpun sa kadnan nu sya kanu mama a bangsa nu bun, ka andu kanu nin kapa-kagilkan andu tademi nu i binaluy kanu nu Allah a namakasukli sya sa lupa sa ulyan a taw nu Nuh andu inumanan kanu nin sa kasla andu kalambeg, na tademi nu su limu nu Allah salkanu, ka malmu-lamu salkanu i maka-untung kanu.
Tig nilan kinawma nengka andu kami makasimba sa Allah, ka andu nami matagak su ped- simban nu mga lukes nami? Na pambwat ka i ibanging gilek nengka salkami amayka nakuyug ka kanu mga benal i kadtalu nin.
Pidtalu ni (Hud)- nakabetad bun salkanu abpun sa kadnan nu i siksa andu lipunget, anduken ka ib- palawa aku nu pan sa mga ngala bu (a ped- simban nu) ini-pamedtu nu sekanu andu su mga kalukesan nu sa dala initulun o Allah a tindeg nilan, na angap kanu den, ka saki na salta aku bun salkanu a bagangap.
Linemapas nami sekanin (Hud) andu su mga bamamaginugut sabap kanu limu abpun sa (Allah) andu ginetas nami su alyugan (atulan) nu napan- dalbut kanu mga ayatan nami, na dala bun silan pangimbenal.
Andu sinugu nami lu kani Thamud si Salih ya nin pidtalu (Salih) na mga taw ku- simba nu su Allah, ka dala kadnan a salakaw salkanin, nawma kanu na mapayag a tanda abpun sa kadnan nu (unta a babay, mimbwat sa pageltan wato) nya su unta nu Allah a lekanu a tanda, na pasagadi nu (padtaday nuden) a keman damun sya sa kanu lupa nu Allah andu di nu sumigkul sa mawag (mapakasakiti) ka masugat kanu na siksa a masakit.
Andu tademi nu i binaluy kanu nu Allah a namaka-sukli sa ulyan nu A’din, andu pinandaya kanu nin sya sa lupa a bangumbal kanu sa mga maligay abpun kanu masibukala lupa (mapedtad-pedtad) andu bameswano i mga palaw a peg-kalbenan nu, na tademi nu su mga limu nu Allah andu da kanu panggula sya sa dalpa atawka lupa sa baminasa kanu bu.
Pidtalu nu kangaunutan sa pema-masla kanu mga taw nin, kanu mga malubay a nangim-benal kanu (Salih) sa ngintu katawan nu bun si Salih na sinugu abpun sa kadnan nin?(namba a kadtalu na umpak bu kanu Salih)ya nilan pidtalu (bamaginugut) sekami na su inisugu lun na pinangimbenal nami.
Ya manem pidtalu nu pemamasla: na sekami manem na namba a pinangim-banal nu anan na peg- kafeeran nami. (supakan nami)
Na sinumbali nilan su unta andu pib-papuluwan nilan i sugwan nu kadnan nilan andu pidtalu nilan i pambwat ka Salih i nambay bapaguway- uway nengka salkami o benal a nabi ka.
Na nasugat silan a linug a mapasang, na nabaluy silan kanu dalpa nilan sa namamatay, su bagagayan atawka ped-tindeg na dala mapalin.
Na tinumangka (si Salih) sakanilan, andu pidtalu nin i sekanu a mga taw ku na saben- sabenal na naka-sampay ku salkanu i sinugwan nu kadnan ku salaki andu pina-ngindaw ku sekanu, ugayd na di nu kalilinyan i mga taw a mangindaw.
Andu su Lut- pidtalu nin kanu mga taw nin i nginan ka penggula kanu sa maledsik (pegkaluma su mama-mama babay-babay) dala isa bu a nawna salkanu a minggula sa mamba kanu taw nu dunya.
Sekanu na pegkaluma nu i mga mama sa kyug sa salakaw kanu babay, kena ka sekanu den i mga taw a naka-sagad i palangay nin sa kumpasan. (atulan)
Andu dala nakasumpat nu mga taw nin ya tabya na pa-awan nu silan sya sa dalpa nu a nya, ka silan a mga taw na sutti gayd. (di malilini sa kadusan)
Na linepas nami si Lut andu su kadakel nin ya tabya na su kaluma nin, ka nakamung masugat a tyuba.
