Alif Lam, Mim, su Alla bu i mataw kanu ma’ana nin.
Su antu ba a kitab- (Quran) na dala kanduwa-duwa nin, abpun kanu Allah, nakadalem (sa Qur-an) su tutulu kanu mga taw a magilek sa Allah.
Silan antu atagin a mga taw na bangimbenalen nilan su dala maylay nu mata nilan, (surga, naraka) andu iped-tunay nilan su sambayang andu su ini-ridzqi nami kanilan na pem-baranggiyan nilan.
Silan a mga taw a bangimbanalen nilan su nakatulun saleka (Muhammad), andu su nakatulun a nawna pan saleka, ando su gay a mauli na di gapinda kanu atay nilan.
Silan antu a mga taw na nakad-timamel silan kanu tutulu abpun kanu kadenan nilan, nandu silan ba i mga taw a nakauntung sa masla. (sa dunya-akhirat)
Saben-sabenal su silan a mga kafir na magidsan pan i panging-gilken silan atawa ka dili, na dibun mangimbenal. (kanu langun a napananggit nengka abpun kanu Allah).
Tinutupan nu Allah su atay nilan andu su tangila nilan andu su kailay nilan, kanilan den su siksa a sangat a masla.
Su ped kanu mga taw-na ped-talun nilan i nangimbenal kami sa Allah andu su gay a mawli, na dikena benal a bangimbenal silan.
Bagakalan nilan bu su Allah andu su mga bamaginugut, dala gapagakalan nilan a salakaw kanu ginawa nilan, uged na di nilan kagedam.
Nakadalem kanu pamusungan (nu mga munafiq) i sakit (kamunafiq), na bagumanan nu Allah sa kanilan i namba a sakit, andu kanilan su siksa a malipedes sabap kano kapendalbut nilan.
Amayka ped-talun kanilan i da kanu baminasa kanu dalpa, ya nilan kadtalu-na sekami na pagkapiya kami.
(tig nu Allah) saben-sabenal a silan a mga taw i pakabinasa, uged na di nilan kagedam i ya nilan bun na gabinasa na su ginawa nilan.
Amayka pidtalo kanilan i pangimbenal kanu sa mana su kina pangimbenal nu mga taw, ya nilan kadtalu anduken ka pakapangimbenal kami sa mamba sa mga taw a dala ugangenin, (di mataw), silan i dala ungangen nin, uged na dili nilan katawan.
Namba a mga taw na amayka makad-talabuka nin su mga bamaginugut, ya nilan pedtalun na nagibenal kami bun, amayka makalu silan kanu kanga-unutan nilan, ya nilan pedtalun na seki-sekitanu bun, bagungaten nami bu silan.
Su Allah i bagungat kanilan andu papen-daya kanilan, sa dala maylay nilan a mawag/malat , atawka dala makineg nilan ka mapiya den langun.
Silan a mga taw na inid-sambi nilan su katadinan sa tutulu, dala silan maka-untung kanu dagangan nilan, andu dala den silan matutulu.
Mana bun silan pembyag sa apuy, guna belandab kanu embala-bala sa kanilan- na iyaawa nu Allah su sigay nin, sya den, silan matagu kanu malibuteng sa di den silan makailey.
Silan a mga taw a bisu, maw, pisek silan, na silan na dala kanilan i kambalingan sa bantang.
Ataw ka ya upaman nu antu a mga taw, na dad-tem abpun sa langit, a nadalem lun i malibuteng andu palti andu kilat, ibetad nilan su mga lima nilan sya kanu mga tangila nilan (endo di nilan makineg) sabap kanu kilat, kagilekan sa kapatay- su Allah na langkap kanu mga sinumupak.
Paydu bu geyd i di kaped-sayab nu kilat kanu kapeg-kailay nilan, uman kalinawagan silan nu kilat na lumalakaw menem silan, amayka nalibutangan silan na makatindeg menem silan, umana bu ka pigkahandan nu Allahu i ma-awa su kakineg nilan, kailay nilan, Sabena-sabenal su Allah na agkagaga nin i langun nu anggaga-isa.
Sekanu a mga taw, simba nu su kadenan a minaluy salkanu, andu minaluy kanu mga taw a nangawna salekanu, malmu-lamu salekanu i kagilek nu salekanin a Allah.
Atagin su Allah i minaluy salekanu kanu lupa a nakabelat andu pimbalay nin salekanu su langit andu pinatulun nin salekanu su ulan a pinambuat nin i mga unga a ridzqi nu, da kanu mangumbal sa ikaduwa nu Allah a ped-simban, ka sekanu katawan nu bun i isa bu su Allah a ped-simban.
Andu umengka ka peduwa-duwa kanu (Arab, Yahudie, Kristianu) kanu initulun nami (a Qur-an) kanu ulipen nami (Muhammad) na pambwat kanu sa satiman bu a ayat a pagidsan nin andu pad-saksi kanu, amayka benal kanu.
Amayka dinu magaga, na dala man salekanu i kagaga nu lun, na ikagilek nu su apuy sa nya ibalaleg na mga kafir andu su mga watu (barahala) nilan, inidtatalanga intu kanu mga kafeer.
Pakalilini ka (Muhammad) su mga taw a bamaginugut a ming-galbek silan sa mapiya, aden kanilan i surga a pelagilay sa kababan nin i mga lawas a ig, uman silan inggan sa rizqi a mga unga na kayu na ya nilan madtalu na mambumba su nawna antu a nakawma salekitanu, kagina magidsan i palas na embidaya sa nanam andu aden pan mga kaluma nilan lusa surga a mga sutti, andu silan a mga taw na di den silan makalyu sa surga.
