Si Fir-awn na mib-papulu sya sa lupa andu binaluy nin su mga taw nin sa lumpuk-lumpuk, papeg-kapasangan nin su isa tumpuk, banumbalin nin i mga wata a mama, yanin baguyagen na mga babay, sekanin (Fir-awn) i isa kanu baminasa.
Inilham nami kanu ina ni Musa i pasusu ka, amayka kagilkan ka na idtug nengka sa lagat, na daka magilek andu dika lamidu i ginawa nengka, ka imbalingan nami bun selka andu baluwin nami abpun kanu mga sinugu.
Nasabet nu kadakel nu Fir-awn (su Musa) sa mabalu a satru nilan andu makalidu sa ginawa nilan, si Fir-awn andu si Haman andu su mga tantara nilan na nalimban silan.
Andu pidtalu nu kaluma ni Fir-awn i kalimu limu kanu bun a di nu bagimatay, ka basi makangguna salkita atawka amba-batanta taden, na silan na di nilan kagedam. (sa namba i makabinasa sakanilan)
Andu nangalingasa su ina nu Musa, paydu sama na madtalu nin i wata nin, o dikena bu tinegkes nami su pusung nin, ka andu makuyug kanu mga taw a bangimbenal.
Andu pidtalu nu (ina ni Musa) kanu suled nu Musa a babay i pangilay ka (su Musa) na nasandeng nin (su Musa) sa mawatan sa di katawan (o mga taw) i suled nu Musa.
Andu da nami pakalilini kanu (Musa) i makasusu kanu mga babay, pidtalu nu suled nin (a babay) i tutulun ku sekanu sa babay a basi nin susuwan sa taldun nin salkanu sa mapya andu pagungayan nin salkanu. (antu ba su ina nu Musa)
Imbalingan nami kani ina nin, ka andu mapya i ginawa nin andu di malido i ginawa nin andu nin katawan i pasad nu Allah na benal, ugayd na ya madakel sakanilan i di mga mataw.
Guna makasampay (umul nin) sa lagun a kanakan a mapya i kapagitung nin, na inenggay nami salkanin su unga-ngen andu kataw sa hukuman, ka mamba i kapembalas nami kanu mga taw a mga mapya.
Andu linudepan nin su dalpa sa waktu a ibangintana (napulidi senang) nawma nin i bagukag, su sakataw na tagapeda nin (sa agama), su sakataw na satru nin, napatabang su tagapeda nin salkanin kanu satru nin, na tinabangan nu (Musa) su tagapeda nin sa binatay nu Musa na minatay, yanin nadtalu na nya ba na kuyug sa galbekan na shaytan a satru a pedtading a mapayag.
Napitan sekanin (Musa) lu kanu dalpa sa bangandam andu bagangat o ngin i ulyan na kinapatay, na ngin pan ka su napatabang kagay n paped-tabang den manem, pid-talu nu Musa salkanin i darwaka ka sa mapayag.
Guna su pagkyugan nin pambetay su satru nin, na yanin pidtalu O Musa kyugan aku nengka den mimatay sa mana su kina-imatay nengka kagay?dala kahanda nengka (Musa) ya tabya na mameges ka sya sa lupa andu dikena ka basen papeg-kapya.
Andu nakawma i mama a nakabpun sa tadtab nu inged a bamagayas, tigin ni Musa namagumpung i mga taw sa kabunu nilan salka, na awa ka den, ka bagungayang ku seka.
Guna makawma sa kalut na ig sa Madyan, na nawman nin i mga taw a pabpaginum sa kambing andu aden duwa kataw a mga babay a padseg-seg sa kambing, tig nu Musa ngin i galbek ku sya? Tig nu mga babay: di nami pakapainum i kambing nami taman sa di pan makapasad i mga taw anan andu si ama nami na matwa den.
Pinainum nin sakanilan, mawli na lu mib-pawang sa masilung sa pidtalu nin: kadnan ku gagutem aku, na sya aku patumpa (pab-pawang) sa aden makan ku lun.
Nakawma su isa kanu mga babay sa gamamala, sa ya nin pidtalu na lu ka kun tig ni ama, ka pembalasang kanin sa kina pa-inumen ka kanu kambing nami, guna makawma andu napanudtul nin su nanggula nin, tig nu matwa (namba su Shuaib a nabi) daka magilek, ka nalepas ka den kanu mga taw a darwaka.