Andu pina-ulanan nami silan sa ulan a watu a apoy, na ilayka (Muhammad) u panun ba i mawli a manggula nu mga taw a darwaka mga Mujrimeen. (mga dupang, ped-sakutu, baradusa)
Andu sinugu nami su suled nilan a si Shu'aib lu sa mga taw sa madiyan, ya nin pidtalu na sekanu a mga taw ku samba nu su Allah ka dala salkanu i kadnan a salakaw salkanin,saben-sabenal a nakawma salkanu i mapayag abpun sa kadnan nu, na talutup nu i kapagasad nu andu kad-timbang n, di nu palugi su mga taw kanu langun taman nilan andu da kanu maminasa kanu dalpa sa ulyan na kina- pagkapya lun, ka antu ba i makag-kapya salkanu amayka mangimbenal kanu.
Andu da kanu bagagayan kanu lalan, sa papeg-kagileka nu i bagangay kanu Shu'aib, andu ped-sapalan nu sa agama su nangim-benal kanu Allah andu nya nu kyug na matila su agama, andu tademi nu su kutika a paydu kanu na pinag- kadakel kanu nu Allah andu ilay nu i mawli a manggila nu mga taw a baminasa
Andu kaped salkanu i nangimbenal kanu inisugu salaki andu su kaped manem salkanu na dala pangimbenal, na sabar kanu (tigkel kanu) a nangimbenal taman sa kimukum bun su Allah kanu pageltan tanu sakanilan andu su Allah i labi a mapya kanu bamangukum.
Pidtalu nu kangaunutan o mimamasla sa kanu Qawm nu Shua'ib, pawan nami seka o Shua'ib andu su mga bamaginugut (nangimbenal) saleka sya sa dalpa nami, atawka ambalingan kanu den mun sya sa agama nami, tig nu shua'ib apya di kami myug?.
Saben-sabenal a kadtebwan nami su Allah sa kalbut amayka kami sa agama nu, sa ulyan a linapas kami nin sa agama nu andu dala kadayt nin i kam-balinganan nami-ya tabya na kahanda nu Allah a kadnan nami a mawlad i kataw nu kadnan nami kanu anggaga- isa, sekanin a Allah isinaligan nami, kadnan nami bukati ka salkami i pageltan nami kanu mga taw sa bantang andu seka i labi i kapya nin kanu banguka.
An pidu atalu nu kangaunutan sa kanu mga a Qawm ni shu'aib amayka unutan nu si Shu'aib sekanu den i mga taw a nangalapis.
Nasugat silan a linug, nabaluy silan kanu dalpa nilan a matag lawas na dala nyawa nin.
Su napandalbut kanu Shu'aib na mana bun silan dala makan-dalpa kanu dalpa (nadtadin silan sabap kanu linug) su napandalbut kano shu'aib nabaluy silan sa silan i nalugi.
Tinumangka si Shu'aib (minawa) andu (linumangi) sa pidtalu nin kanu mga Qawm nin i naka-sampay ku salkanu su agama nu kadnan ku andu nangindaw aku den salkanu, na panun i kalidu na ginawa ku (sa kinabinasa) kanu mga taw a mga kafeer.
Andu dala sinugu nami a nabi sya kanu dalpa sa pinandalabut, a dikena bininasa nami silan (a napandalbut) sa kapasang a kabpaguyag andu dalu, ka andu silan makambaba (makapangalimbaban) sa Allah.
Mawli na sinambyan namu su mawag sa mapya, taman sa pinagkadakel silan (su kakawasan nilan) andu pidtalu nilan su mga lukes tanu na nasugat bun silan na mapasang andu malmu-adat a manusya i nya, dikena i niya abpun kanu kadnan, bininasa nami silan sa natekaw andu di nilan gad-sanggino.
Upama mana bu ka nangimbenal su taw nu dalpa andu nagilkan (sa Allah) na bukatan nami kanilan i mga barakat (mamakag-kapiya) abpun sa langit andu lupa, ugayd na napan- dalbut silan, na bininasa nami silan sabap kanu pang-galbeken nilan a mga kadusan.
Ya kataw nu taw nu dalpa a dupang, na di mawma na tyuba nami silan sa magabi sa timpu na ped-tulug silan.
Andu ya nilan kataw na di silan mawma na tyuba nami sa mapita kanu timpu a pendadalmet silan.
Ngintu linepas nilan i ginawa nilan kanu i kapakayd nu Allah (a kasiksa atawka tyuba sakanilan)na dala man taw a malepas nin i ginawa nin (amayka bagi nin den) ya tabya na(mga taw a pandupang den sa layab, kaya nilan talima na dala den siksa sakanilan) mga taw a nangalugi.
Ngintu ka di pan makatutulu kanu mga taw (su nanggula nu nangawna, na silan saguna) i naka-waris kanu dalpa sa ulyan nu taw nin (a nangawna) na u pig-kahanda nami bu na masugat nin bun silan (a tyuba)sabap kanu mga kadusan nilan, na silan a mga taw na di manuliman.