Saben-sabenal su Allah na di nin i-kaya i kapangupama nin, apiya pan mana bu tagenek, su mga bamaginugut na katawan nilan su Haqq (bantang) na abpun kanu Allah, su mga kafeer manem na ya nilan kadtalu, ngin i kahanda nu Allah sa namba a upaman? Sa pakatadin sa madakel a pakatutulu bun sa madakel, na dala gatadin ya tabya na su mga taw a Faasiq. (nakalyu sa Islam)
Atagin su silan antu a mga taw na binaluba nilan (da nilan tumana) su pasad sa Allah sa ulyan na kina-palut nin andu ped-tebpeden nilan su ini-sugu nu Allah a tuganulen i kapad susumpat lun, (su kadsusuled) andu baminasa silan kanu dalpa sa ambalangan na kadarwakan, antu ba i mga taw a nangalugi.
Panun i kaped supak nu sa kanu Allah a nya nu kaaden na mga minatay kanu, inuyag kanu nin sya sa (dunya) mawli na imatayan kanu nin, mawli na uyagen kanu manem kanu ka-bangkit sa dunya, mawli na lu kanu langun makambalingan salekanin. (Allah)
Sekanin a (Allah) i minaluy salekanu kanu langun a dalem nu lupa, mawli na migkahanda lu sa langit, binaluy nin manem su pitu lapis a langit, sekanin (su Allah) kanu langun nu anggaga-isa na katawanin.
Kanu kutika antu a pidtalu nu kadenan ngka (Muhammad) kanu mga Malaa-ikah sa mamaluy ako sya sa lupa sa khalifah (bangsa manusya), ya pidtalu nu mga Malaaikah, anduken ka pamaluy kapan sa manusya a andupang bu sya sa lupa andu mapatuga silan sa lugu? Sekami (Malaa-ikat) na ped-tas-bih kami a pabpugi salka andu ped-sutin nami seka, ya pidtalu (nu Allah) na saki i mataw sa langun na di nu katawan.
Pinakatawan (nu Allah) kanu Adam su langun nu mga ngala, mawli na ini-adul (inidza) manem kanu mga Malaa-ikah sa bed-tuwi nu sa mga ngala i namba amayka benal kanu.
Ya nad-talu nu mga Malaa-ikah Mahasuti ka a Kadenan nami dala katawan nami, ya tabya na su pinatuntay nengka salekami, seka i kadenan nami a mapulo a mataw mapambetad kanu binaluy nin.
Pidtalu (nu Allah) kanu Adam- adtalu ka kanilan i langun na namba i mga ingala nin, guna madtalu nu Adam i mga ngala nin na nya pidtalu (nu Allah) dikana ba pid-talu ko salekanu i saki ba i mataw kanu dala pan mawma andu di gaylay sya sa langit andu lupa, andu katawan ku pan su langun na ipebpayag andu su ibagema nu.
Andu pidtalu nami kanu mga Malaikah, i sujudi nu si Adam, sinumujud su langun a Malaa-ikah, ya tabiya a dala sujud na su Iblis, mibpalaw andu mimamasala, nabaluy sekanin kaped kanu mga mga kafeer.
35 (tigu Allah) Pidtalu nami kani Adam andu su kaluma nin i tana kanu den sya sa surga, pangang-kan kanu sa andaw i kiyug nu, di nu padsikani i nya ba a kayu, ka mabaluy kanu sa makuyug kanu mga taw a mga dupang.
Sinasat silan nu mga shaitan, inapas nin sa makalyu silan sa surga, sa mana bun su kinalyu nilan, pidtalu nami kani Adam andu su kaluma nin i ambaba kanu lusa lupa, a mamagukag kanu bu.
Aden bun kadtakana nu lu sa lupa andu kagkakalilinyan nu sa taman sa dikanu makaganat sa dunya.
Pidtalu nami langun nu ambaba kanu abpun sa surga, ka makawma bun salakanu su tutulu ko, anteyn i taw a tuntulan nin su tutulu ko, na dala gilak nin sa kanarakah andu dili malidu i ginawa nin kanu kaganat nin. (kapatay nin)
Su silan a mga taw a supak andu pinandalbut nilan su ayatan nami na silan su mga taw a tigwan kanu narakah sa dala den kapegkalyu nilan.
Sakanu a tupo nu mga Israel na tadami nu su limu ko. Ini-kalimu ko sakanu andu tuman nu su pasad nu, ka tumanan ku su pasad ku salakanu, ando saki (Allah) i pangandam nu.
Andu pangimbanal nu su initulun ku a (Qur-an) a nagayun kanu kitab a-taurah, na da kanu anggula sa sakanu bun i mawna a sumupak, andu di nu i pabpasa su ayatan ko sa paydu ged a alaga and saki(Allah) i ikagilak nu.
Andu dinu lumapisi su bantang kanu baluba (sa yanu pambwaten na su batal) andu di nu mamagana su bantang, ka sekanu na agkangatawan nu bun.
Andu itindeg nu su sambayang andu itunay nu su zakat nu andu ruku kanu, salta kanu mga taw a bamaruku.
Ngintu ka ipadsugu nu kanu mga taw su kanggalabak sa mapya na palimpangan nu su ginawa nu, inunta na pambatyan nu bun su kitab, nginto ka dili nu gapamikil?
Patabang kanu sa ka kwanu kanu kahanda nu, sabar kanu ando sambayang kanu duwa ka biyas anan a sangat i kawgat nin, ya tabiya a dili kawgatan na su mga taw a kagilkan kanu Allah.
Silan antu a mga taw, na dili ga-awa sa ginawa nilan su kapangadap nilan sa kanu kadenan nilan andu lu bun silan makambalingan (sa kanu Allah).
Sekanu a mga tupu na Israel, tademi nu su limu ko a inikalimu ko salekanu, andu ini- labi ko sekanu kanu taw nu dunya kano timpu nu.
