Alif.Lam.Mim (su Allah i labi mataw kanu ma'ana nin).
Dala wagib a ped-simban,nya tabya na su Allah, sekanin i uyag-uyag,andu ped-tindeg sa ginawa nin.
Pinatulun nami salka (Muhammad) i (Qur-an) sa bantang, a nagayun kanu kitab a nauma nin, andu ini-tulun nami su Tawrat andu Injeel.
A nawna- a tutulu sa manusiy,andu pinatulunin su Fur-qan (papadsanggaya sa bantang andu batil), su mga taw a sinupak nilan su mga ayatan nu Allah, na kanilan i siksa a mapasang, andu su Allah i mapulu a kigkuwan sa kasup(kasuli).
Saben-sabenal kanu Allah na dala makapagana a angga-isa salkanin apiya paydu sya sa lupa, andu sya kanu langit.
Sekanin a Allah i peb-palas (papem-buntal) salkanu, sa apya ngen i mag-kahanda nin, dala wagib a ped-simban a salakaw salkanin a mapulu a mataw.
Sekanin i napatulun salka (Muhammad)sa kanu Qur-an, a kaped kanu ayatan nin na mga mapayag a namba i asal nu kitab, su kaped kanu ayatan nin na di mapayag, na su mga taw a nakadalem kanu mga pamusungan nilan i di kambantang-ka nya nilan unutan su di mapayag, ka nya nilan kalilinyan na Fitnah, andu kiyugan nilan na silan i mapasangul kanu maa'na a di mapayag, na dala mataw sa sangulin (ma'ana) nya tabiya na su Allah, su mga ulama manem na nya nilan padtalun na pangimbenalen nami inan sa abpun tanan kanu sa kadnan tanu, na dala (man) ma-indaw, nya tabya su aden mga akal nin.
Kadnan nami di ka mapasibay su pamusungan nami sa ulyan na kinatutulu nengka salkami, andu inggay kami abpun salka sa limu, ka seka a kadnan i bangeng-gay.
Seka a kadnan nami i pambulig kanu mga taw kanu gay a dibpalis, (gay a mawli) su Allah na di madiyang-diyang i pasad nin.
Su mga taw a mig-kafeer na di makang-guna kanilan i mga tamuk nilan andu mga wata nilan sa siksa nu Allah apya paydu, andu silan ba i ibelaleg kanu apuy sa naraka.
Mana bun su galbek ni Fir-awn, andu su nawna kanilan,pinan- dalbut nilan su mga ayatannami na bininasa nu Allah silan sabap kanu mga kadusan nilan,andu su Allah i mapasang i siksa nin.
Adtalu ka (Muhammad) kanu mga kafeer tabanan kanu (di makagaga) andu pamamadtimun kanu bun sa naraka (Jahannam) andu ngin den i kawag nin a kandalpan. (su naraka)
Saben-sabenal a na aden salkanu i tanda kanu duwa a lumpok a mimbunwa, su isa tumpok na pam-bunwa sa lalan sa Allah, su isa na kafeer, nya kaylay nu mga Mu'min sa kanu mga kafeer na pagidsan nilan sa kadakal sa mapayag andu su Allah na imbagala nin sa tabang su magkahanda nin, saben-sabenal su antu ban a ibaratan kanu mga taw a matanem (madidalam) I kapamikir nin.
Pinakapya kanu manusya (a mga Mama)i kalilini sa babay andu mga wata andu mga tamuk andu madakal a bulawan andu pilak andu pag-kudan na malayam (bagadan) andu mga binatang a binukawanan andu pamulan, antuba na kapalasan bu sa kawyag sa dunya, andu su Allah na mapya ged a kaulyan (su surga nin).
Adtalu ka (Muhammad) o panudtulan ko salkanu i muna i kapiya nin salkanu? su magilak sa kadnan nin na lusa kadnan nilan I mga surga a bagukit sa kababan i pulangi a dayun (di den makalyu) silan sa surga andu aden mga kaluma nilan a sutti andu kaswat (lilini) abpun sa Allah andu su Allah i pakaylay kanu mga ulipan nin.
Silan na kadtalu nilan kadnan nami sakami na nangimbanal kami (sa Allah) na ampon ka i mga dusa name andu dalindingi kami kanu siksa a naraka.
Mga masabar silan andu banal, (i kad-talu) andu maginugut silan andu paganggaya silan, (zakat- sadaqah)andu pabpa-gampun silan uman magan mapita
Padsaksyan nu Allah i dala wagib a pad-simban a salakaw salkanin ando su Malaa-ikah andu su aden ilmo nin a pad- tindag sa bantang, dala kadnan, ya tabya na sekanin a (Allah) a mapulo a mataw.
Nya bu agama a matalima lu sa Allah na Islam andu dala ambida-bida su mga taw a inanggan sa kitab, nya tabya na ulyan a kinawma na ilmo sakanilan, kadupangan sa pamagltan nilan, na su ag-kafeer sa ayatan nu Allah na su Allah na mangagan ika- kukum nin.
Amayka ibpalawa sa kanilan (Muhammad) na adtalu ka i inisangkup ku su biyas ku sa Allah andu su minunut salaki andu adtalu ka kanu mga taw a aden kitab nin (yahudie, kristian) andu su dala katawan nin i ngintu sinumangkop kanu? Na o sinumangkup silan na sabenal-sabenal a natutulo na o minanda silan na yabu laka na kapad-sampay bu andu su Allah i pakaylay kanu mga ulipen nin
Su mga taw a padsupakan nilan su mga ayatan nu Allah andu pamunun nilan i mga nabi sa dala kawagib nin andu pambunun nilan pamun su mga taw a pad-sugu sa kanu mga taw sa kambantang- na panudtul ka (Muhammad) sakanilan i siksa a sangat a masakit.
Antu ba a mga taw i nanga-gugul i mga galbakan nilan sa dunya sampay sa akhirat andu dala makad-tabang sakanilan
Dala nengka maylay su inanggan sa umun sa kitab a maka- kukom sa pamagaltan nilan, mawli na minanda su kaped sakanilan andu silan na mimbalawag.
Kagina silan na pidtalu nilan i di tanu maka-naraka nya tabya na paydu bu a agay, naka-simpang sa kanu agama nilan su kapad- tatabu nilan.
Panun amayka limudan nami silan kanu gay a dala kabpalas nin na mawma andu makwa nu uman-isa su lalaw nu galbak nilan andu silan na dilimad-talimbul.