Antu ba a mga dalpa i banudtulan nami salka (Muhammad) i tudtulan nu sa nakawma sakanilan i mga sinugu sa mga mapayag i napananggit nilan, na dala bun silan pangimbenal, sabap sa nawna den i kina-pandalbut nilan, mamba i kaped- tutupu (kaped-sapeng nu) Allah kanu mga atay nu mga kafeer.
Andu dala naparuli nami sa kadakelan sakanilan i pasad a ped-taldun, andu ya kadakelan sakanilan i mga Faasiq. (nakalyu kanu sugwan i galbek.
Mawli na pinambwat nami su Musa kanu ulyan nilan (a mga sinugu) lu kani Fir-awn andu su kanga-saligan nin, na sinangka nilan su Musa,na ilayka (Muhammad) o panun i mawli (a manggula) nu mga taw a baminasa.
Pidtalu abpun nu Musa, hee Fir-awn saki na sinugu aku kanu kadnan o dunya.
Benal a dala madtalu ku sa Allah ya tabya na benal, nakawma aku salkanu sa mapayag abpun kanu kadnan, na butawani ka (pandaya ka) su tupu nu Israel lu sa dalpa nilan.
Tigu Fir-awn kani Musa amayka aden tanda na pambwat ka amayka kuyug ka sakanu mga taw a benal.
(Su Musa) na pinitasa nin su tungkat nin, kena ka nipay a mapayag.
Andu pinalyu nin su lima nin, kena ka maputi a mapiya i palas nin. (pag-kendap)
Ya pidtalu nu kangaunutan kanu taw nu Fir-awn: na saben-sabenal inan na mataw gayd sa sihir. (mga pakayd)
Yanin kuyug na makalyu kanu sa kanu dalpa nu, (s Fir-awn na minidsa) na ngin anggula nu?
Pidtalu nu kangasaligan (ni Fir-awn) i lumbatan su mga dalpa tanu andu su suled nin, ka pasuguwi ka (Fir-awn) su mga dalpa.
Ka andu kapananggitan ka nilan sa mga matagel sa sihir. (mga pakayd)
Andu nakawma su mga matagel(sa mga pakayd) lu sa kani Fir-awn, ya nilan pidtalu aden sukay tanu (premyu) amayka sekitano i tumalaw (tumaban)?
Tigu Fir-awn uway andu makasupeg kanu salaki.
Tig nilan kani Musa: seka i muna mamutawan, atawka sekami i muna mamutawan?.
Tigu Musa: butawan kanu den, guna silan pam- butawan, nilangut nilan su mata nu mga taw andu pinaka-gilkan nilan su mga taw andu pinam-bwat nilan i sihir a masla. (masla a pakayd)
Andu ini-wahi nami kani Musa i pitasi ka i balala (tungkad) nengka anan,na ngimpan ka pinanakab (pinangan) su langun nu pinam-bwat nilan a kalbutan.
Na napayag su bantang, na batal su pang-galbaken nilan.
Lu ba silan tinalaw, na makaganat silan sa nama- kalusak.
Na naka-sujud su tigkwan sa sihir.
Pidtalu nilan i nangimbenal kami sa kadnan nu dunya.
A kadnan ni Musa andu si Harun.
Tigu Fir-awn: babaya kanu den nangim-benal (kani Musa) sa daku pan maka-sugut salkanu, nan-a naumpungan nu bun a ipamakayd nu sya sa dalpa (i sihir) anan, ka andu nu pakapalyu su mga taw nin, na katawan nu bu i pakaidan ku salkanu.
Tabpaden ku i mga lima nu andu mga Ay nu sa pag-kibangan, mawli na palpang ku sekanu tanan.
Tig nilan sekami na lu kami ambalingan kanu kadnan nami.
Andu (seka Fir-awn) na dala i ped-tila nengka (ipeg-kalipunget), ya tabya na nangimbenal kami kanu mga ayatan nu kadnan nami sa kinawma nin salkami, kadnan nami panwi kami sa ka-sabar andu imatay kami a muslim kami.
Andu pidtalu nu kangaunutan a taw ni Fir-awn ipedtagak nengka si Musa andu su mga taw nin na maminasa kanu dalpa, 127 .Andu tagaken kanin andu su kadnan nengka, tigi Fir-awn: imatayan tanu i mga wata nilan a mama, uyagen tanu i mga babay nilan andu sekitano i mapulu sakanilan a pamakagaga
Tigu Musa kanu taw nin: patabang kanu sa Allah andu sabar kanu, ka su lupa na kanu Allahu Taalah, pawarisan nin kanu mag- kahanda nin kanu mga ulipen nin andu su mapya a mawli (su kapeg-kataban)na kanu magilek.
