Su babay andu mama a midsina na betay nu i umani-isa sa magatos a lebpad, dakanu su lumasam kanu Agama nu Allah,(sa dinu ikukum) amayka bangimbenal kanu sa Allah andu gay a mawli, andu padsaksyan su kabetay kanilan kanu lumpun kanu mga Mu'min.
Su midsina a mama naya ipagkaluma lun na babay a midsina bun atawa babay a Mushrik, su babay a midsina na yamenem ipagkaluma lun na midsina a mama atawa mama a mushrik, ka haram kanu mga Mu'min.
Su mga taw a pedsenditan (pedtetebwan) nilan su mga babay a mapiya- sa dala saksi nilan a pat kataw na betay nu silan sa walu pulo a betay (su pedtetebo) andu di nu tumalima i saksi nilan sa apiya ngin pan, ka silan na nakalyu kanu libunu agama silan.
Su mga taw a pedsenditan nilan i kalumanilan sa midsina a dala saksi nilan a lyu sa ginawa nilan-na makadsapa su mama sa makapat a sapa nin sa Allah (kasangulanu bangukum) sa benal sekanin kanu pedtalonin.
Benal na su mga taw menem a tagapedanu bun silan, sa kalbotan bo i bityala nilan, na dinu bagantapa i makagkaid salkanu, umani-isa na kadusan i nakua nin(kanu ipedtetebo) andu su minukakal sa entuba a bityala (Abdullah bin Ubayya) na lekanin i siksa a masla.
Entuba ka kinakinegu lonu ka yabu initagu sa ginawa n babay-mama a Mu'min i mapiya, (di silan malityala) andu ya nilan pidtalo na bityala inan a kalbotan a mapayag.
Kagina banabetenu dilanu i kalbutan, na pedtalunu kanu mga ngali nu i dala sabutin lon (namba su kinadtetebu kan Aisha a kaloma nu Rasulullah) andu ya nu kataw na malamu, na lusa Allah na sangat i kasla nin.
Su mga taw a myog sa makapayapat su maledsik a bityala kanu mga Mu'min na kanilan i siksa a masakit sya sa dunya andu lu sa Akhirat, su Allah i mataw kanu dinu katawan.
Sekanu a mga Mu'min dinu pedtuntola su mga sangkadu mga shaitan, su temuntul kanu mga sangkado mga shaitan na yanin ipedsugo na mga maledsik andu su ka-ungkir, o dikena bu su kalbihanu Allah salkanu andu su limu nin (na tyuban kanu den) na dala masutie salkanu apiya sakataw bo, ugayda su Allah ipedsutie kanu mag-kahandanin andu pakakineg sekanin a mataw.
Andu di edsapa su aden tamukin andu su makalagi gatamananin sa dini enggan i pagalinin, andu su mga miskinan andu su mga Muhajireen sa lalan sa Allah, andu amponen silan andu tigkelan silan, nginto dinukalilinyan i amponeng kanu nu Allah? andu su Allah i bangampon a malimo.
Su mga taw adtebuan nilan su mga babay sa dala kiyogilan sa kadsina a mga Mu'min, na su pedtetebo na namulkan sa dunya akhirat, andu kanilan i siksa a masla.
Su babay a maledsika na kanu mama a maledsik, su mga mama maledsik na kanu mga babay a maledsik, su mapiya a babay na kanu mga mapiya a mga mama, andu su mga mapiya a mama na kanu mga mapiya a mga babay, na lepas silan kanu mga pedtalonilan (a pakabinasa) kanilan su ampun andu ridzqi a mapulo a mapiya.
Sekan a mga Mu'min dakanu lemudep kanuumga walay a dikenanu mga walay, taman sa dikanu maka-pagetaw andu ma-salam nu su taw nin, ka entuba i makag-kapiya salkanu, ka malmo salkanu i ma-indaw kan.
Amayka dala taw nin su mga walay na dakanu lemodep, taman sa dikanu sugotan, amayka ya pidtalo i uli kanu na uli kanu, ka entoba i makasutie salkanu, andu su Allah na katawanin i languna peng-galbekenu.
Edtaloka (Muhammad) kanu mga Mu'min a mga mama i pempenen nilan i kadtulik andu tuldon nilan su mga sangulan nilan, ka namba i makasutie kanilan, su Allah na katawanin i languna penggolan nilan.
Edtaluka (Muhammad) kanu mga Mu'min a mga babay i pempenen nilan i kadtulikilan, andu tyakapan nilan i mga sangulan nilan andu di nilan ipayag i pagigimuan nilan, ya tabiya na biyas andu duwa a lima, andu di nilan ipayag su mga imo nilan, ya tabiya na kaluma nilan atawa lukes nilan atawa mga lukes nu kaluma nilan atawa su mga wata nilan atawa ka mga wata nu kaluma nilan, atawa mga suled nilan, atawa mga wata nu suled nilan a mga mama, atawa wata nu suldilan a mga babay, atawa ka silan a mga babay atawa su kamilikan nilan, atawa ka su mga wata a bagunut kanilan a dala pan kiyugin sa babay a mga mama, atawa ka su mga manot a mga wata a dala pan nadsulimanin kanu awrat nu mga babay, andu di silan embagel sa kasangkadilan kanu mga ay nilan ka katawan su uninu pagigimuan nilan (singkil) andu edtawbat kanu tanan sekanu a mga Mu'min, ka malmu-lemu salkanu i makauntong kanu sa dunya- akhirat.