I-kagilk nu su gay, a dili kabalasan na isa i kaped nin apya paydu, (dili makad-tatabanga) andu di matalima su ka safa'at andu di maka-pangon su mga tamuk andu dala den kanilan i kadtabangan silan.
Andu linepas nami sekanu kanu mga tan-tara (sundalo) ni Fir-awn, ipa-pedsemak nilan salekanu su malat ged a siksa, bamunun nilan su mga wata nu a mga mama paguyagen nilan su mga wata nu a mga babay su antu a kanggula nu na batalu intu a nakabpun kanu kadenan nu a masla.
Andu su kutika a pinadsisi nami su lagat, na pina- galed nami su tantara (Sundalu) ni Fir-awn na kailay nu intu ba a nanggula nilan a limu salkanu.
(tigu Allah) aden gay a pib-pasadan nami si Musa sa pat-pulu ka magabi, su kina likud nin nya nu sinimba na sapi, sekanu i mga taw a mga dupang.
Mawli kanu kina-simba nu sa sapi na linasam nami pamun ka andu kanu makad sukur.
Kanu kutika a kinang-gay nami kani Musa kanu Tawrat andu Furqaan, ka andu malmu-lemu su tutulu salkanu.
Su kutika a pidtalu nu Musa kano mga Qawm nin- Sa sekanu a mga Qawm na nadupang nu su mga ginawa nu sabap kanu kina simba nu sa sapi, nad-tawbat kanu (sa Alllah) sa imatayi nu su mga ginawa nu ka antu ba i makag kapiya salkanu (lu sa Allah), ka tawbaten kanu (nu Allah) ka sekanin i ped-talima kanu tawbat a malimu kanu midtawbat.
Su isa a kutika, a pidtalu nilan- O Musa- di nami a benal pangimbenalen seka, tamana di nami mailay su Allah sa mapayag, na sinayab kanu na kilat (kanu kasangulan nu), na sekanu na gailay nu bun su nanggula ba antu.
Mawli kanu kina patay nu, na pinam-bwat nami sekanu, ka andu kanu makad sukur.
Pina-silungan nami pan sekanu sa gabun andu pina- tulun nami pan salekanu su papanuk andu su pagken a mapiya, na kan kanu sa mapiya a ini-ridzqi nami salekanu, dikena kami nilan pindupangan, ginawa nilan bun i pandupangen nilan.
Pidtalu nami salekanu sa niya ba a dalpa (Baytal Muqaddas) na kan kanu sa mapiya sa andaw i taman a kalinyan nu, ludep kanu sa bengawan sa sujud kanu, sa yanu adtalu na ampun kami, ka ampunen nami su kabaradusan nu, andu umanan nami sa mapiya su mga mapiya bun.
Sinalin nu mga taw a dupang su pidtalu sa kanilan, sa ya nilan pidtalu na salakaw den sa kadtalu nu (Allah) (tigu Allah) pina-tulun nami su siksa abpun sa langit sabap kanu kina sagad nu galbek nilan kanu atulan.
Pinangenyan ni Musa (lu sa Allah) su Qawm nin sa ig, na ya nami pidtalo (Allah) na i betay nengka i tungkat-teng ka san sa watu, na sinumumpit i sapulo andu duwa a mata na ig, natawana umani-isa (ataw ka lumpukan) i baginuman nin, kan kanu andu inum kanu sa kanu rizqi nu Allah, da kanu penggula siya kanu lupa sa maka binasa.
Pidtalu nu pan kani Musa i di kami maka- tigkel sa pagken a isa timan bu pangeni ka kanu kadenan nengka i pam-bwaten nin su bamangetu sa lupa a ambalangan nu pagken a mga agkamun andu mga tinu- ya pidtalu nu Musa ngintu ka ped-sambiyan nu su mapiya ged sa yanu i pedsambi na dikena ged mapiya? lukanu sa Mas'r,ka lu ba langun i banganin nu, mauli na ya nilan nad-salengkat su kalusakan andu kina miskin andu lipunget nu Allah, sabap sa ped-supaken nilan su ayatan nu Allah andu bamunun nilan su mga nabisa dala kawagib nin andu sabap kanu kina lyu nilan kanu kumpasan nu agama nilan andu su kab-panibaba nilan.
Su mga taw a bamaginugut atawka yahudi atawka kristian atawka salakaw pan kanilan - antayn i mangimbenal sa Allah andu gay a mawli andu ming-galbek sa mapiya na aden balas nilan lu kanu kadenan nilan, dala gilek nilan sa kapatay, dala lidu na ginawa nilan kanu ga-tagak nilan.
(tademi nu a mga Israel) i kinamalan nami su pasad nu (sa simba nu su Allah) andu inipulu nami salekanu su palaw, (Palaw na Tur) kamali nu sa mabagel su inenggay nami salekanu andu tademi nu su langun nu naka dalem lun kamalmu-lamu salekani i kagilekan kanu sa Allah.
(tigu Allah) mawli sa kinab-pasada tanu na sinemibay kanu sa'napasadan, u dikena bu su kalbihan andu limu nu Allah salekanu na kuyug kanu den kanu mga taw a mga nalugi.
Andu saben- sabenal a natawan nu su mga taw a kapedu bun silan a pidti-baban nilan su gay nu saptu (bangwa sa seda sa gay na saptu) ya nami pidtalu na ambaluy kanu a ubal, kahanda nu Allah na nabaluy silan a ubal.
(su antu a nanggula) na binaluy nami a tyuba andu indawan kanilan andu su maka-tundug (kanilan) andu indawan kanu langun nu gangawli a magilek sa Allah.
Aden kutika a pidtalu ni Musa kanu mga Qawm nin su Allah na ped-sugun kanu nin sa sumbali kanu sa sapi- ya nilan pidtalu nginan Musa pendama-ngiyasen kami nengka bu? ya pidtalu nu Musa na lumindung aku sa Allah sa makuyug aku kanu mga taw a ignuranti.