Tig nu ama nilan (Shuaib) kyugan ku a mag- kaluma nengka i sakataw sa mga wata ku a nya, sa (yanin sarat) tuganul ka i kambing anan sa walu lagun, amayka manem ka pengganapen nengka sa sapulu lagun na san den salka andu diku kyugan i kapasangan ka andu mabaratamu ako nengka bun o myug su Allah sa mapya aku a taw.
Guna masampay nu Musa su pasad na balalakaw silan kani kaluma nin, na aden na sandangan kanu palaw a apuy, tig nin kanu kaluma nin: sya kanu dumpan, ka aden naylay ku a apuy, bawangan ku ka basi aden tudtul atawka kumwa aku sa apuy a madsulu tanu atawka ipagegong.
Andu butawani ka i tungkaten ka anan, guna nin maylay a peng-gagalbek sa mana den nipay, tinangka nin sa tinumaligkud sa di den lumangi, (pidtalu salkanin) Hee Musa na daka kagilek, ka dala manggula nengka.
Iludepen ka i lima nengka kanu uyut nengka, ka lumyu maputi pagelin sa dala simbul nin andu kagkem ka i lima nengka (ka mawa su gilek nengka) ka dwa timan anan na tindeg nu abpun kanu kadnan nengka (na ipaylay nu) kani Fir-awn andu su kadakel nin, ka silan a mga taw na mga Fasiq. (nakalyu sa suguwan nu Allah)
Na suled ku a nya a si Harun na nya mapantas i dila nin salaki, na sekami dwa i mangay (kanu Fir-awn) makatabang salaki sa makabagel salaki, bangandam aku sa pan-dalbuten aku nilan.
Tig nu Allah: bagelen nami seka kanu suled nengka andu baluwin nami salkanu i tindeg sa dika nu nilan mawma sa malat sabap kanu mga tanda name andu sekanu dwa andu su bagumut salkanu i makatalaw sakanilan.
Guna makawma sakanilan su Musa sa (nakadtapik) sa mga tanda a mapayag, na ya nilan pidtalu na: nan a sihir sa inidtabu andu da nami makineg kanu mga kalukesan nami a nangawna.
Tig nu Musa su Allah i labi a mataw sa kanu naka- pananggit sa kanu tutulu abpun sa Allah andu katawan nu Allah antayn i mapya i ulyanan nin sa gay a mawli, ka di den maka-untung su mga darwaka.
Tig nu Fir-awn kanu kadakel nin: da natawan ku kadnan nu a salakaw salaki, seka Haman na adum ka sa lupa, ka umbali aku sa maligay a mapulu (malambeg) ka basi ku maylay i kadnan ni Musa, sabap sa bagantapen ku i pan-dalbut sekanin.
Andu inenggay nami kani Musa su kitab (Tawrat) sa ulyan na kinabinasan nu mga taw a nangawna sa maka-pasigay sapusong andu tutulu andu limu, ka malmu-lamu sakanilan i ma-indaw silan.
Ugayd na napambwat kami sa mga taw sa ulyan nu (Musa) a mga lando i umur nin andu dikena ka kaped sa taw na Madyan, ka pambatyan nengka su mga ayatan nami, ugayd na sakami i sinemugu kanu mga sinugu.
Andu dala ka lu sa takilidan na palaw kanu kina- tawag nami (kanu Musa) ugayd na limu abpun sa kadnan nengka (kinasugu salka) ka andu nengka kapa-kagilkan su mga taw kanu nakawma sakanilan a nawna salka, ka basi maka-tadem silan..
(Umana bu ka da nami seka sugwa) na amayka masugat silan na tyuba sabap kanu kawagan nu galbek nilan, na ya nilan adtalun na: upama nya baka aden sinugu nengka sya salkami a Rasul na unutan nami su ayatan nengka, na mabaluy kami a mga bamaginugut.