Adtalu ka (Muhammad) su Allah tigwan sa kakadatu inggay nin kanu mag-kahanda nin andu iyawa nin i ka-datu kanu mag-kahanda nin andu ipulo nin i mag-kahanda nin andu ibaba nin i mag-kahanda nin, sya sa lima nangka a kadnan nami su mapiya andu kagaga nengka i langon na anggaga-isa
Pab-paludapan nin (Allah) su magabi kanu malmag andu pab paludapan nin su malmag kanu magabi andu pab-palyun nin su bibyag abpun kanu minatay andu su minatay abpun sa bibyag andu pa-ridzkyan nin su mag-kahanda nin sa di magkila-kila
Di baluwinu mga Mu'min su mga kafeer sa kaunutan nilan a salakaw kanu mga Mu'min andu su anggalabak sa antuba na dala sa Allah (katalima kanu mga galbak nin) apya paydu nya tabya na kagilkan kanu sa kanilan sa mabinasa kanu andu pab-pagingatan salkanu nu Allah (su mga siksa nin) andu su Allah bun i kad-sunudan.
Adtalu ka (Muhammad) o ipagemanu su natagu sa ginawa nu, atawka ipeb-payag nu na katawan nu Allah bun andu katawan nin i dalam na langit andu su lupa andu su Allah na su anggaga-isa na kagaga nin.
SU gay a maparulinu uman isa i galbak nin a mapya a masupag salkanin andu su galbak nin a mawag, na yanin mapanganganay na makatangka salkanin (su mawag) sa sangat i kawatan nin, andu pabpagingatan nu Allah salkanu (su siksa a mapasang) andu su Allah na ma-uno kano mga ulipan nin
Adtalu ka (Muhammad) o kalilinyan nu su Allah na saki nu i unuti, ka kalilinyan kanu nu Allah andu ampunan nin i mga dusa nu andu su Allah i pangampun a malimu.
Adtalu ka (Muhammad) i paginuguti nu su Allah andu su sinugu nin, na amayka minanda silan na su Allah na dinin kalilinyan su mga kafeer.
Sabenal-sabenal su Allah na pinamili nin si Adam andu si Noh andu su pagali nu Ibrahim andu su kanu Imran kanu taw nu dunya (sa kanu timpu nilan).
Mga muli a-taw a sabad nabpun kanu sabad andu su Allah i pakakineg a mataw.
(Tadami ka) su kutika a pidtalu nu kaluma ni Imran, kadnan ku inid-samaya ku salka su dalam nu tiyan ku, na sia bu i galbak nin sa agama, (kang-galbak bu kanu agama)na talima ka salaki, ka seka a kadnan i pakakinag a mataw.
Guna nin pimbata (su Mariam) pidtalu nin, kadnan ku saki na nya ku nambata na babay andu su Allah pan i labi a mataw kanu pimbata nin andu dikana mana mama su babay andu binadtwan ku sa Mariam andu saki na ilindung ku salka andu su muli a-taw kanu mga shaytan a barajaman
Tinalima nu kadnan sa mapiya a kina-talima andu pina- pangangatu nin sa mapiya, nya naka-parihala lun si Zacaria uman kakapan ni Zacaria si (Mariam) sa kad-sambayang nin na aden mawma nin lu a ridzqi, nya nin madtalu (nu Zacaria) O Mariam andaw nakasungu i nya ba? Ya madtalu nu (Mariam) lu sa Allah, ka s Allah i pa-ridzqi sa kanu magkahanda nin sa di magkila-kila
Luba nakan-dua su Zacaria sa kadnan nin, pidtalu nin: kadnan ko anggayi aku abpun salaka sa muli a-taw a mapiya, ka saka na gakinag nangka su bangani.
Tinawag nu Malaa-ikah sakanin a padtindag sa kanu kapad- sambayang nin, (tigo Malaa-ikat) su Allah na panudtulan kanin sa kani Yahya a magayun bun kani Aisha abpun sa Allah andu ka-unutan andu dala kiyug nin sa babay
Tig nu(Zacaria) kadnan ku panun i ka-adan na wata a mama salaki sa matuwa aku den andu su kaluma ko na bayas? Tig nu Jibrel maytu den ba, ka su Allah na panggulan nin i kahanda nin.
Pidtalu (ni Zacaria) kadnan ku anggi ako sa tanda (sa magingay su kaluma ku), tig nu Allah ya nin tanda na dika myug ambityala sa taw sa talu gay, ya tabiya na gulingan andu tadami ka su kadnan nangka sa madakel andu tasbih ka sa mapita-malulam.
Andu labit ka su kinadtalu nu Malaa-ikah sa saka Mariam na pinamili ka nu Allah, andu sinutti kanin andu pinamili kanin kanu mga babay nu Dunya sa antu ba a timpu
Saka Mariam paginuguti ka su kadnan nangka andu sujud ka. and ruku ka salta kanu pamaruku.
Antu ba a mga tudtulan a Al-Gaib a ibe-wahi nami salka(Muhammad) andu dala nangka katabwi silan kanu timpu a ipambatad nilan i mga pencil nilan sa ig sa anten i makatuganul kanu Mariam andu dala nangka katabwi silan kanu dinilan kab-pamagayun.
Su kutika a pid-talu nu Malaa-ikah kanu Mariam, su Allah na pambatan kanin sa abpun salkanin a yanin ngala na si Aisha a wata ni Mariam a maka-mamala i palas nin sa dunya andu Akhirat andu kuyug kanu mga taw a namaka-supag sa kadnan nin.
46 .Andu imbityala nin mga taw sa pabpuyut pan andu matuwa sa magidsan i kadtalu nin andu kuyug kanu mga saliheen.
Tigu Mariam kadnan ku panun i kambata ku sa dala ako pan masigkul na mama? tigu Mala-ikah maytu den ba, su Allah na pagumbalan nin i kahanda nin amayka mig-kahanda na yanin bu adtalun na pangadan ka na ma-adan.
Andu pagkatun nu Allah sa kitab andu Hikmah andu tawrat, andu injeel.
Andu sinugu sakanin (Aisha) kanu mga tupu nu lsrael sa yanin adtalun na nakawma ako salkanu sa tanda abpun sa kadnan nu, saki na ambalan ku sakanu sa lupa a mana palas na papanuk, na yupen ku na mabaluy a tidtu a papanuk sa kahanda nu Allah, andu kagamutan ku i dala mata nin andu su putik andu maka-uyag aku sa minatay sa kahanda nu Allah andu adtalun ku i pagkan nu andu ipad-tagu nu lusa walay nu, banal a nakadalam su tanda nu (Allah) salkanu amayka mangimbanal kanu.
Andu bagayun kanu nawman ku a kitab a tawrat andu ipa- halal ku salkanu su kapad kanu ini-haram salkanu andu naka pananggit aku sa tanda abpun sa kadnan nu na ikagilak nu su Allah andu paginugunuti nu.