Pidtalu nilan pangeni ka kanu kadenan nengka Musa i ipayag nin salekami i namba a sapi, ya pidtalu nu Musa: ya tigin (pidtalu nu Allah) na sapi a dikena matuwa ged-dikena manguda ged, anggalbek nu den i ipedsugu salkanu.
Pidtalu nilan pamun, i pangeni ka kanu kadenan nengka i ipayag nin i palas a sapi anan, ya pidtalu nu Musa: ya pidtalu (nu Allah) na sapi a palnan (napagelin) a binaning a matelesi palasin, kaliliniyan na makailay lun.
Pidtalu nilan pamun i pangeni ka kanu kadenan nengka i ipayag nin i namba a sapi, kagina mga sapi anya na makandadalagida, na amayka myug su Allah na matutulu kami bun.
(Ya pidtalu nu Allah) na antu ba a sapi na dikena ibangangawid andu dikena ibamubu dala tila nin andu dala simbul na palas nin, ya nilan nadtalu (Israel) saguna na seka na inipayag nengka su benal, salta na sinumbali nilan, na malu-malu di nilan mang-gelbek sabap kanu pidtakan mangiley.
Su kutika a minimatay kanu sa sakataw, na ini-pagena nu su minimatay, na su Allah na pambwaten nin su nganin-nganin a ibagema nu.
Pidtalu nami (tigu Allah) i ibatay nu su sapu nu sapi anan san sa minatay anan ka uyagen nu Allahu Taala ka andu nu gailay su mga tanda nu Allah ka andu malmu-lamu salkanu i maka pagungangen kanu.
Mawli na migkategas manem su pamusungan nu, sa mana den watu, ataw ka minuna pan sa watu, kagina aden watu a galesu a bagukitan na lawas na ig aden bun galupet na bagukitan na ig, aden bun kalaled, sabap intu sa gilek nin sa Allah, na dala kanu Allah i makad talipenda nin ataw ka kalimpangan nin su langun nu mga galbekan nu. (mapayag-masulen, manot matiwalu)
Ngintu ka gapanganganay nu i maka palityala pan salkanu (su mga yahudie), na saben-sabenal na sabad kanilan na gakineg nilan (su kadtalu nu Allah), mawli na pasibeyn nilan so ma'na nin sa ulyan nu kina sabut nilan lun inunta na katawan nilan. (i benal su Qur-an).
Amayka mabaratemu nu mga yahudie su mga mu'min na ya nilan kadtalu na nangimbenal kami, amay manem ka mangabulig silan (a mga, yahudie) na ya nilan madtalu (sa mamagadunga) na ngintu ka ipembitiyala nu pan silan (a mga Muslim) kanu inenggay nu kadnan salkano (taurat), baluyen nilan a tindeg nilan lu kanu kadnan nu, ngintu da akal nu?
Ngintu di nilan katawan (a mga yahudie) su Allah na magidsan bun i kataw nin sa mapayag-masulen?
Andu kaped ka nilan i di mataw sumulat-di maka batya, di nilan katawan i kitab (a taurat) ya tabiya napanganganay (antapan) andu dala sabut nilan, ya tabiya na kapangantap.
Su bawgan sa naraka i makwa nu antu ba a mga taw, ibanulat nilan su kitab kanu lima nilan, mawli na ya nilan kadtalu, na nya su nakabpun kanu Allah ka andu nilan kabpasa sa alaga a paydu, kanarakan nilan su inisulat nu lima nilan, kanarakan nilan pan su langun nu pibpasa nilan atawa ka napantiyali nilan.
Ya nilan kadtalu na di tanu man maka naraka-ya tabiya na paydu bu a gay, adtalu ka(Muhammad) ngintu aden pasad nu lu sa Allah?ka tumuman sa pasad su Allah, ataw ka padtalun nu su Allah i di nu katawan? (ped-tatabwan nu su Allah)
(tigu Allah) su taw a nalipung nu kadusan- taman sa nawma nu kapatay sa dala bun sekanin adtawbat, na antu ba i kigkuwan sa naraka, silan a mga taw na dala den sa kanilan i kalyu sa naraka.
82 Silan a namangimbenal andu ming-galbek sa mapiya,na silan su mga taw na surga sa dala den tamanan nin (di den silan makalyu)
(tigu Allah) namaruli kami sa pasad kanu tupu nu Israel sa dala kanu sumimba sa salakaw sa Allah andu piya-piyan nin su duwa a mimbata salkanu andu su pagali nu andu su mga yatim andu su mga miskinan andu itindeg nu su sambayang andu i tunay nu su zakat nu, na mauli na tinumaligkud kanu, ya tabiya na paydu bu salkanu, (mibpalituman), ka sekanu na pembalawaga nu su napasadan.
Andu namaruli kami sa pasad kanu tupu nu Israel sa da kanu ambunu-bunu andu di bugon nu isa i kaped nin kanu dalpa, na tinalima nu andu sekanu gailay nu i kapiyanan nin (gagedam nu sa mapiya).
Mawli na nan kanu den manem a bamununu su ginawa nu, pem-bugon nu sabad salkanu su sabad kanu dalpa nin, paped-tusan nu sa lekanilan su kadusan andu di kapamagayun,o nakawma salkanu su nanga sampanan na bamugon nu silan-inunta na haram salkanu i kabugaw sa kanilan-yanu bu pangimbanalen na sabad kanu kitab na su madakel na pedsupaken nu, na dala balas kanu anggalbek sa namba salkanu a dikena kayayan sa dunya, lu manem sa gay a mawli, na lu silan i bagasek kanu sangat i kapasangin a siksa, dala sa Allah i limpangan nin i languna ping-galbek nu banan.