Guna makawma sakanilan su bantang (sinugu andu su Qur-an) na ya nilan kadtalu na: upama ka namba ka inenggan si (Muhammad) sa mana su inenggay kanu Musa anduken dikena nilan sinupak bun su inenggay kanu (Musa) a nawna? Ya nilan pidtalu na sihir -a midtabanga, (su Tawrat andu Qur-an) andu pidtalu nilan i sekami na langun nu pidtalu nu na supaken nami.
Amayka di ka nilan taliman na ya nilan bagunutan na su hawa-nafsu nilan, na dala nakalawan i kinatadin nin kanu taw a ya nin bagunutan su hawa-nafsu nin sa dala tutulu abpun sa Allah, su Allah na di nin tutulun su mga taw a darwaka.
Andu amayka batyan sakanilan (su Qur-an) na ya nilan madtalu na: nangimbenal kami sa benal abpun kanu kadnan nami, dapan makatulun na sinumangkup kami den.
Silan antu a mga taw na dwa takep i balas nin kanu kinad-sabar nilan andu bagalon nilan su mawag sa mapya andu su ped kanu ini-ridzki nami sakanilan na pem-baranggyan nilan sa Allah.
Andu amayka nakineg nilan i da katagan nin na taligkudan nilan, andu ya nilan kadtalu na: lekami den i lekami, lekanu den i lekanu, sajahatra salkanu, di nami kyugan i ka-jahilan.
Andu pidtalu nilan amayka munut kami salka kanu tutulu na pawang kami kanu dalpa nami, (tig nu Allah) binaluy nami salkanu su (Makkah) a tumatana kanu, a bananggitan sa ambalangan a unga na kayu, a ridzqi abpun salkami (Allah) ugayd na ya madakel sakanilan na di mataw.
Andu madakel den i bininasa nami a dalpa a madakel i ridzki nin, antu ba su mga dalpa nilan, na dala den kan-dalpay sa ulyan nilan-ya tabya na paydu bu (a mga taw) andu sekami (Allah) i mawaris kanu dalpa.
Andu dala kanu kadnan nengka i binasan nin i dalpa sa dipan makambwat i masla nin a sinugu, sa batyan sakanilan i ayatan nami, andu dala salkami i binasan nami i dalpa-ya tabya na dupang i taw nin.
Andu apiya ngin i inenggay salkanu na igka- kalilini nu bu sa kab-paguyag sa dunya andu kapalasan,su lu sa Allah na nya mapya andu nya gasama, na ngintu ka di kanu magungangen?.
Antayn i pibpasadan nami sa pasad a mapiya (surga) na mawma nin, sa mana bun su (pasad nami) kanu inenggan nami sa kalilinyan nin (a uyaguyag) sa dunya, mawli na lu sa gay a mauli na kuyug kanu ped-siksan. (su mga taw a nabimban sa dunya)
Pidtalu nu mga kangaunutan sa katadingan a paka- naraka (amayka siksan den) na: kadnan nami silan ba anan a pinasibay nami na dikena tinagel (sa sumibay silan) sa mana su kinasibay nami, mibpukas kami sakanilan salka (Allah) dikena kami paped-simba sakanilan.
Adtalun sakanilan i tawag nu su barahala nu, tinawag nilan na da silan makasawal (a barahala) andu naylay nilan su siksa, na o natutulu silan. (sya sa dunya na di silan masiksa)
Andu su kadnan nengka i bamaluy sa kahanda nin andukyugan nin, andu dala sakanilan (a mga kafeer) i kapamili, mahasutti su Allah kanu mga iped-sakutu nilan.
Andu sekanin su Allah a dala kadnan a salakaw salkanin andu lekanin su pugi sa dunya-Akhirat andu lekanin i hukuman andu lubun makam- balingan salkanin. (Allah)
Adtalu ka sakanilan sa o baluwin nu Alllah salkanu su magabi sa dayun sa dayun taman sa gay a mawli, na antayn i kadnan a salakaw sa Allah a maka- pambwat sa malinawag? na di nu gakineg?.
Nadtaloka o baluwino Allah salkano so malmag sa da den magabi taman sa gay a mauli, na entaini kadnan a salakaw sa Allah a mapam-buat salkano sa magabi a makateleng kano? Na nginto dino gailay so mga tandano Allah?.