Tigu (tupu nu Israel) napasangan kami sa da kapan makawma salkami andu ulyan den a kinawma nengka, tigu Musa:su kadnan nu na binasan nin i satru nu andu isambi kanu nin sya sa dalpa, ka ilay nin u panun manem i lekanu a peng-galbaken.
Andu bininasa nami su ka dakelu Fir-awn sa lagunan (sa kina-panenang), andu su mga unga (pamulan sa di den munga) ka basi ma indaw silan.
Na amayka mawma na mapya silan,ya nilan kadtalu na lakitanu bun i nya,amayka nasugat silan a mapasang na pid-tempwan nilan si Musa andu su mga bamaginugut , na langun na iped-tempu nilan na lu sa Allah, ugayd na ya madakel sakanilan i di mangamataw.
Andu pidtalu nilan (kani Musa) i apya ngin den i kapambwat nengka sa tanda a sihir nengka sya salkami, na di nami seka pangimbenalen.
Na sinugu nami sakanilan i kadalem andu tapudi andu mga saldu andu babak andu lugu a mga tanda a kapeg-kagaga no Allah a pid-tinatad, na mimamasla silan, andu silan i mga taw a Mujrimeen. (dupang, pad-sakutu, baradusa)
Andu makawma sakanilan su siksa sakanilan, (namba nangalabit anan) Ya nilan pidtalu Hee Musa, pangeni ka pan salkami kanu kadnan nengka sa pasad nin salka amayka ma-awa nengka i siksa a nya na mangim-benal kami den salka andu paunuten nami den salka su tupu nu Israel.
Guna nami ibpagawa sakanilan su siksa sa taman a di bu pakawma su kageld nilan, kena ka dala nilan tumana su pasad nilan.
136 .Sinulyan silan sa pinagelad nami silan kanu lagat, kagina silan i napan-dalbut kanu mga ayatan name andu silan kanu mga ayatan nami na dala sa atay nilan.
Andu ya nami pina-waris na mga taw a dala alaga nin (pina-kapasangan) sa sebangan- sadepan o dalpa, a dalpa a pinam-barakat nami, andu nya bun naka-panalus na su kadtalu nu kadnan nengka a mapya kanu tupu nu Israel, sabap kanu kinad-sabar nilan andu bininasa nami su pakayd nu Fir-awn andu su mga taw nin andu su mga pamulan nin.
Andu pinalipus nami su tupu nu Israel kanu lagat (linepas), nawma nilan i mga taw a pedtamengan nilan i barahala nilan, pidtalu nilan kani Musa: umbali kami sa kadnan a maytu ba sa kadnan nilan, tigu Musa: sekanu su mga taw na dala sabut nu.
Saben-sabenal sa kanilan (a pedsakutu)na mabinasa bun i galbekan nilan andu mabatalu langun a peng-galbeken nilan.
Tigu Musa: salakaw pan sa Allah I kyugan nu a kadnan nu, na inilabi kanu nin (sa kapyanan) kanu taw na dunya.
Andu labit ka su kina-lapas nami salkanu kani Fir-awn sa ped-siksan kanu nin sa mawag a siksa, bamunun nin i mga wata nu a mga mama, ya bu baguyagen na mga babay andu lu ba su tyuba salkanu a abpun sa kadnan nu a masla.
Andu pib-pasadan nami si Musa sa talu-pulu ka magabi andu inumanan nami sa sapulu na sampulna sa pat pulu gay a magabi, na pidtalu nu Musa kanu suled nin a si Harun gantiy-aku, kanu mga taw ku andu pagkapiya ka (tuntul ka sa tutulu) andu daka munut kanu mga taw a baminasa.
Guna mawma nu Musa su waktu (oras) a pasad,na pimbityalay nu kadnan nin, tigu Musa kadnan ku pailay ka pan salaki,tigu Allah di aku nengka maylay-ugayd na ilayka i palawanan, ka amayka gumanggan su nabetadan nin na mailay ako nengka, guna pembayang-bayang su kadnan nin kanu palaw, na nalupit su palaw, nakalundub so Musa sa dala tanud nin, guna maka-imaman- tigu (Musa) mahasutika, mid-tawbat ako salka, andu saki i paganay a nangimbenal salka. Su kapab- pagilay nu Allah na manot bu a benal, ka mana bu tugku nu kingking, na di den peng-gaga su palaw hadith ni tirmidhi.
Tigu Allah: Musa:pinamili ku seka kanu mga taw sa kanu suguwan ku andu su kadtalu ku, na kwa ka su inenggay ku salka, andu pangaden ka sa makuyug ka kanu mga bara-sukur.