Tuba i mga taw a pinamasa nilan i kauyag sa dunya, sa ya nilan inibayad na su akhirat, na di silan ka pegkagan kanu kanarakan nilan a siksa andu dala den kanilan i kadtabangan pan silan.
Andu sa saben- sabenal inanggay nami kanu Musa su kitab andu pinatundug nami kanu ulyan nin i mga sinugu andu inenggay nami kani Eisah a wata ni Maryam su mga mapayag andu binagel nami kani Jibriel, na ngintu ka uman makawma salkanu su isa a sinugu a di nu kasuwatan su napananggit nin na mimamasla kanu, su kaped a sinugu na papen- dalbuten nu, su kaped manem na pamunun nu.
Ya nilan kadtalu na su pamusungan nami anya na di maka-sabut, dikena bun (tigu Allah)- uged na namulkan silan nu Allah sabap kanu kaped supak nilan, na paydu ged i pangimbanalen nilan.
Guna makawma ka nilan su kitab abpun sa Allah a nagayun bun kanu kitab a Taurat, na da pan makawma sakanilan na nya nilan kadtalu na tabangan tanu inamba a kitab kanu mga kafeer a simupak lun, guna den makawma sa kanilan su bantang a katawan nilan bun na sinupak nilan, na su mulka nu Allah i patut kanu mga kafeer.
Ngen den na kawag i napamasa nilan kanu ginawa nilan ya maytu na sinupak nilan su initulun nu Allah a kalbihan kanu kag-kahanda nin na anggan nin kanu isa kanu mga ulipen nin, na ya nilan nad- semak na lipunget nu Allah kanilan sabap kanu Musa andu lipunget nu Allah sa kanilan, kanu mga kafeer su siksa a kayayan.
Amayka pidtalu kanilan (Yahudie) i pangimbenal nu su initulun nu Allah (Our-an) ya nilan kadtalu niya nami bu pangimbenalen su initulun salkami andu padsupaken nilan su salakaw lun, inunta su namba na benal a nagayun bun kanu Tawrat nilan,adtalu ka (Muhammad)na ngintu ka bamunun nu su mga nabi nu Allah amayka benal a bangimbenal kanu?
Saben-sabenal a nakawma salkanu si Musa a mapayag a benal i napananggit nin, mawli na sinumimba kanu sa sapi sa ulyan na kina-ganat nin, sekanu a mga taw a mga dupang.
Minaluy kami sa pasad salkanu (sa simban ako nu) andu inipulu nami salkanu su palaw a TUR, na kamali nu su inenggay salkanu sa mabagel, ya nilan kadtalu na pina-nuliman nami (pinakikineg nami) uged na sinumupak kami andu sinumanep kanu atay nilan i kina simba sa sapi, sabap kanu ka kafeer nilan, na adtalu ka kanilan i mawag a benal i suguwan nu Imaan salkanu, amayka benal a baginugut kanu.
adtalu ka (Muhammad) kanilan, amayka silan bu ig-kuwan sa gay a mawli inunta na kano Allah, na dala den mga taw a maka-surga (a salakaw sa Yahudie) (sabap sa padtalun nilan i silan i wata nu Allah, andu ini-kalimu) na panganganay nu (a mga Yahudie) su kapatay amayka benal kanu.
Di nilan mapanganganay su kapatay andu di nilan kiyugan sabap kanu nawna a kadupangan nilan, andu su Allah bu i labi a mataw kanu mga darwaka.
Maparuli nengka (Muhammad) kanilan, i-ilabi den nu mga taw su lilingay nilan sa dunya, magidsan su yahudie atawa ka su mushrik, ya kiyug nu isa kanilan na maka pagumul sa sangibu lagun, tigu Allah na dala bun ka di bun maka-lyu silan sa naraka apiya pan galendu su umur nilan- umana bu ka agkalandu, (sabap sa supak bun silan) su Allah na pedtulikan nin su langun nu galbekan nu.
Adtalu ka (Muhạmmad) na antayn i sumatru kanu Jibriel, (na padtaday nu den sa kalipunget nin) (sabap na si Jibriel) na pinatulun salkanu nu Allah (sa initin su Qur-an) a nagayun bun kanu nawma nin, (taurat-Injil) andu tutulu, andu pakag-kapiya kanu ginawa nu mga bamaginugut.
Anteyn i sematru kanu Allah andu su mga mala-ikat nin andu su Jibriel andu su mga sinugu nin andu su Mikail,na su Allah na saben-sabenal na satru nin su mga kafeer.
Saban-sabanal initulun nami saleka (Muhammad) su mga ayat a mga mapayag, dala sumupak lun nya tabya na su mga taw a linumyu kanu inugut sa Allah.
Uman silan abpasad sa isa a pasad na baluban nu sabad sa kanilan ka nya madakel sakanilan i di pangimbenal.
Andu Guna makawma sa kanilan su sinugu abpun kanu Allah a nagayun bun kanu taurat na initulak ku sabad kanilan, a aden kitab nin, (Yahudie) su kitab nu Allah na tinaligkuidan nilan sa mana nilan di katawan.
Nya nilan inunutan(Yahudie) na su bamatyan nu shaytan kanu timpu nu Sulaiman, na dala gikafir su Sulaiman ugayd su shaitan i mig-kafir, i bamandu nin su ilmu sih'r (kapamungkad)andu su nakatulun kanu duwa a Malaikat lusa babil sa (Iraq) si Haroot andu si Maroot, (su mga Malaaikat) na dikana silan bamandu sa ilmu (sih'r) ipedtalu nilan bagy kano mga taw i sekami na bamatalu kami, dakanu pag kafir, bangagi su mga taw sa kapab-pitas kanu tiwalay (mga pasemo), (tigu Allah) dala bun kagkaydan, nya tabiya (a manggula) na kahanda nu Allah, pangagiyan nilan su paka-binasa sakanilan, di pakagkapiya sa kanilan, natawan nilan i taw a mamasa sa namba a ilmu na dala den mapiya nin lusa akhirat, (nagugul tanan su galbekin) andu ngin den i kalat, umana bu ka gaylay nilan su ka narakan nilan.