Banal su Allah i kadnan ku na simban nu, ka namba i lalan a matidtu.
Guna magadam nu Aisha sa kanilan ika kafeer, na pidtalu nin anten i tumabang salaki lu sa Allah? ya pidtalu nu mga mapiya nu mga Qawmin na sakami idtabang sa Agama nu Allah, nangimbanal kami sa Allah andu saksi ka (Aisha) na sakami na sinumangkup kami muslim kami.
Kadnan nami pina-ngimbanal nami su initulun nengka andu minunut kami sa sinugu, ikuyug kami nengka kanu mid-saksi.
Nagitung silan sa makabinasa (imatayan su Aisha) na muna pan su Allah (sa kabinasa sakanilan) andu su Allah i mapiya i kapamaked nin.
Pidtalu nu Allah kani Aisha ikag-kamang ku saka andu ipulu ku saka sya sa laki andu suttin ku saka kanu silan a mga kafeer andu baluwin ku su namangunot salaka sa mapulu nu silan a mga kafeer andu taman sa gay a mawli, mawli na sya kanu bun makambalingan salaki, na kukuman ku su pamagalatan nu kanu dinu bamagayunan.
Atag manam kanu mga kafeer na siksan ku silan sa siksa a mapasang sya sa dunya andu lusa Akhirat andu dala sakanilan i makad-tabang sa kanilan.
Andu su mga Mu'min andu ming-galabak sa mapiya na sampulnan sakanilan i mga balas sakanilan, su Allah na dinin kalinyan su talimbutan.
Antu ba ipambatyan nami salka (Muhammad)abpun sa mga ayatan andu indawan a tidtu.
Saben-sabenal a magidsan bun si Aisha lu sa Allah kani Adam,binaluy abpon sa lupa, mawli na pidtalu nin i pangadan ka na na-adan
Su Haqq nabpun sa kadnan nangka, daka ang-gula sa makuyug ka kanu mga taw a panduwa-duwa
Na anten ib-palawa salaka sa ulyan na kinawma na ilmu salka, nadtalu ka (Muhammad) i sya kanu ka tawagan tanu i mga wata tanu andu mga wata nu andu mga kaluma nami andu mga kaluma nu andu sekitanu andu sakanu, mawli na mangani tanu sa Allah (sa Ikhlas) sa baluyan i mulka nin sa kanu mga taw a malbut.
Namba i tidtu a mga tudtulan (kano Aisha) a banal na dala kadnan, ya tabiya na su Allah andu sakanin a Allah na sekanin ba i mapulu a mataw.
Amayka di silan tumalima, na su Allah i mataw kanu mga taw a pamaka-binasa.
Adtalu ka (Muhammad) i sakanu a inanggan sa kitab(Yahudie andu Kristian) na sya kanu sa kalimah (bityala) a magidsan tanu lun tanan, sa di tanu sumimba u dikana su Allah andu di tanu sakutun apiya paydu andu di baluwin nu sabad salkitanu su sabad a mga kadnan a salakaw kanu Allah, na amayka di silan tumalima na adtalu nu id-saksi kanu sa sakami na Muslim kami.
Sakanu a inanggan sa kitab andukan ka pab-palawa kanu sa kani Ibrahim, na dala makatulun su tawrat andu so injeel, ya tabiya na ulyanan nin, ngintu dinu ka-pamikir.
Nan kanu dan manam a dala mga akal nin, pab-palawa kanu (sabap kanu Aisha) sa natawan nu, na nginto ka pab-palawa kanu sa (tudtulan kani Ibrahim) na dala nu katawi? andu su Allah i mataw, sakano i di mataw.
Dala ma-adan si Ibrahim sa yahudi andu dikana kristian, ugayd dala matidtu sa haqq a Muslim sakanin andu dala makuyug sa Mushrik
Saben-sabenal a ya masupag a taw kanu Ibrahim na su namangunut lun andu namba i nabi andu su mga Mu'min andu su Allah i masupag (wali) kanu mga Mu'min.
Napanganganay nu kapad kanu adan kitab nin sa antuba ka matadin kanu nilan, dala gatadin nilan, ya tabiya na ginawa nilan, na di nilan gagedam.
Sakanu a aden kitab nin (Yahudi-Kristian) ngintu ka peg-kafiran nu su mga ayatan nu Allah (tudtulan kanu Muhammad) na sakanu na gad-saksiyan nu bun.
Sakanu a aden kitab nin ngintu ka pambusan nu su haqq sa batil andu ibagana nu su bantang? inunta na katawan nu bun
Andu pidtalu nu kaped kanu aden kitab nin (Yahudi) pangimbanal nu su initulun a kitab kanu mga Mu'min sa sagad bu sa gay andu agkafiri nu sya kanu mawli a malmag, ka basi matun dan silan na kandan nilan
Andu (pidtalu no yahudi) i di nu mangimbanal, ya tabiya na munut sa agama nu,adtalu ka sakanilan (Muhammad) i tutulu na tutulun nu Allah a maka-inggay nin sa isa i mana su inanggay nin salkanu, atawka ibpalawa kanu nin (makapantag) sa kadnan nu, adtalu ka i su kalbihan na lu sa Allah na inggay nin sa kanu mag-kahanda nin andu makalag i limu nin a mataw.
Tantwan nin sa limu nin sa anten i mag-kahanda nin andu su Allah igwan sa kalbihan a masla.
Unandu aden sa kanu inanggan sa kitab i saligan nangkasa tamuk a madakal, na itunay nin salaka, (bayadan nin) andu aden bun sakanilan i saligan sa paydu a tamuk na di nilan itunay,(di mayad) ya tabiya lu ka pamun pad-tindag (bapalumanan mangatuk) kagina silan na pidtalu nilan i di mapakay a kab- papuluwan tanu na arab a di mataw andu pad-talwan nilan su Allah sa kalbut andu katawan nilan.
Inunta na su timuman sa pasad nin ando nagilkan, na su Allah na kalilinyan nin su magilek.(sa Allah)
Su mga taw a pabpasan nilan su pasad nilan sa Allah andu su sapa (kinad-sapa) nilan sa alaga a paydu geyd na silan i dala bagi nin sa gay a mawli andu di imbityalan nu Allah silan andu dinin silan lantapan sa gay a mawli andu di nin suttin silan andu kanilan i siksa a masakit.
Andu kapad sakanilan a mga (Yahudi)na panambiyan nilan su kitab kanu mga dila nilan, kandu noma-antap i kuyug bun sa kitab, na dikana abpun sa kitab andu padtalun nilan abpun sa Allah, na dikana abpun sa Allah andu padtalun nilan sa Allah i kalbutan inunta na katawan nilan bun.