Andu ini-sulat nami kanu tawrat i langun na indawan andu pinayagan sa langun na anggaga-isa, na kamali ka sa mabagel andu sugu ka su mga taw nengka sa kamalan nilan sa mapya, ka ipaylay ku salkanu su dalpa nu mga Faasiq. (nakalyu kanu kasugwan su galbek nin)
Isibay ku su mga ayat ku (Qur-an) kanu mga taw a pemamasla silan sya sa lupa sa dala kawagib nin, o naylay nilan i tanda atawka ayat na di silan mangimbenal andu u nakailay silan sa lalan a nakatidtu (kapangim-benal sa Allah)na di nilan baluyin a ukitan andu u nakaylay silan sa lalan a kadusan na baluwin nilan i namba i ukitan nilan,kagina antu ba su mga taw a napan- dalbut kanu mga ayatan name andu dala sa ginawa nilan i mga ayat ku.
Andu su mga taw a napan-dalbut sa ayatan name andu su gay a mawli, na nagugul i mga galbek nilan, dala balas nilan ya tabya na su ping-galbek nilan.
Ulyan a kinalikud nu Musa na inumbal nu mga taw nin su mga pagigimwan nilan (a bulawan) sa sapi a aden suwara nin (mana wata a bagulyang) a sinimba nilan, dala nilan mad-sanggino (mad-suliman) i di nilan pakambityala silan andu di silan gatutulu, binaluy nilan a kadnan andu na-aden silan sa Zaalimeen. (ped-sakutu,mga limban,talimbutan)
Andu guna den silan makad-sandit, (kanu kinambalingan ni Musa) andu nalay nilan i natadin silan, ya nilan nadtalu u di tanu ika-limu nu kadnan tanu andu o di tanu nin ampunen-na nakuyug tanu den kanu mga taw a nangalugi.
Guna makawli si Musa lu kanu mga taw nin sa galipunget a galidu i ginawa nin, pidtalu nin: ngin den a kawag i nalikudan ko salkanu, ngintu kapina-magayasan nu i siksa nu kadnan andu ini- betad nin su tawrat, na kinwa nin i ulu nu suled nin (kinakangan nin sa buk)sa tinundanin, tigu suled nin si (Harun) wata ni ina mga taw a nya na pinakalubay ako nilan, andu paydo saman na bunun aku nilan, na dika pad-tampu (pad-sendit) salaki i mga satru anan, andu di ako pagkuyug kanu mga taw a Zaalimeen.
Tigu Musa: kadnan ku ampun ka salaki andu su suled ko, andu paludep kami kanu limu nengka andu seka i malimu kanu langun o malimu.
Su mga taw a minumbal sa sapi a sinimba nilan na makwa (masugat) silan a lipunget abpun kanu kadnan nilan andu makalusak sya sa uyag-uyag sa dunya,na mamba i kabalas nami kanu mga taw a ped-tatabu sa kalbutan.
Andu su mga taw a pang-galbek sa mga malat, mawli na mid-tawbat sa ulyan nin andu nangimbenal silan. na su kadnan nengka sa ulyan antu na bangampun a malimu.
Guna den makatalen su lipunget nu Musa na kinwa nin su tawrat andu naka-sulat su tutulu andu limu lu kanu mga taw andu bangandamen nilan i kadnan nilan.
Andu namili si Musa kanu taw nin sa pitu pulu a mama kanu waktu nami (oras a kab-pangaluma) guna silan masugat na linug (sabap kanu pidtalu nilan kani Musa: sa di kami mangimbenal salka, taman sa di nengka ipaylay su kadnan nengka)tigo Musa: kadnan ku o kahanda nengka i binasan silan, na nawna den abpeg ku, na di kami pembinasa sabap kanu galbekan o mga di mataw salkami, ka dala i nya- ya tabya na tyuba nengka, iped-tading nengka kanu mag-kahanda nengka, andu ped-tutulun nengka su mag-kahanda nengka seka i pedtaldu salkami na ampun kami nengka, ka seka i mapya gayd a mangampun.
Andu inggay nengka sya sa dunya i mapya andu lusa Akhirat salkami, sakami na mid- tawbat kami salka, tigu Allah isugat ko i siksa ku kanu mag-kahanda ku andu su limu ku na mawlad kanu langun nu anggaga-isa, na inggay ku kanu mga taw a magilek, andu ped-zakat anu silan na bangimbenal kanu mga ayatan nami.
