Amayka nakawma su gay a mawli.
Na dala den kanu kawma nin i sakataw bu a makandalbut.
Igkababan nu kapad,igkapulu nu pad.
Amayka kumagkal den su lupa sa mapasang.
Andu malupat manem su mga palaw.
Makailing sa bumbul a pakabayug sa makapayapat.
Andu maadan kanu (lu sa gay a mawli) sa talu lumpuk.
Su mga taw a tampal sa kawanan su kitab nin na mapya i bagi nin.
Su mga taw a tampal manem sa biwang su kitab nin na mawag i bagi nin.
Andu su mga taw manem a nawna (nangimbanal) na mawna bun silan (kaludap sa surga).
Antu ba i nakasupag kanu kadnan nilan.
Lu silan sa surga i sangat i kapya nin.
Madakal kanu nangawna (nakabpun sa nangawna a nangimbanal.
Ansu paydu manem kanu mawli kanilan (i nakabpun bun kanu nangawna).
Lu silan kanu mga kantil a padsimbulan sa bulawan a pilak.
16 . Padsandang silan sa mamagidsaya,
Pambalibatan silan nu mga wata sa dala kalyu nilan (sa surga).
Mga tagayan, andu kandi andu mga basu a mga mapya i nanam nin.
Dili silan malangut atawka mabalag.
Andu unga na mga kayu andaw i kyugan nilan.
Andu sapu na papanuk andaw i pagkyugan nilan.
Andu mga babay a tanan mga manisan.
Mana den silan a mga muntya a pagkandap-kandap.
Inibalas sakanilan sabap kanu galabakn nilan a mapya.
Dala making nilan a mawag a kadtalu atawka makasakit sa ginawa.
Nya tabya na kadtalu na a sutti.
Andu su mga taw a tampal sa kawanan, nan gin den (a kapya) i tampal silan sa kawanan.
Sya silan kanu atag nu kayu a matilak.
Andu saging a taman sa pulu na minunga.
Andu gasilungan na tatap.
Andu ig a padtuga a dili gapinda.
Andu mga unga na kayu a madakal.
Dala den madtalu a timpu nin (bagunga den sa layab) andu dila gaibpadan.
Saben-sabenal na binaluy nami pan kanilan i mga bidadari sa kinabaluy a mapya.
Binaluy nami silan a mga laga.
Mga mapya i palas nin a mamagidsan sa umur.
Kanu mga taw a tampal sa kawanan.
Andu madakal bun mambu kanu mawli sakanilan (i nakabpun bun kanu nangawna).
Su mga taw a tampal sa biwang, na antayn i mga taw a tampal sa biwang?
Lu silan sa apuy a mayaw, sa gasugat bun silan a sambal a apuy.
Andu padsilung silan na galutu na mayaw bun silan.
Dikana matanggaw, andu dikana pakapiya sa ginawa.
Saben-sabenal silan na pagkalilini bun silan (sya sa dunya sa dala samba).
Andu nya nilan pina-papapamaday na kadusan a masla.
Andu nya nilan kadtalu na, u minatay tanu na mabaluy tanu a lupa, nalupat su tulan tanu, na makambwat tanu pan.
Apya su mga lukas tanu a nangawna?
Adtalu ka (Muhammad) sakanilan i saben-sabenal a iganat kanu nangawna andu su nangawli.
Na mabulig kanu bun tanan kanu gay a kagkukum.
Mawli na sekanu a nangatading a napandalbut.
Na nyanu makan na zaqqum (dili mawta andu dila malamad).
Mapanu su mga tyan nu sa apuy.
Andu nya nu mainum na sangat i kayaw nin.
Mana den kabpaginum na una.
Namba i katumpan nilan kanu gay a mawli.
Sekami na binaluy nami sekanu, na nya mapya na pangimbanal kanu.
Ngintu gaylay nu su mani a papadtugan nu? (kanu mga babay).
Ngentu sekanu i minaluy lun, atawka sekami i minaluy lun?
Sekami na inukul nami salakanu su kapatay na dala makawngan salakami.
I sambyan nami sekanu, andu pambaluyan nami sekanu a mana ubal.
Andu saben-sabenal a natawan nu su kina-pangangatu nu paganay, na namba ka ma-indaw kanu.
Naylay nu su langun nu ibamamamula nu?
Ngentu sekanu i bamula atawka sekami ba i bamula lun ?
Upama ka nya nami bu pig-kahanda i baluyan nami a dala mawnga nin atawka nagangu na makadsandit kanu, andu magayp kanu.
(madtalu nu) i saben-sabenal a sekami na nalapis tanu.
Taman sa nya nu madtalu na dala den ridzki tanu.
Naylay nubun su ig a bagaynuman nu?
Ngentu sekanu i papadtulun(sa ig) abpun kanu dadtam, atawka sekami (Allah) i papadtulun kanu ulan.
Upama migkahanda nami bun a baluyan nami a matimus, na dayt salakanu idsukur kanu (sa Allah).
Naylay nubun su apuy a papam-bwatan kanu maylaw a kayu?
Ngentu sekanu i napambwat kanu kayu nin atawka sekami bun i napambwat lun?
Sekami na binaluy nami i langun na namba a maka-indaw salakanu, andu mabaluy a lutuwan nu balalakaw sa mawatan.
Tasbih ka ( Muhammad) kanu ngala nu kadnan nengka a masla.
(saksi su Allah) idsapa ku su padsadapan nu mga bitun.
Andu saben-sabenal a idsapa ku (Allah) sa umana bu ka katawan nu na sangat a masla.
Saben-sabenal su Qur’an na mapulu.
Lu kanu kitab a naparihala.
Dili kambilan upama dikana naka-abdas.
Initulun abpun kanu kadnan nu mga dunya.
Namba i kitab anan a ipandalay nu bu.
Andu pambaluyan i ridzki nu (ipadsupak) andu papandalbut kanu.
Amayka makawma den su nyawa kanu bakalngan (kanu kapatay).
Andu sekanu na maylay nuden su papandalbutan nu.
Andu sekami (Allah) i masikan pan gayd selakanu, ugayd na dili nu gaylay.
(ngentu ka dala nupan anggula) amayka sekanu na makamung kanu bun sa siksa?
Imbalingan nu (su nyawa) lu kanu lawas nin) amayka sekanu i banal i kadtalu nin.
Amayka su taw (minatay) na kuyug kanu mga masupag kanu Allah.
(lakanin) su katana andu ridzki a mapya andu surge a sangat i kapya nin.
Andu amayka kuyug manem (su minatay) kanu tampal sa kawanan.
Su sajahatra den i leka, abpun kanu mga taw a tampal sa kawanan.
Andu amayka su napandalbut manem a nangatadin pan.
Nya nilan katumpan na su sangat i kayaw nin a pakalasu a pakagapul.
Andu gapagyaw den sa narakka jaheem.
Banal a nanma i saben-sabenal a bantang a dili makapndalbut.
Tasbih ka (Muhammad) kanu ngala nu kadnan nengka a masla.