Andu dala sa manusya a inanggan nu Allah sa kitab andu hukuman andu ka nabi, mawli nadtalu nin sa mga taw i pangadan kanu a mga ulipan ku sa salakaw kanu Allah, uged dala pangadan kanu a mga Ulama kanu kaaden nu ibamandu nu a kitab andu su ka aden pinangagiyan nu.
Andu dikanu nin sugun sa baluyan nu i mga Malaa-ikah andu su mga nabi a mga kadnan, dikanu nin sugun sa ka-kafeer sa ulyan na sakanu a mga muslim kanu.
Andu minaluy sa pasad su Allah kanu mga Nabi nin (sa taliman nu su inggay ku) salkanu a kitab andu hikmah? mawli na nakawma bun salkanu su (Muhammad) a nagayun kanu kitab a bangimbanalan nu, andu tabangan nu, tigu Allah ngintu mibpasad kanu andu kinamalan nudan sa mabagal? Tig nilan tinumalima kami,tigu Allah ad-saksi kanu, ka saki na salta aku kanu mid-saksi.
Su tumaligkud (atawka manda) sa ulyan nantuba na silan i mga Faasiq.(nakalyu sa inugut)
Ngintu ka salakaw pan kanu Agama nu Allah i kiyugan nilan, inunta na sinangkupan sakanin (Allah) nu dalam nu mga langit andu lupa sa inugut, atawka tigkal andu lubun salkanin i kawlyan.
Adtalu ka i nangimbanal kami sa Allah andu su initulun nin salkami andu su initulun kanu Ibrahim andu su Ismail andu su Ishaaq andu su Ya'cob andu su kadakal nilan andu su kani Musa andu su kani Aisha andu su mga nabi abpun kanu kadnan nilan, sa dala ambibidayan na umani-isa sakanilan andu sakami na Muslim kami.
Andu su taw a salakaw i Agama nin sa Islam na di matalima salkanin (Allah) andu lusa Akhirat na nalapis sakanin.
Panun i katutulu nu Allah sa mga taw a mig-kafeer sa ulyan na kina-pangimbanal nilan andu pid-saksyan nilan su Rasul (Muhammad) na bantang andu napa-nanggitan silan sa mga mapayag, su Allah na dinin tutulun su mga taw a mga dupang.
Silan na yanilan balas na mulka nu Allah sakanilan andu su mga Malaa-ikah andu su langun nu mga taw.
Tatap silan kanu naraka, di silan pagkagan sa siksa andu di den silan pad-tulikan. (di silan i kalimu)
Nya tabiya na mid-tawbat sa ulyan na antu ba, andu mibpya-pya sa galbak, ka su Allah na pangampun a malimu
Na su mig-kafeer sa ulyan na kina-pangimbanal nilan, mawli na mid-singguman sa ka-kafeer, na di matalima i tawbat nilan andu silan i mga taw a nangatading.
Su mig-kafeer antu dan ba i inipatay nin (da den makad-tawbat) na dili matalima i isa sakanilan, (apiya) panun pan su lupa sa bulawan sa ipangon nilan sa ginawa nilan nasilan a mga taw na kanilan i siksa a masakit andu dala makad-tabang sakanilan.
Dili nu a benal makwa i surga, taman a dinu makam-baranggya su kapad kano kalilinyan nu andu apiya ngin den imbaranggyanu anggaga-isa na su Allah na katawanin i balas nsin.
Langun a pagkan na halal kanu mga tupo nu Isarel, ya tabiya na su ini-haram nu Israel kanu ginawa nin, sa dala pan makatulun su tawrat, adtalu ka sakanilan (Muhammad) I syanu su Tawrat ka batya nu amayka banal kanu.
Anten i taw ad-tatabwa nin su Allah sa kalbut sa ulyan antu na silan i mga taw a mga tading.
Adtalu ka (Muhammad) su Allah na benal su kadtalu nin, na unuti nu su Agama nu Ibrahim a bantang andu dikana sakanin Mushrik.
Banal a yadan paganay a walay a inibatad kanu mga taw na lu sa Makkah a Barakat andu tutulu kanu taw na dunya.
Nadalam lun i mga tanda (Ayat) a mapayag, su tinindagan nu Ibrahim andu su limudap lun na lapas andu wagib kanu taw i kag-kagi sa lalan sa Allah su pakagaga sa lalan andu su ag- kafeer ped-supak sa kanu kag-kagi na su Allah na kawasa sakanu dunya.
Adtalu ka (Muhammad) i sakanu a aden kitab nin (Yahudi-kristian) na ngintu ka padsangkan nu su mga ayatan nu Allah? na su Allah na kad-saksyan nin su mga galbak nu.
Adtalu ka (Muhammad) i sakanu a aden kitab nin (Yahudie- kristian) ngintu ka ipad-sapal nu su agama nu Allah kanu nangimbanal? Pangilayan nu sa tila nin su agama, na sakanu na katawan nu bun i banal andu dala sa Allah i limpangan nin su mga pang-galbakan nu.
Sakanu a mga Mu'min-amayka unutan nu su kapad kanu mga taw a inanggan sa kitab (Yahudi-kristian) na pambalinganan kanu nilan sa kafeer sa ulyan na kina-pangimbanal nu.
Andu panun i kapag-kafeer nu sa pambatyan salkanu su mga ayat nu Allah (Tanda nu Allah) andu nambun su sinugu nin, na su taw a kamalan nin su agama nu Allah na natutulu sa lalan a matidtu.
Sakanu a mga Mu'min ikagilk nu su Allah sa banal a gilak, andu dakanu abpatay ya tabiya na sya kanu matabo sa ula-ula a sinamangkup kanu. (sa Allah)
103 Andu kamali nu su agama nu Allah sa langun andu daka nu abpitas-pitas andu tadami nu su limo nu Allah salkanu, yanu ka aden na dikanu mamagayun, na pinapa-pamagayun nin su mga atay nu, na nabaluy kanu sabap kanu limu nin (a Islam) sa adsusulad kanu, na aden kanu sa sya kanu sa kanu bibil nu kalut sa naraka, na linipas kanu nin kanu kalut, mamba i kapab-payag nu Allah salkanu kanu mga ayat nin, ka malmu-lamu salkanu i matutulu kanu.
Pangadanan salkanu i sa tumpuk a mga taw a manganggat sa mapiya (Islam) andu sumugu sa kasugwan nu agama andu sumapal sa supak andu silan i mga taw a namaka-untung.
Andu daka nu miling kanu mga taw a dala pamagayun andu mimbida-bida silan kanu ulyan na kinawma nu mga mapayag sakanilan andu silan na adan sakanilan i siksa a masla.