Silan ba su mga taw a minunut kanu Rasul a nabi (Muhammad) a di makabatya, sa sekanin i naparuli nu mga yahudi a naka-sulat i ngala nin lu kanu tawrat andu lu sa Injil a simugu sakanilan sa mapya, andu sumapal sakanilan sa mawag andu ini-halal sakanilan su mga mapya andu i- haram nin sakanilan su mga maled-sik andu iyawa nin sakanilan su maugat(kapegkagan silan kanu ka simba nilan) andu su mga mapasang lu kanu agama nilan, su nangimbenal salkanin(Muhammad) andu pinakasla nilan andu inid-sabek nilan andu inunutan nilan su sigay (Qur-an) a initulun salkanin, na silan i mga taw a namaka-untung.
158 .Adtalu ka (Muhammad) sekanu a mga taw saki na sinugu aku nu Allah salkanu langun, a sekanin tigkwan kanu mga langit andu lupa, na dala kadnan a wagib a ped-simban a lyu salkanin, banguyag andu bangimatay, na pangimbenal nu su Allah andu su sinugu nin a di maka-batya, a bangimbenal sa Allah andu su mga kadtalu nin, andu unuti nu,ka malamu-lamu salkanu i matutulu kanu.
Andu aden kanu taw nu Musa i mga taw a pedtutulu sa bantang andu ipem-bantang nilan su hukuman.
Andu pina-gepad nami (pimbad-bad) sa sapulu andu dwa (su mga wata nu Ya'cob) andu ini-wahi nami kani Musa kanu kab- pangeni nu taw nin sa ig- i ibetay nengka (Musa) su tungkad nengka san sa watu, na mimbwat i sapulo e'ndo dwa a buwal, na natawan a umani saka-tupu i baginuman nilan andu sinilungan nami silan sa gabun andu initulun nami sakanilan (alman- pegken a mga mamis) andu salwa papanuk (a ped-tumpis) sa kan kanu sa kanu mga mapya a ridzki nami salkanu andu dala kami nilan dupanga, ugayd na ginawa nilan i dinupang nilan.
Andu pidtalu sakanilan i tana' kanu sya sa dalpa (baital Muqaddas) andu kang kanu sa andaw den i pegkyugan nu andu adtalu nu i ampunen kanu, andu ludep kanu sa bungawan sa sujud kanu, ka ampunen nami sekanu kanu kadusan nu, na umanan nami pan su mga mapya salkanu.
Na sinambyan nu mga dupang kanilan su kadtalu sa dikena su pidtalu sakanilan, na sinugu kanilan i siksa abpun sa langit sabap kanu kapen-dupang nilan.
Andu idsa nengka (Muhammad) sakanilan a yahudi su dalpa a masiken sa lagat, a sinupak nilan su ini-sapal sakanilan su, saptu (di mangin-seda silan sa saptu) makawma sakanilan (i seda a madakel) atawka ambwat i mga seda sa gay na saptu sa madakel, andu gay a dikena saptu na di ambwat su seda,mamba i kapem- batalo nami sakanilan, sabap kanu kab-palyu nilan sa inugut.
Andu pidtalu nu kaped sakanilan i ngintu ka bangindon pan i mga taw, na su Allah bu i minasa sakanilan, atawka sumiksa sakanilan sa siksa a mapasang,pidtalu nu (bamangindaw) i nya ba i di tanu ka amung (di tanu makamung) sa tyuba na kapangindaw, andu malmu-lamu i kagilkan silan.
Guna nilan ipedtagak su indawan sakanilan na linapas nami su ped-sapal kanu malat andu tinyuba nami su mga dupang sa siksa a sangat i kapasang nin, sabap sa kinalyu nilan sa inugut sa Allah.
Guna nilan pad-sungkanga su ini-sapal sakanilan, na pinambaluy nami silan a ubal a naka-lusak i palas nin.
Ando pina-katawan nu kadnan nengka i pambwatan nin silan (a mga yahudi) taman sa gay a mawli sa sumiksa sakanilan sa mawag a siksa, su kadnan nengka na mangagan i kasiksa nin andu sekanin na bangampun a malimu.
Andu pinab-pitas nami (Yahudi) sya sa lupa mga taw, kaped sakanilan i mga mapya andu kaped sakanilan na dikena mapya, andu binatalu nami silan sa mapya andu di mapya, ka malmu-lamu sakanilan idtinid-twan silan.