Umana bu ka nangimbanal silan andu nagilakan bu silan sa Allah na su balas na lusa Allah na sangat e kapiya nin umana bu ka gatawan nilan.
Hee sekanu atagin a bamaginugut dinu padtalwa kanu Rasulullah i (raa-ena) saliyat a katigan andu yanu adtalu na (kapagadat) ilay kami andu pakikinag kami andu aden kanu mga kafeer su siksa a sangat a malipadas.
Di a benal kalilinyan nu mga yahudie andu su mga mushrik i maka tulun salkanu a mga bamaginugut su mapiya abpun kanu kadnan nu, su Allahu Taala i padtantu kanu limu nin, kanu magkahanda nin, sekanin a Allahu Taala i kigkuwan kanu kalbihan a masla.
Da inimansukh(sinalin) nami kanu ayat ataw ka nilipatanan nami na yapan mapiya su paka- sambi lun ataw ka pagidsan nin bun, ngen tu di nengka katawan na saben-sabenal su Allah na langun a anggaga-isa na kagaga nin.
Saben-sabenal na katawan nengka su Allah na lekanin su pitu lapis a langit andu su lupa, dala salkanu i pedtuganul andu padtabang a salakaw pan salkanin a Allah.
Ngintu yanu kyugan na ka idsan nu su sinugu salkanu? sa mana kina idsa kanu Musa a nawna pan, na su taw a yanin lamigan na su ka-kafeer kanu ka pangimbenal na antu ba itaw a natadin kanu lalan a matidtu.
Nya kasuwatan nu satru nu agama Islam na makambalingan kanu sa ka-kafeer kanu ulyan nu kina- pangimbenal nu, kadengki intu a nakabpun sa ginawa nilan sa ulyan na napayag sakanilan su bantang, na pasagadi nu andu tigkali nu silan, taman sa itingguma nu Allah kanilan su kahanda nin (siksa), ka su Allah na langun a anggaga-isa na kagaga nin.
Itunay nu su sambayang andu su Zakat nu andu su langun na idtatangguna nu kanu ginawanu a mapiya na maparuli nu bun lu sa Allah, ka su Allah na gaylay nin su galbek nu.
Pidtalu nu mga yahudie i dala kun maka-ludep sa surga a dikena yahudie, ataw ka dikena kristianu, antu na kapanga-nganay nilan, adtalu ka (Muhammad) i pambwat nu i tindeg nu amayka benal kanu.
Inunta na yamaka surga na su taw a sinumangkup kanu Allahu mibpiya-piya, na lekanin su balas lusa kadnan nin andu dala den gilek nilan andu dala den lidu na ginawa nilan.
Andu pidtalu nu yahudie i dala padza nin (su agama) na kristianu apiya paydu, pidtalu manem nu kristianu i dala padza nu (agama nu) yahudie apiya paydu, silan antu na pambatya sa kitab, maytu bun ba i kadtalu nu silan antu a (mga Arab) a dili mga mataw, su Allah bu i maka kukum sa kanilan lusa gay a mawli kanu di nilan bamagayunan.
Andu dala pakalawan kanu kadupang nu taw a isapal nin su katadem kanu ngala nu Allah sya sa masjid andu paga-tulan nin i kageba nin (kanu ngala ataw sa masjid) antuba a mga taw na dala sa kanilan i kaludep (sa masjid) a dikena silan kanga-gilkan, aden kayaya nilan sa dunya andu siksa a masla sa gay a mawli.
Andu kanu Allah i sebangan andu sadapan, apiya andaw kanu samangul na maparuli nu su pamenengan nu Allah. Saben sabenal so allah na Mawlad e Sabotin.
Andu pidtalu nilan pan (mga Yahudie-kriştianu) su Allahu na aden wata nin, mahasuti su Allah, lekanin su dalam nu pitu lapis a langit andu su lupa, baginugut tanan sa Allah.
Inidtabu nu Allah su mga langit andu su lupa andu amayka aden kahanda nin na yanin bu adtalun na (Kun) pangadan ka, na ma aden.
Andu pidtalu nu mga taw a di mga mataw upama ka nya ba ka imbityala tanu nu Allahu Taala (sa mapayag, ka andu nin madtalu i seka Muhammad na, sinugu ka nin) atawka ka anggan tanu nin sa Ayat, na maytu bun ba i kadtalu nu mga taw nawna sakanilan mindadalagida i pamusungan nilan, saben-sabenal na ini-payag nami su mga ayatan kanu mga taw, ka andu matagu sa ginawa nilan.
Benal (Muhammad) a sinugu nami seka sa bantang (Islam) a mapa-kalilini ka (kanu surgạ) andu mapa-kagilek ka (sa naraka), ka andu di ka kaidsan nu mga taw a tigkuwan kanu naraka.
Andu di ka kasuwatan nu mgaYahudie sa (mapayag- masulen) andu su mga kristianu, taman a di nengka unutan su agama nilan, adtalu ka sa kanilan (Muhammad) su tutulu nu Allahu Taala na antuba i tidtu a tutulu, amayka unutan nengka silan kanu kiyug nilan sa ulyan nu kinauma nu ilmu salka, na dala den makwa nengka abpun sa Allah a tumuganul andu dala pan tumabang salka.
Su mga taw a inanggan sa kitab a pembatyan nilan sa tidtu a ka pambatya, na antu ba ibangim benal sa kitab, su taw manem a pedsupaka nin su kitab na antu ba i nanga-lugi sa masla.