Kanu gay a kagka-puti na mga biyas andu su kag-kaytam nu mga biyas, su migkaytem i mga biyas nin na adtalun sakanilan i mig- kafeer kanu sa kanu ulyan na kina-pangimbanal nu sa Allah, na nanami nu i siksa sabap sa kanu kinag-kafeer nu.
Andu su migka-puti i mga biyas nilan na dalam na limu nu Allah silan a dala dan kad-taman nin..
Su antu ba a nalabit na tanda nu Allah a pambatyan nami salka (Muhammad) na Haqq andu dala kyug nu Allah sa mad- talimbul nin i taw na dunya.
Andu kanu Allah i dalam nu mga langit andu su lupa andu lubun makam-balingan sa Allah i langun a pakarajan nin.
Sakanu a mga taw i mapya sa langun a nakambwat kanu mga manusya a pad-sugu kanu sa mapiya andu pad-sapal kanu sa supak andu bangimbanal kanu sa Allah andu umana bu ka nangimbanal su aden kitab nin(Yahudie-Kristian) nag-kapiya silan, kapad sakanilan i mangimbanal, ya madakal i Fasiq (nakaliyu sa inugut sa Allah).
Dikanu nilan kagkaydan, ya tabiya na lingasa andu amayka mabunu kanu nilan na maka-taligkud silan (malalaguy silan) mawli na dala sakanilan i katabangan silan.
Nakapalibat sakanilan su kalusak sa apiya andaw silan kasampanan, ya tabya na sabap kanu Agama nu Allah (amayka adan nabpasadan kanu Agama) andu su agama nu sinugu nin, andu nad-salangkatilan su lipungat abpun sa Allah andu nakalangkap sakanilan i kasangat, ka antu ba na sabap sa silan na pag-kafeer silan sa Allah atawka su mga ayatan nu Allah andu pamunun nilan i mga nabi sa dala kawagib nin, sabap sa kapad sakanilan na sinumupak andu silan na pad-tibaban nilan su inisapal sakanilan.
Di bun mamagidaan su mga Yahudi, adan sa tumpuk sakanilan i naka-tidto i lalan nin pambatyan nilan i mga ayatan nu Allah kanu kalanduwan nu magabi sa pad-sujud silan.
Bangimbanal silan sa Allah andu gay a mawli andu ipad-sugu nilan i mapya andu ipad-sapal nilan i supak andu pamagayasan nilan su (galbekan) a mga mapya andu silan i mga taw a mga saliheen.
Langun na panggulan nilan a mapya, na dili ma-awa sakanilan i balas nin andu su Allah na katawan nin su magilek.
Su mig-kafeer na di makangguna sakanilan su mga tamuk nilan andu su mga wata nilan kanu siksa nu Allah andu silan tigkwan sa naraka, silan na layun (di den makalyu) sa naraka.
Ya upaman na pam-baranggya sa tamuk nilan sa uyag-uyag sa dunya, na mana bun sambel a mabandasa nakasugat sa mga inawidan na mga taw a dinu pangilen i ginawa nilan, na naka-binasa su sambal andu dikana silan pad-talimbulu nu Allah, uged na sinalimbut nilan su ginawa nilan.
Sakanu a bamangimbenal dinu pambatadi sa mga masulan i dikana muslim (Yahudi- kristian andu su mga Munafiq sa silan i kaunutan saligan, atawka abpakatan) ka di kanu nilan talnan sa kabinasa nu andu yanilan mad-singani na kapasangan kanu, ka napayag su lipungat kanu mga ngali nilan andu nyapan masla i lusa kanu mga lalab nilan (a lipunget)na saben-sabenal a inipayag name salkanu i mga tanda amayka aden itungan nu.
Nan kanu den manem a kalilinyan nu silan, na dikanu nilan kalilinyan andu pangim-banal nu i mga kitab sa langun, (Taurat, Zabor, Injil endo Qur-an) amayka nawma kanu nilan na yanilan kad-talu na nangimbanal kami, amayka nalipus kanu nilan na inabut nilan i mga kamal nilan sa lipungat nilan salkanu adtalu ka (Muhammad) abpatay kanu den sa lipungat nu, ka su Allah na katawan nin su dalam nu mga lalab nu.
120 .Amayka mawma kanu na mapya na di nilan kasuwatan andu amayka masugat kanu na mapasang na magalaw silan, na ad- sabar kanu andu magilek kanu na dikanu nilan kag-kaydan sa apiya paydu, ka su Allah na langkap kanu langun nu galbak nu.
Andu su kinab-panay nengka gumanat (Muhammad)sa kanu kaluma nengka a bagatulan nengka su mga Mu'min sa kapem-bunwa (uhod), andu su Allah i maka-kinag a mataw.
Aden duwa lumpukan salkanu i natagu sa ginawa nilan i kalubay na ginawa (nagilkan) na su Allah i tinumuganul sakanilan, andu nangat sa Allah ipedsaligan nu mga Mu'min.
Andu saben-sabenal a tinabangan kanu nu Allah lusa Bad'r sa sekanu na paydu kanu, na ikagilak nu su Allah, ka malmu-lamu salkanu i makad-sukur kanu sa Allah.
Su kutika a padtalun nengka (Muhammad) kanu mga Mu'min i di pamun pakatalutup salkanu i tabang nu kadnan nu a talu ngibu a malaa-ikah a pad-tulun?.
Kana! ka amayka adsabar kanu andu magilak kanu, na makawma salkanu sa sagugunay i kambagal nu kadnan nu salkanu sa lima ngibu a mala-ikah a mid-tatanda langun a mig-kukuda.
Andu dala kinabaluy nu Allah sa antuba, ya tabiya na i kalilini nu andu makad-takana su mga atay nu andu dala tabang ya tabiya nabpun sa Allah a mapulu a mataw.
Ka andu nin matabpad su kaped kanu mga kafeer, (antu ba su namamatay sakanilan) atawka malidu i ginawa nilan na muli silan a mga malugkug.
Dala salka (Muhammad) i kyug, ka su Allah i mataw o pad- tawbatan nin silan amayka nag-islam, atawka siksan nin silan, ka silan na mga kafeer.
Andu kanu Allah su dalam nu mga langit andu su lupa, ampunan nin i mag-kahanda nin andu siksan nin i mag-kahanda nin andu su Allah i bangampun a malimu.
Hee sekanu atag nin bamaginugut da kanu pegkan sa iseg (riba), a takap tumakap andu ikagilak nu su Allah ka malmu-lamu salkanu i maka untong kanu.
Andu ikagilak nu su apuy, a inid-tatalanga kanu mga kafeer.