Pag-kalumanu su dala kaluma nin salkanu, andu su mga Salih kanu mga mama a pedsugunu atawa mga babay, ka upama ka Faqeer silan na pag-kakawasan bun o Allah kanu limo nin, andu su Allah na makalag i limo nin a mataw.
Andu tumigkel menem su taw a dala pan ibangaloma nin,taman sa enggan bun silan nu Allah sa kalbihanin, andu su mga ulipen a bangeni silan kasulatan (sa makandaludaya silan) na sugutinu silan amayka aden natawan nu kanilan a kapiyanan, andu engginu silan kanu tamuku Allah a inenggay nin salkanu, andu dinu pedtegela su mga ulipenu sa kad-zina-ka yanilan kiyogan na di kadzina (sutie silan) pegkiyog kanu sa kabimbanan sa kabpaguyag sa dunya? su (taw) a pegesenin su ulipenin (sa kagkiyuga atawa papamayadan) na su Allah sa ulyan na kinapeges lun na ampunenin ikalimu nin. (s babay a pineges)
Saben-sabenal a initulon nami salkanu su mga ayat a mapayag, andu upaman kanu mga taw a nangaipos a nauna salkanu, andu indawan kanu mga taw a magilek sa Allah.
Su Allah i papedsigay kanu pitu lapis a langit andu lupa, ya upamanu sigay nin na tungkup a nakadalemon i palitan, su palitan na nakadalem lon sa katya, su katya anto na mana bun biton a peg-kinggat a belalegan sa kayu a barakat (kayu a Zaiton) sa dikena sebangan a dikena sedepan, nya sama kanu lalanin i makalayao sa apiya dapan makembila apoy, ka sigay a nanget kanu sigay, itutulunu Allah su sigay nin kanu mag- kahandanin, andu ibagenggainu Allah su mga upaman kanu mga taw, katawan nu Allah i languna enggaga-isa.
Nu mga mama a di silan gasimpango kapendagang, andu kabpasay sa tadem sa Allah andu kadsambayang-kadzakat, kagilkan silan kanu gay a kumegkel su mga atay andu gapansi su mga kailay (mata)
Andu kabalasan sila nu Allah sa mapiya pan kanu ping-galbekilan, andu bagumananin silan kanu kalbihan, su Allah i peridzqi sa mag-kahandanin sa di magkila-kila.
Su mga kafir menem na su galbekilan na mana ig a gasandeng sya sa malinawag, ga-antapo pakainum sa ig (i makainum) taman sa u naumanin na dala besen i gin, andu yanin naparoli na siksa salkanin lusa Allah, ka nauna sa dunya i balasin, andu su Allah na mangagan i kukumanin.
Atawa ka mana su mga maliboteng sa lagat sa midtatalapis I bagel sa pulo nin, su bagel a kaduwa na lusa pulu nin i dadtem a malibuteng a midtatalapis, u paliunu bangilay su lima nin na dinin mailay sa kaliboténgin, su taw a dala den enggay nu Allah sa sigay na dala katuntulin sa lalan a matidto.
Nginto di katawan i ped-tasbih sa Allah su dalemu mga langit andu su lupa andu su papanuk? Pembelatenin i papakin, umani-isa na natawan nu Allah i tasbihin andu sambayangin, andu su Allah i mataw sa langun nu peng-galbeken nilan.
Nginto dinu gailay I kaped-sesengu Allah kanu gabun? mauli na pinadtimonin, mauli na baluy nin a migkakapal, na ludemba su ulan a belyu kanu pamageltan, andu paped-tulunenin ebpon sa langit I mga wato a ilo atawa kilat, na masugatin su kahandanu Allah andu makasibay kanu pig-kahandanin, paidu gayd kanu katinangin (su kilat) na maling den su kailay.
Su Allah i minaloy kanu langun nu malanap-lanap abpun sa ig na kaped na yanin ibelalakaw na tiyanin, aden bun yanin ibelalakaw na ay nin a duwa, andu aden bun belalakaw sa pat timan a ay nin, pembaluwinu Allah kanu langunu enggaga-isa na gagaga nin.
Andu pedtalun nu mga Munafiq- nangimbenal kami sa Allah andu su sinugo, andu pinaginugotan nami, mauli na su ped kanilan i menda sa ulyan anto, na dikena benal a Mu'min su minenda kanilan
Nakadalem kanu atay nilan I dalu, ugayda panduwa-duwa silan, andu kagilkan silan sa edtalimbulen nu Allah silan andu su sinugu nin, ugayda ya benal na silan i mga talimbulen.