73 Andu limu nin salkanu su magabi andu malmag, a maka-talen kanu (sa magabi) andu makapangilay kanu sa limu nin (sa malmag) ka makad-sukur kanu. (sa Allah)
Andu pinam-bwat nami kanu uman i ummat i saksi nilan (su mga nabi nilan) na adtalun nami: I sya nu su tindeg nu, na natawan nilan su Allah i (tindeg) a bantang andu natadin sakanilan su langun nu ipadtabu nilan. (kanu Allah)
Saben-sabenal kani harun na kaped kanu taw nu Musa na mig-kafeer sakanilan andu inenggan nami sa mga ginadung a tamuk, su mga gunsi na mga tamuk nin na kawgatan i mga taw a madakel a mabagel, pidtalu nu mga taw nin: sa daka kagalaw (Qarun) (pemamasla sa kadakel na tamuk) ka di kaswatan nu Allah su kagalaw (a kamamasla).
Andi ituntuteng ka so inenggyan nu Allah salka (a tamuk) sa balas sa Akhirat andu dika lumimpangi su umun nengka sa dunya andu abpya-pya ka, sabap sa pibpya-pyanan ka nu Allah andu daka panggula sa makabinasa sya sa lupa, ka su Allah na di nin kaswatan i kabinasan.
Ya pidtalu nu (Qarun) tamuk ku a nya na sabap bun sa kataw ko (i kinakwa ku lun) ngintu di nin katawan i saben-sabenal su Allah na bininasa nin su nawna pan salkanin a mga taw a muna pan salkanin i kabagel nin? Andu nya pan madakel salkanin i bilangan nin? Andu di bagidsan nu Allah kanu kadusan nin (amayka tyuban den silan)
Linamyu (si Qarun) kanu mga taw nin sa masla i pib-palas nin (midsandag), ya nadtalu nu (mga taw) a aden kyug nin sa dunya na: nya ba ka aden bu lekitanu a mamba sa kani Qarun, ka sekanin a taw (Qarun) na sangat i kapya na bagi nin a masla.
Ya nadtalu nu aden ilmu nin na: da kanu pegkuman, ka su balas nu Allah kanu nangimbenal andu ming-galbek sa mapya na muna pan i kapya nin, na dala makakwa lun o dikena (mga taw) a midsabar.
Na tinampulan nami (si Qarun) andu su walay nin sa lupa, na dala salkanin i kadakel a makatabang salkanin a salakaw sa Allah andu dala den makuyug sa tabangan.
Nabaluy manem su padsakel (kani Qarun) kagay sa nadtalu nilan i benal su Allah a kalaganin (pakawladen nin) sa ridzki su mag-kahanda nin kanu mga ulipen nin andu kasimpitan su kahanda nin, o dikena bu ini-kalimu tanu nu Allah na makamung tanu (kani Qarun) andu di den maka-untung su mga kafeer. (lu sa gay a mawli)
Su surga sa gay a mawli na baluwin nami a kanu mga taw a dala sa ginawa nilan i kab-papulu andu dala sa kanilan i maka-binasa, nya bun mapya i mawli nin su mga gilek sa Allah.
Su taw a mapya i napa-nanggit nin (sa gay a mawli) na sawalu bu na nya pan mapya i balas nin (sa kanu nait nin) andu su malat manem i nait nin na dala balas nu mga taw a ming-galbek sa malat ya tabya na malat bun.
(Su Allah) na initulun nin salka (Muhammad) su Qur-an, na pambalinganen kanin bun sa (sa Makkah) adtaluka su kadnan ku i mataw sa nakait sa tutulu andu su taw a natadin sa mapayag.
Dikena nengka napagingarap i makatulun salka (Muhammad) su kitab (Qur-an) nya tabya na limu abpun sa kadnan nengka, na daka anggula sa tumabang ka sa kanu mga kafeer.
Andu daka mapasapal (sa kapayapat) kanu mga ayatan nu Allah sa ulyan na kinatulun nin salka andu pangenggat ka lu sa Allah andu daka bu anggula sa makuyug ka kanu mga Mushrik.
Andu daka sumimba sa aden pan kaped nu Allah, ka dala kadnan ya tabya na sekanin, langun nu anggaga-isa na gadala ya tabya na su pamenengan nu Allah lekanin i hukuman andu lukanobon makambalingan salkanin.