Andu paginuguti nu su Allah andu su sinugu nin ka kalu-kalu kanu makakalimu.
Andu pamagayasi nu su ampun abpun kanu kadnan nu andu su surga aya nin balawagan na mana kawlad na langit andu lupa ipad-tatalanga kanu mga magilak.
Atagin su silan antu a mga taw a pam-baranggya sa timpu na malwag- magaget andu di katusan i lipunget nin andu lat nin sa nanam su mga taw, su Allah na kalilinyan nin su mga mapya a mga taw.
Andu silan a mga taw na amayka nakang-galbek sa malat atawka na dupangan nilan i ginawa nilan, na tinademan nilan su Allah andu mapa-ampun kanu kadusan nin, na da bangampun sa mga kadusan ya tabya na su Allah andu dala nilan dayuna (tatapa) su galbek a malat a natawan nilan i malat besen.
Silan na ya nilan balas na ampun abpun sa kadnan nilan andu mga surga a ibpamamalagilay sa kababan nin su mga lawas na ig sa lalayun silan lu, andu ngen den a kapya nab alas I makwa nu minggalabek sa mga mapya.
137 Saben-sabenal a naypus i nawna salkanu a nanga-binasa (mga batalu) na andadalalakaw kanu sa lupa, ka ilay nu u panun i mawli (nang-gula) kanu napan-dalbut.
Nan su Qur-an, inipayag nin kanu mga taw, (makag-kapya-makabinasa) andu tutulu andu indawan kanu mga magilek sa Allah.
Andu dakanu agkalubay andu dakanu lumidu sa ginawa, ka sekanu i mapulu amayka mangimbenal kanu.
Upama ka gasugat kanu na pali, na gasugat bun silan sa magidsan bun andu su antu a mga gay na mamakad-zalyu bun kanu mga taw andu katawan nu Allah su mga bamaginugut andu baluyan nin salkanu i mga saheed andu su Allah na dinin kalinyan su mga kafeer.
Andu mapunas nu Allah su mga dusa nu mga bamaginugut, andu mabinasa nin su mga kafeer.
Ngintu gaantap nu i makaludep kanu sa surga, inunta na dala pan masabenal (mabatalo) su minjihad salkanu andu su midsabar salkanu.
Andu saben-sabenal a kapanganganay nu i kapatay paganay (saheed) sa dinu pan gawma (lusa uhod) na naylay nu den saguna sa pad-tulikan nu (dakano malalagoy).
Andu dala kanu (Muhammad) ya tabya na sinugu bu, naypus den i nauwa salkanin (a mga sinugu) minatay atawka nabunu, ambalingan kanu sa ka-kafeer, na su ambalingan sa ka-kafeer na dinin kagkaydan su Allah apya paydu andu balas nu Allah sa mga taw a mid-sukur.
Dala sa uman i napas (nyawa) i matay sa dikena kahanda nu Allah kanu kitab a binatadan,su taw a kyugan nin i balas sa dunya na inggay nami su balas andiu si kyugan nin i balas sa akhirat na inggay nami salkanin sa takap-tumakap andu balasan nami su bara-sukur.
Andu madakal a nabi i minamung salkanin i mga taw a madakal (kinambunwa) na dala silan agkalubay sa nakasugat sakanilan (batalu) sa lalan sa Allah andu dala silan ambaba sa satru andu su Allah na kalilinyan nin i mga bara-sabar.
Andu dala madtalu nilan, ya tabya na: kadnan nami ampun ka i mga dusa name andu su nakasagad sa pakaragyan nami andu tatap ka i mga ay nami ando tabangi kami kanu mga taw a mga kafeer.
Na binalasan nu Allah silan sa balas sya sa dunya andu mapya a balas lu sa Akhirat andu su Allah na kalilinyan nin su mga mapya.
Hee sekanu anan atag nin a namangimbenal amayka paginugutan nu su mga taw a kafir na pambalinganan kanu nilan sa kafeer, na yanu kab pawangan na lugi kanu.
Kana man na su Allah i ped-taldu salkanu andu sekanin i mapya gayd a pad-tabang.
Ibatad nami kanu mga atay nu mga kafeer i gilek sabap sa kina sakutu nilan kanu Allah, a dala inítulu nu Allah a tindeg nilan, (sa kaped sakutu nilan) andu ya nilan kad-takanan na apuy andu ngin den i kawag nin a pagkalbanan nu mga kafir.
Saben-sabenal a tinuman nu Allah su pasad nin salkanu a tabang (sa uhud) kanu kutika a pamunununsilan sa kahanda nu Allah,taman sa migkalubay kanu andu daka nu den pamagayun sa galbek andu sinungkangn nu so panduwan nu rasulullah sa ulyan na kinapaylay nu Allah salkanu sa kalilinyan nu, kaped salkanu i malilini sa dunya andu su kaped salkanu i myug sa Akhirat,mawli na pinasibay kanu nu Allah sa kanilan, ka pambatalun kanu nin andu linasam kanu nin andu su Allah tigkwan sa kalbihan sa kanu mga bamaginugut.
Su kutika abpapulu kanu sa palaw,(uhod) anu dala den balangyan nu apya sakataw bu, na su Rasulullah(Muhammad) na pad-tawagan kanu nin (sa kambalingan) sya sa ulyan nu, na binalasan kanu nu Allah sa bukol na ginawa (kasimpitan) ka andu di malido i ginawa nu kanu dala nu makwa andu su batalu salkanu, su Allah i mataw sa langun na pang-galbakan nu.
Mawli na pinatulu nin salkanu sa ulyan na bukola ginawa nu i kina-tana a kapag-katulug nu kaped salkanu (Tulatud) andu su kaped manem na natagu sa ginaawa nilan i baatil, ga-antap nilan su Allah sa dikena bantang, antapan nu Jahil, pad-talun nilan na mandagimbu ka aden lakitanu a kyug a apya paydu bu (di tanu makamaya ba) adtalu ka (Muhammad) i langun na pakaragyan na kanu Allah, pad-talun nilan pan sa ginawa nilan su di nilan ipab-payag salka, pad-talun nilan o aden bu kyug tanu na di tanu mabunu sya ba, adtalu ka (Muhammad) sakanilan i apya luka nu bun sa walay nu na matay kanu bun su bagi nin i mabunu, apya lu kano bagiganan andu pambatalun nu Allah su dalam nu laleb nu, andu pambinasan su dalam nu atay nu sa sasat na shaytan andu su Allah i mataw kanu daam nu mga laleb.
Su mga taw a nalalaguy salkanu sa kanu gay a kinad-sumbak nu duwa timan a lumpukan (sa uhud) na su nakapalaguy salkanu na sinasat na shaytan sabap kanu kapad a galbek nilan (galbekan a mawag) andu linasam nu Allah bun silan, ka su Allah na bangampun a malimu.