Sekanu a mga tupu nu Israel, tademi nu su limu ku a ini- kalimu ku sakanu, andu ini-labi ku sekanu kanu taw nu dunya kanu timpu nu.
Ikagilak nu su gay (gay a kagkukum)ka dili kabalasan na isa i kaped nin apiya paydu andu dili matalima su ka shafa'at andu dili maka-pangun su mga tamuk andu dala den kanilan ikad-tabangan silan.
Andu binatalu nu Allah si Ibrahim sa mga kalima na sinampurna ni Ibrahim, tig nu Allah nampamba a baluyen ko seka a kaunutan nu mga taw, tigu Ibrahim, kadnan ku taman sa muli a taw ku na baluy ka bun, tigu Allah na di makamung su mga dupang.
(tigu Allah) binaluy nami su Baytullah na pedsangulen nu mga taw andu tumatana silan, sambayangi nu su tampal sa pid-tindegan nu Ibrahim, inib-palyugat nami kani Ibrahim andu si Ismael I kasuti kanu Baitullah, kanu bamad-tawaf andu su bamedtana, andu su paruku, ped sujood.
Pidtalu nu Ibrahim; kadnan ku baluy ka i nya ba a dalpa a tumatana (malilinatad) andu ridzkay ka su taw nin kanu mga unga nu kayu su mangimbenal silan sa Allahu Taala andu gay a mawli, (tigu Allah) su semupak na paydu bu i kag-kakalilini nin mawli na lu ku i dasek sa siksa a apuy mawag a benal agkawlyan.
Andu pidtalu ni Ibrahim kanu kab-pamulu nin kanu kasangkapan nu Baytullah silan kani Ismael Hee! kadnan nami talima ka salkami su galbek nami, ka seka a kadnan nami i paka kineg salkami andu pakailay salkami.
Hee.. kadnan nami baluy kami duwa a semangkup kami salka andu su mga mawli ataw nami, baluy ka silan sumangkup salka andu ipaylay nengka salkami su langun na ukitan nami andu padtawbat kami, ka seka a kadnan nami banawbat a malimu sa mid-tawbat.
Hee.. kadnan nami pambwati ka silan sa sinugu a bangsa nilan bun a mabatya nin su ayatan nengka sa kanilan, amaka-pamandu sakanilan kanu kitab andu su Halal-Haram andu makapadsuti sakanilan, seka a kadnan nami a mapulu a mataw mapambetad sa anda-dayt.
Andu dala menda kanu agama ni Ibrahim, ya tabiya na su taw a dala natawan nin andu saben-sabenal (Allah) na pinamili nami sekanin sya sa dunya, lu manem sa Akhirat na silan kanu mga taw a mga mapya.
Pidtalu nu kadnan nin salkanin i sangkup ka (Ibrahim), yanin pidtalu na sinumangkup aku kanu kadnan nu langun sa dunya.
Inid-tutuma nu lbrahim kanu mga wata nin andu si Ya'cob: Hee wata ku, su Allahu Taala na pinamili nin salkanu su agama Islam, na dakanu abpatay- ya tabiya na Muslim kanu.
133 Ngintu sekanu a mga Yahudie, natabu kanu (nailay nu) su kinapatay nu Ya'cob? sa pidtalu nin kanu mga wata nin upama ka ngen i simban nu kanu ulyan a kapatay ku? Yanilan pidtalu: ya nami simban su kadnan nengka andu kadnan ni Ibrahim andu si lsmael andu si Ishaq a kadnan a isa nin bu andu sekami na sekanin bu i sinang-kupan nami.
134 Antu ba a mga taw na naypus den silan kanilan su galbek nilan, lekano menem su galbekan nu, di kanu ka-idsan sa kanu kanilan a galbekan.
Andu pidtalu nu mga Yahudie, yahudie kanu atawka kristianu, na matutulo kanu, adtalu ka (Muhammad) su agama nu Ibrahim na matidtu andu si Ibrahim na dala makuyug kanu mga banakutu.
Adtalu nu i nangimbenal kami sa Allah andu su initulun nin salkami andu su ini-tulun kanu Ibrahim andu si Ismael andu su Ishaq andu su Ya'cob andu su mga katupwan nilan andu su inenggay kanu Musa andu su Eisha andu su langun nu inenggay kanu mga nabi, abpun kanu kadnan nilan,di nami pambibidayan silan, andu sekami na su Allah i sinangkupan nami.
Amayka nangimbenal silan sa mana su kina-pangimbenal nu, na benal a natutulu silan, amayka sinumibay silan na silan na mga taw na dala kapamagayun nin, su Allah i mangalat salka (Muhammad) kanilan, sekanin a Allah i pakakineg a mataw.
Su agama nu Allah na dala maka lawan sa kapiya na inenggay abpun sa Allah (Sib’gah)agama Islam andu sekami na pedsimban nami.
Adtalu ka sa kanilan (Muhammad)ngintu ka i peb- palawa kami nu pan sa Allah, na sekanin i kadnan nami a kadnan nu bun, lekami den i galbek nami na lekanu den i lekanu andu sekami na ikhlas kami (kanu Allah).
Atawka yanu pedtalun na si Ibrahim andu si Ismael andu si Ishaq, andu si Ya' cob andu su mga katupwan nilan na yahudie silan atawka ka kristianu silan, adtalu ka (Muhammad) ngintu silan pan i minuna i kataw nin kanu Allah? dala den labi i kadupang nin kanu taw a ipamagena nin su nad-saksya nin kanu Allahu Taala, dala kanu Allahu Taala i kalimpanganin su mga galbek nu.
Antu na mga nawna den silan, kanilan den i lalaw nu galbekan nilan, lekanu manem i lalaw na mga galbek nu, di maka-idsa salkanu su langun na galbek nilan.