Na-sukli sa ulyan nilan, (i mga taw)a nakatundug a naka-waris kanu tawrat a pagkwa na haram) apya ka umbayan (nilan) su tawrat, silan sa sagugunay (bamantiali) apiya supak sa tawrat andu ya nilan na: ampunen bun salkitanu andu amayka nakawma sakanilan i pantyali a pagidsan nin na kwan nilan (pagidsan saben-sabenal a nakab-pasad sakanilan kanu kitab (Tawrat) i di silan adtalu sa Allah ya tabya na bantan andu napangagyan nilan su dalem ni andu su dalpa a akhirat na ya labi i kapya nin kanu mga magilek,na ngintu ka di kanu magu-ngangen?.
Andu silan i peg-kamal kanu kitab andu ped- sambayang silan, (tigu Allah) sekami na di nami dadagen su balas nu mga taw a papeg-kapya.
Andu ini-pulu nami su palaw kanu pulu nu, mana den su gabun a ped-silung salkanu andu na- antap nilan i makadad-sang sakanilan,(di nin bun idadsang) kamali nu su inenggay nami salkanu su mabagel (Tawrat) andu tademi nu su dalem nin,ka malmu-lamu i kagilkan kanu.
Andu namaruli su kadnan nengka sa tupu nu Adam sa lu pan sa mga bigkugung nilan su muli a- taw nilan andu pinad-saksi nu Allah silan sa ginawa nilan, tigu Allah ngintu dikena saki i kadnan nu? Tig nilan seka! mid-saksi kami, ka andu di nilan madtalu lu sa gay a mawli I dala sabut nu sa namba.
Atawka andu nu madtalu i sinumakutu bun su ka-apwan nami, na sekami na muli a-taw kami bu a nakatundug bu sakanilan, na ngintu binasan kami nu sabap sa galbek nu mga baatil?
Andu mamba i kaped-tinatad nami kanu mga ayat, ka malmu-lamu sakanilan i maginuntulan silan.
Andu batya ka sakanilan (Muhammad)su tudtulan kanu inenggan nami sa kanu ayatan nami (pad kanu lumpukan na yahudi) na linuwas nin (tinagak nin) su kataw nin- inunutan nu shaytan, na nakuyug kanu mga taw a nangabinasa.
Andu u nag-kahanda nami bu na ini-pulu nami den (i pangkatan nin sabap) kanu kataw nin, ugayd na nya natagu sa ginawa nin na tatap sa dunya (di matay) andu inunutan nin i kyug na ginawa nin, na ya nin upaman na aso a magidsan i galugat atawka dili, na pang-gamaw i dila nin, upaman u mga taw a napan-dalbut kanu mga ayatan nami, na panudtul ka (Muhammad) su mga tudtulan, ka basi maka-pamikir silan.
Mawag a upaman i mga taw a napan-dalbut kanu mga ayatan name andu silan bun i pandupang sa kanu ginawa nilan
Su tutulu nu Allahn a antu ba i na tutulu (sa bantang) andu su tadingen nin na silan manem i nangalugi.
Andu saben-sabenal a binaluy nami i madakel a Jin andu Manusya a ini-dasek sa naraka Jahannam, ka aden bun mga Atay nilan na di nilan i tuntay andu aden bun mga mata nilan di nilan ipangingilay na nilan andu aden bun mga tangila na di nilan ipanuliman, silan na mana bun mga binatang, taman sa muna pan silan (sa binatang) i kinatadin nilan, silan a mga taw na dala natawan nilan.
Andu kanu Allah su mga ngala a mga mapya, na pangeni kanu sa Allah kanu mga ngala nin, andu pasagadi nu su bagumbayan nin i mga ngala nu Allah, ka di abpalis na balasan silan kanu pang-galbaken nilan.
Andu kaped a binaluy nami i mga taw a banutulu sa bantang (Haqq) andu pam-bantang a hukuman sabap kanu Haqq.
Su mga taw a napan-dalbut kanu mga ayatan nami na balayatan nami silan (sa siksa) sa di nilan katawan i ulyanan nilan.
Andu pelanatan ku silan (di silantundugen sumiksa ka basi magumbaya) ka su kapakayd ku (sakanilan) na mapasang.
Ngintu ka di nilan kapamikir su tagapeda nilan a (Muhammad) na dikena buneg, sekanin ipab- pagingat a mapayag.
Ngintu dala nilan mad-suliman i mga masulen mga langit andu su lupa andu su binaluy nu Allah anggaga-isa andu di abpalis na pakasupeg sakanilan su ajal nilan (kapatay) na pan a kadtalu sa ulyan (Qur-an) i pangim-benal nilan?