Hee sekanu anan atagin a bamaginugut daka nu anggula sa mana su mga a padtalun nilan kanu mga pagali nilan amayka linumalakaw silan sa dalpa,atawka ka pem-bunwa silan (pen-jihad su mga Mu'min) sa umana bu ka sya dan mun silan na di silan matay andu di silan mabunu, na pambalyan nu Allah into a ka-antangu atay nilan andu su Allah i bangi-matay andu banguyag, andu su Allah na gaylay nin su pang- galbakan nu.
Upama ka nabunu kanu sa lalan sa Allah atawka ka minatay kanu, na su ampun abpun sa Allah andu su limu, na nya pan mapya kanu palimuden nu sya sa dunya. (kakawasan)
Andu o minatay kanu atawka nabunu kanu na lu kanu bun tanan muli sa Allah.
Na sabap sa kanu limu nu Allah salka (Muhammad) na nakan-dalmaka sakanilan andu o mapasang kabu a matagas i atay nengka na mabukakal silan sa ambala-bala salka, na lasam ka silan andu ipangani nengka silan sa ampun andu ipagadaya nengka silan kanu pakaragyan, na amayka aden nag-kahanda nengka na salig ka sa Allah, ka benal na su Allah na kalilinyan nin su sinymalig salkanin. (Allah).
Upama tabangan kanu nu Allah na dala tumalaw salkanu andu amayka ibaba kanu nin na dala makad-tabang salkanu a lyu salkanin andu nangat sa Allah ipad-salig nu mga bamaginugut.
Andu dala sa nabi i lumingkaw sa ganiemah andu su lumingkaw na mapanang-gitan bun su liningkaw nin sa gay a mawli, mauli na sampulnan i balas na uman isa kanu galbakan nin, andu di silan mad-talimbul.
Dili magidsan su taw a tinuntul nin i kaswat nu Allah, kanu taw a nadsemak nin i lipunget nu Allah andu yanin kad-takanan na naraka (Jahannam) andu sangat i kawag nin a kawlyan.
Silan na aden pangkatan nilan sa Allah andu su Allah na gaylay nin i langun na pang-galbakan nilan.
Saben-sabenal a ini-kalimu nu Allah su mgabamaginugut ka pinambwat nin sakanilan i sinugu a bangsa nilan a pambatyan nin sakanilan i mga ayatan andu pad-suttin silan,andu pamandun nin silan sa kitab andu hukuman,na saben-sabenal sakanilan sa dala pan makambwati nu sinugu (Muhammad) na tading sa mapayag silan.
Ngintu ka uman kanu masugat na mapasang, a nakasugat bun salkanu i pagidsan nin, na adtalu nu andew i nya? (ngin i nya ba nakasugat salkitanu)adtalu ka (Muhammad) abpun bun sa ginawa nu, ka su Allah na langun na anggaga-isa na kagaga nin.
Andu su naka-sugat salkanu sa kano kinad-sumbak nu duwa a lumpukan (kinambunwa sa uhud) na kahanda nu Allah ka andu nin katawan su mga bamangimbenal.
Na andu nin katawan su mga munafiq andu pidtalu sakanilan i sya kanu ka ambunwa sa lalan sa Allah, atawka alawi nu i ginawa nu (ipaninindeg nu su ginawa nu), pidtalu nilan o katawan-nami bu i kambunwa na minunut kami den salkanu, silan a mga munafiq na sya silan masupeg sa ka-kafeer kumin sa pangimbenal, pedtalu silan sa ngali nilan na dikena lu sa mga atay nilan andu su Allah i labi a mataw kanu ibagama nilan.
Su mga taw a pidtalu nilan sa pagali nilan a bamagagayan bu (namba su dala unut) upama pina-ginugutan tanu nilan bu na di silan mabunu, adtalu ka (Muhammad) i alawi nu i ginawa nu sa kapatay amayka benal kanu.
Di nu bagantapa su nabunu sa lalan sa Allah sa minatay, kana ka bibyag silan lu sa kadnan nilan a pe-ridzkyan silan.
Andu gangagalaw silan kanu inenggay nu Allah sakanilan abpun kanu kalbihan nin andu papeg-kalilinin su mga Muslim a dala pan mamamatay(dala masaheed)a mawli sakanilan, sa di den kagilkan andu di den malidu i ginawa nilan.
Andu pag-kakalilinyan nilan su limu abpun sa Allah andu kalbihan andu su Allah na di nin dadagan i balas nu mga bamaginugut.
Antu ba su tinumalima sa Allah andu su sinugu nin sa ulyan na kinasugat sakanilan a pali, na kanu mibpya-pya sakanilan andu mim-baranggya sa Allah i balas a masla.
Antu ba su mga taw a pidtalwan silan na isa a taw(a Munafiq) sa langun na mga mushrik na min-didilimodan sa kabunu salkanu (mga Mu'min) na ikagilak nu silan,na makin naumanan su pangimbenal nilan sa (Allah) andu pidtalu nilan i sunAllah i tumyakap salkami andu mapya a tumiakap.
Na nakam-balingan silan sa limu abpun sa Allah andu kalbihan, dala nagedam nilan a mawag andu inunuta-nilan su kaswatan nu Allah andu su Allah tigkwan sa kalbihan a masla.
Antu ba a kadtalu na kana shaytan, papag-kagilkan nin su mga bamaginugut kanu ganga-unutan nu shaytan, na dinu silan pagkagilek, sakali nu ikagilek amayka Mu'min kano.
Di ka lumidu i ginawa nengka (Muhammad) kanu ya nilan pamagayasan i kag-kafeer, ka di nilan kagkaydan su Allah sa apya paydu, kyug nu Allah i dinin baluyan sakanilan i untong nilan sa gay a mawli, (dala pahala nilan sa kapeg-kafeer) andu sakanilan i siksa a masla.
Saben-sabenal su mga taw a inid-sambi nin su ka-kafeer kumin sa kapa-ngimbenal na di nilan kag-kaydan su Allah sa apya paydu andu sakanilan i siksa a sangat i kasakit nin.
Di antapan nu mga kafeer i kapya na gatamanan nilan antu ba i pakag-kapya sakanilan, ugayd a pab-peladayn (papen-dayan) silan sya sa dunya, ka andu kaumanan bun silan na dusa andu sakanilan i siksa a maka-palusak sakanilan.