Benal su mga Mu'min na yanilan kadtalu amayka enggaten silan sa hukuman nu Allah andu su sinugu nin, ka andu makukum silan na tigilan nakineg nami andu naginugot kami, andu silan i nama-kauntong.
Andu midsapa silan sa Allah kanu pangimbenal nilan a dikena benal, amayka sinugo nengka silan sa kan-jihad na munut silan, edtaluka (Muhammad) i dakanu pedsapa, ka su inugot kanu Rasul i mapiya kanu kadsapa a dikena benal, su Allah na katawanin i languna galbekan nu.
Edtaloka (Muhammad) i paginuguti nu su Allah, andu paginuguti nu su sinugo nin, amayka menda silan-na yabu wagib salkanin su kaped-sampay, ya menem wagib salkanu na kapaginugut, andu amayka paginugutanu na matutulo kanu, andu dala kanu sinugo ya tabya na kapa-pedsampay sa mapayag.
Inib-pasadu Allah kanu mga Mu'min salkanu andu ming-galbek sa mga mapiya i pasambin silan a kumamal sya sa lupa sa mana bun kina-pasambi nin kanu mga Mu'min a nangauna sa kanilan, andu pandayanin kanilan su agama nilan, antu ba i nasuwatanin kanilan, andu sambyanin su gilekilan sa makatana silan, simban aku nilan andu di aku nilan sakutun sa apiya paydo, na su egkafir sa ulyana entoba na silan i mga taw a nakalyu kanu agama.
Sekanu a mga Mu'min- magetaw sa kaludepin su banunugunu andu su mga wata a dala pan sabutin sa pidtalo a babay sya kanu timpu a telu (ika-isa) na di pan makad-sambayang sa subboh, (kaduwa) na amayka ulyan na Duhor sabap sa migkawas-kawas kanu ka pedteleng kanu, (ka-telo) na ulyana sambayang na Eisa, dala bun kadusanu andu silan sa lemudep silan sa di magetaw amayka salakaw sa namba a mga waqto, ka banunugunu silan, mamba i kapeb-payago Allah salkanu kanu mga ayatanin, andu su Allah i mataw sa languna binaluwinin.
Andu amayka mabalig den su mga wata nu (babay-mama) na magetaw den silan sa mana bun su kapagetaw nu dikena taw na walay, mamba i kapeb-payagu Allah salkanu kanu mga ayatanin, andu su Allah i mataw sa languna binaluwinin.
Su mga babay a di pembata atawa di ga- haid a dala den kiyogin sa kag-kaloma na dala dusa nilan sa luwasen nilan su balegkas sa dikena bun peb-payangasen, andu di silan edzugud-zugud sa mapayag su bagigimuwan nilan, andu su di nilan kaluwas na muna i kapiya nin, andu su Allah i pakakineg andu mataw.
Dala dusa nu pisek andu su tyolod (sadil) andu su pen-dalu andu taman sa ginawanu i keman sya kanu mga walay nu atawa walay nu mga lukesu atawa walay nu mga lukesu a mga babay, atawa mga walay na suled nu a mama, atawa mga suledo a mga babay, atawa ka mga walay nu mga bapa sa ama atawa babo sa ama, atawa bapa nu sa ina atawa mga babo nu sa ina, atawa ka su ped-saliganu sa gunsi atawa su pakato, dala bun dusanu sa keman kanu langon atawa mad-tumpok kanu, amayka lemudep kanu sa walay nu na za-salama kanu sa kanu ginawanu abpun sa Allah a barakat a mapiya, mamba i kapeb-payagu Allah salkanu kanu mga ayatanin ka malmo-lemo salkanu i maka-pagungangen kanu.
Ya tidto a Mu'min na mangimbenal sa Allah andu su sinugu nin, andu amayka san silan salka (Muhammad) kanu galbek a masla (pembibityala) na di silan gumanat sa taman sa di silan maka- pagetaw salka, na silan i benal a bangimbenal sa Allah andu su sinugo nin, na amayka nagetaw silan salka (Muhammad) kanu peg-kahandan nilan na sugotika su entaini pegkiyugan nengka kanilan, andu ipangeni nengka silan sa ampon, ka su Allah na bangampun a malimu.
Di nu pedtawaga su Rasul (Muhammad) kanu pamageltanu sa mana su kad- tatawagay nu, saben-sabenal a katawan bun nu Allah silan a baningen belyo sa masgid sa zakataw-zakataw, na mingat su mga taw a ibida nilan i kanilan kanu suguwanu Rasul, ka masugat silan a fitnah atawa masugat silan a siksa a masakit.
Saben-sabenal a kanu Allah i dalem u pitu lapis a langit andu su lupa, andu saben- sabenal a katawanin i nakadalem kanu atay (ka-munafiq-bangimbenal) andu su gay a kauli nilan sa Allah na inggay nin kanilan su balasu mga galbekilan, su Allah na kanu langunu enggaga- isa na katawanin.