Su taw a tadingen nu Allah na dala den makatutulu lun, andu itagak nin silan kanu kadupangan nilan sa anten-anten silan.(mana pisek a ped-tatalyung)
Idsa nilan salka (Muhammad) su gay a mawli u kanu i kawma nin, adtalu ka (Muhammad) I kataw lun na su kadnan ku, dala makapayag lun i timpu nin ya tabya na sekanin, (ka namba) na mawgat sa mga langit andu su lupa, di makawma salkanu, ya tabya na makatakaw (dala maka-ingat) idsa nilan salka ka mana nengka katawan bun (Muhammad) adtalu ka sakanilan ikataw lun na ( lu sa Allah, ugayd na ya madakel sa taw na di mga mataw.
Adtalu ka (Muhammad) i di ku kamilikan i ginawa ku sa kag-kapya nin andu kagkayd, nya tabya na kahanda nu Allah, andu u katawan ku bu i Gayb (di gailay) na nakapa kadakel ku den i mapya, (kakawasan) andu di aku mawma na malat, dala salaki (intu) nya tabya na (saki) papeg-kagilek aku andu papeg- kalilini aku kanu bama-ngimbenal.
Sekanin a (Allah) i minaluy salkanu sa isa boua napas i nabpunan (Adam) andu lu nin ba binaluy i kaluma nin a katelenan nin (maka-patana sa kanu uyag-uyag nin) na gunaden su sinumbak nin si kaluma nin na migkagingay sa mapegkag (di kawgatan) na dala mapinda su kagingay, guna den peg-kasla (su kagingay) na nangeni silan (Adam-Hawa) sa kadnan nilan sa amayka anggan kami nengka sa mapiya a wata na makad-sukur kami.
Guna den silan kanggay sa Salih a wata, na binaluy nilan a naka-sakutu silan sa kina- bedtu lun sa ngala, mahasutie su Allah kanu iped-sakutu nilan.
Ped-sakutu silan sa apya paydu na dala gabaluy nin (dala na-umbalu ped-simban nilan) nando silan pan i bagumbalen. (nu Allah)
Andu su mga barahala na dala magaga nin tumabang kanilan,andu di nilan kad-tabangan su ginawa nilan.
Andu amayka anggaten nengka silan sa katuntul (kanu Bantang) na di kanu nilan unutan, magidsan pan i inenggat nu silan atawka linumanek kanu.
Saben-sabenal kanu ped-simban nu salakaw sa Allah na mga ulipen a pagisan nu bun, na tawag nu kumba silan,ka sawalen kan nin amayka benal kanu.
Ngentu aden ay nilan a ibpelakaw nilan? atawka mga lima a ipangunguyamay nin? atawka mga mata a ibpagilay nin? atawka mga tangila a ibakikineg nin? Adtalu ka (Muhammad) i tawagen nilan i mga barahala nilan, mawli na pamakay diaku den, na di bun katagadan (kawgatan)i kabinasa nu.
Ka saben-sabenal na nya pidtaladu salaki (Muhammad)na su Allah, a napatulun kitab (Qur-an) andu sekanin i tumuganul kanu mga taw a salih. (mga mapiya)
Andu su ped-simban nu a salakaw sa Allah na di silan makatabang salkanu,andu di nilan kadtabangan i ginawa nilan.
198 Amayka tawagen nu (Muslim) silan sa tutulu, di silan makakineg, andu matag kanilan ped-tulikan na di silan pakailay.
Kamali ka i katigkel andu isugu nengka i mapya andu ambalawagi ka atawka dika bamimiyas su dala mga sabut nin.
Andu amayka pad-sasatan ka na shaytan na lindung ka sa Allah, ka sekanin i pakakineg a mataw.
Su mga taw a nagilkan sa Allah,na amayka sinasat nu shaitan na tumadem silan sa Allah, na nakaimaman silan.
Andu su pagali nu mga shaytan na pad-tapiden u mga shaytan sa katadin (kanu mga taw) sa di nilan indalaynun
Andu amayka di nengka silan kapa- nanggitan sa ayat, na padtalun nilan u namba ka minumbal ka den sa ayat, adtalu ka (Muhammad) ya ku bu bagunutan na so ini-wahi salaki abpun sa kadnan ku a namba i ipab-pagilay (salkanu) andu tutulu andu limu kanu mga taw a bangimbenal.
Andu amayka binatya i Qur-an na pakikineg nu, andu tana kanu, kamalmu-lamu salkanu i ikalimu kanu.
Andu tademi ka (Muhammad) su kadnan nengka kanu ginawa nengka (pusong andu dila) sa bangumpaya andu gilek, nando dikena matanog a kadtalo, sa mapita-malulem,na daka anggula sa makuyug ka, kanu mga taw a limpang sa Allah.
Su mga Malaa-ikat lu sa Allah na di silan pama-masla sa kasimba sa Allah andu ped- tasbih silan sa Allah andu ped-sujud silan sa Allah Taalah.