Dala sa Allah i pasagadan nin su mga bamaginugut sa kanu kinad-simbul nu mga kafeer-munafiq- taman sa isanggay nu Allah su malat kanu mapya andu dala sa Allah ipalangawa nin (pasabotan nin) salkanu su gayb (dili gailay na mata) ugayd dala bamili su Allahkanu mga sinugu nin a mag-kahanda nin, na pangimbenal nu su Allah andu su sinugu nin andu amayka mangimbenal kanu andu magilek kanu,na lekanu i balas a masla.
Andu di antapan nu mga taw a padsingit nilan su inenggay nu Allah sakanilan abpun a kalbihan (makapya sa ginawa) intu ba i makag-kapya sakanilan, kena ka antu ba i makagkayd sakanilan, ibpagiket kanu lig nilan a mimbaluy a apuy sa gay a mawli andou kanu Allah a ka-warisan su mga langit andu su lupa andu su Allah na su pang-galbakan nu na katawan nin.
Saben-sabenal a nakine nu Allah su kadtalu nu midtalu (Yahudie)su Allah na faqeer andu sekitanu i kawasa, ipad- sulat nami su pidtalu nilan andu su kapamunu nilan sa mga nabi sa dala kawagib nin andu adtalun nami i nanami nu saguna su siksa a pakatutung.
Sabap intu kanu nawna a ping-galbek nu mga lima nu (mga mawag a pinggula) andu su Allah na di adtalimbul kanu mga ulipen nin.
Silan ba antu (Yahudie) na midtalu sa pib-pasad nu Allah salkami i di kami mangimbenal taman sa dinin makasya salkami i Qurban a pegkan na apuy, adtalu ka (Muhammad) i nakawma salkanu i mga sinugu a nawna salaki, sa mga mapayag i nait nilan (Tanda) andu namba pedtalun nu banan na ngintu ka pinamunu nu silan, amayka benal kanu?.
Na upama pinandalbut ka (Muhammad) na pinandalbut bun i mga sinugu a nawna salka, a naka-pananggit silan sa mga mapayag andu zabur andu kitab a masigay. (mapasigay sa kumamal lun).
Andu umanisa na makananam sa kapatay andu masampulna salkanu su mga balas nu sa gay a mawli, su nakatangka sa naraka, andu su iludep sa surga, na saben-sabenal a naka untung andu dala kabpaguyag sa dunya ya tabya na kawyag a makadulat.
Na mabatalu kanu sa mga tamuk nu, andu su ginawa nu andu makineg nu kanu mga taw a aden kitab nin a nawna salkanu (Yahudi-Kristian) andu su mga mushrik na makineg nu i lingasa a madakel andu amayka sabar kanu andu magilek kanu, na antu ba i pidtalu a kabagel a tindag sa mga pakaragyan. (bataluwan)
Andu labit ka (Muhammad) inamaruli su Allah sa pasad kanu mga taw a aden kitab nin (Yahudi-kristian) sa ipayag nilan sa kanu mga taw andu di ipagana (so kasugwan nu Allah andu su Rasulullah) na ini-baltek nilan sa taligkudan nilan andu pibpasa nilan sa alaga a paydu, na ngin den a kawagan na pinamasa. (Inisambi nilan su pasad nilan sa kanarakan).
D ika mantap (Muhammad)su mga taw a galilini gayd kanu inenggay sakanilan andu myug pamedtan sa dala nilan manggalbek, na dika mantap silan sa nalapas silan sa siksa, ka dala andu sakanilan i siksa a masakit.
Andu kanu Allah su pitu lapis a langit andu lupa andu su Allah na kagaga nin so anggaga-isa.
Saben-sabenal su kinabaluy kanu mga langit andu su lupa andu kaped-sukalyan nu magabi andu su malmag, na mga tanda (kapeg-kagaga nu Allah) kanu mga taw a aden ungangen nin.
Antu ba a mga taw na padtademan nilan su Allah sa tumindag-bagagayan, bagiga silan andu pamikiren nilan su kina-baluy nu Allah sa mga langit andu lupa, kadnan nami dala nengka pamaluya i nya ba sa Baatil (sa dala katagan nin, ka aden) mahasuti ka, dalindingi kami kano siksa apuy.
192 Huu, kadnan nami, su paludapan nengka sa naraka na saben-benal a pinagkaya nengka andu dala kanu mga kafeer i makad-tabang sakanilan.
Huu! kadnan nami, nakineg nami ibananawag (Muhammad) sa kapa-ngimbenal sa Allah, sa pangimbenal lu su kadanan nu, na ngimbenal kami, Huu! kadnan nami, ampun ka salkmi i mga dusa name andu punas ka su mga kawagan name andi i matay kami sa salta kanu mga mapya a mga taw.
194 Huu! kadnan nami, inggay nengka su pib-pasad nengka salkami kanu mga sinugu nengka (a pahala) andu di kami mapagkaya sa gay a mawli, ka seka su Allah a dika mapab-palis sa pasad.
Na tinalima nu Allah sakanilan su (dua nilan) sa diku tigin dadagen i galbak ku minggalbek salkanu babay-mama sabad salkanu su sabad, su mga taw a minawa sa dalpa nilan andu binugaw kanu mga dalpa nilan andu liningasa silan sa agama ku (nabensiyan silan sabap sa agama nu Allah) andu mimbunwa silan, andu nabunu, na punasan ko sakanilan su mga mawag nilan (Dusa nilan) andu paludapan ku silan kanu mga surga a pelagilay sa kababan i mga lawas na ig, balas intu abpun sa Allah andu su Allah na lubun salkanin i kapya na balas.
Daka (Muhammad) mabimban nu kaped- sugud nu mga kafeer sya sadalpa.
Ka paydu bu i kab-paguyag sya sa dunya, mawli na ya nilan kad-tamanan su Jahannam (naraka) andu ngin den i kawag nin a bagiganan.
198 .Ugayd da su mga taw a ini-kagilak nilan su kadnan nilan, na kanilan i mga surga a pelagilay i mga lawas na ig a dayun silan (tatap silan) a pedtumpan abpun sa Allah,(pag- kalbanan) andu su Allah i labi i kapya nin kanu mga taw a mga mapya.
Andu kaped kanu mga taw a inanggan sa kitab (Yahudi-kristian) i bangimbenal sa Allah andu su initulun salkanu andu su initulun sakanilan, a kagilkan silan sa Allah, di nilan pab-pasan su ayatan nu Allah sa alaga a paydu, silan na kanilan i balas nilan sa kadnan nilan, su Allah na mangagan gayd i kakukum nin.
200 .Hee sekanu atagin a bamaginugut adsabar kanu andu yanu pakadakel i sabar nu kanu mga kafeer andu ambantay kanu, (andyagan su dalpa nu mga muslim kanu kafeer a baminasa) andu ikagilak nu su Allah,ka malmu-lamu salkanu i maka untung kanu.