Di sumala na adtalu nu mga taw a mga malbut o ngen napaanda sakanilan sa ka pedsangul nilan sa Qiblah. Adtalu ka (Muhammad)kanu Allah su sabangan andu sedepan, tutulun nin imagkahanda nin sa lalan na matidtu.
Andu mamba i kinabaluy nami saleknu a ummat a nasasangan ka andu nu kadsaksyan su mga taw, andu nami baluya su Qiblat a padsangulan nengka nya tabya andu nu katawan i sekami na katawan nami na bagunut kanu nabi andu su munut sa nabpunan andu su banal a mawgat nya tabya na su mga taw a tinutulu nu Allah, andu dala sa Allah i dadagan nin su sambayang nu malimu kanu mga taw.
Saben-sabenal a gaylay nami su katingada nu biyas nengka (Muhammad) sa langit na pasangulen nami seka sa qiblat a kalinyan nengka, na isangul nengka den i biyas nengka ka sa namba kanu masjidil Haram andu apiya andaw kanu matabu na sangul nu su biyas nu kanu qiblat andu su mga taw a aden kitab nin na katawan nilan antuba i benal nakabpun kanu kadnan nilan andu dala sa Allahu Taala ilimpangan nin i panggalbak nilan.
145 Na apiya inenggay nengka kanu aden kitab nin (Yahudie-Kristianu) i langun nu ayat na di nilan unutan i Qiblat nilan andu dala kanu sabad sakanilan e munut su sabad Qiblat na amayka inunutan negnka e kyug nilan sa ulyan na kinauma na kataw selka, na seka na nakuyug ka kanu mga taw a mga kafeer.
Atagin su silan mga taw a inenggan nami silan sa kitab, na katawan nilan su Rasulullah sa mana bun su kataw nilan kanu mga wata nilan, andu su kaped sakanilan na ibagena nilan su bantang inunta na katawan nilan.
147 Su bantang na abpun kanu kadnan nengka, daka anggula sa makuyug ka kanu mga taw a penduwa-duwa.
Andu uman isa na aden pamıkilan nın a paped-sangul salkanin, na nya nu pamagayasi na su mga mapiya- ka apiya andaw kanu maaden na limudan kanu nu Allah langun, ka saben-sabenal su Allah na langun na anggaga-isa na kagaga nin.
Andu apiya andaw kanu nakalyu na isangul nengka i biyas nengka sa masjidil Haram sa kadsambayang ka antu na bantang abpun sa kadnan nengka andu dala sa Allah ilimpangan nin su penggalbakan nu.
Andu apiya andaw ka nakalyu na isangul nengka i biyas nengka sa lemba kanu masjidil Haram sa kadsambayang andu apiya andaw kanu na isangul nu i mga biyas nu sa lemba kanu baytullah, andu di maaden kanu mga taw i tindeg nilan salkanu, ya tabiya na su mga kafeer sa kanilan, Na dinu ikagilek silan, andu saki nu i ikagilek, andu sampulnan ku i limu ku salkanu andu malmu-lamu i matutulu kanu.
Mamba i kina sampulna sa limu, na sinugu nami salkanu su rasul abpun bun salkanu, a batyan nin salkanu i mga ayatan nami , andu suttin kanu nin andu pamandun kanu nin sa kitab andu hikma (kaungangen)andu pakatawan nin salkanu su dinu kangatawan.
Tadami aku nu sa inugot, ka tademan ku bun sekanu sa ampun andu adsukuri aku nu andu da kanu padsupak.
Sekanu a mga bamaginugut patabang kanu sa Allahu (sa kakwa sa kahanda nu) sa sabar kanu andu sambayang kanu, ka su Allah na salta kanu mga matigkel.
Andu di nu adtalu kanu mga taw a nabunu sa lalan sa Allahu Taala a minatay, dikena minatay ka bibyag silan, ugayd na di nu kagedam.
Andu batalun nami sekanu sa ambalangan (a batalu), a kagilak andu kanggutem andu kagkulang nu mga tamuk andu su kapatay anu kag kulang nu mga unga nu pamulan andu panudtul ka(Muhammad) (su mapya a tudtulan) kanu mga taw a masabar.
Na silan a mga taw (a masabar) amayka nasugat silan nu mga batalu, na yanilan kadtalu na lu kami abpun kanu Allah andu lu kami bun baguli.
Antu ba a mga taw nanget sakanilan i mga salawat abpun sa kadenan nilan andu limu andu silan i nanga tutulu.
Benal su Safa' andu su Marwah, na ped-kanu nabetadan na simba kanu Allah, na su mig-kagi sa baytallah, atawka nag-umrah na dala dusa nin sa kad-zay nin sa pageltan nu safa andu marwa andu su taw a anggalabak sa sunnah, ulyan nu farduh na saben-sabenal su Allah na masukur andu mataw.
Benal su mga taw a ibagana nilan su initulun nami a mga mapayag andu tutulu sa ulyan na kina payag nami lun kanu mga taw sya sa kitab na silan a mga taw na namulkan silan nu Allah andu kamulkan pan nu mga pakamulka.
Ya tabiya na su mid tawbat andu nangumbaya andu inipayag nilan bulawa (su bantang) na tawbatan ku silan andu sekanin a (Allah) i banawbat a malimu.
Su mga taw a mig kafeer andu minatay silan sa kafeer, nanget sakanilan i mulka nu Allah andu su mga Malaikat andu su langun nu mga taw.
Tatap den silan sa naraka, dikapeg-kagan silan kanu siksa andu di den silan ilen sa limu.
Andu su kadenan nu na isa bu(Allah) dala kadnan ya tabiya sekanin malimu sa mapayag andu masulan.
Saben-sabenal na saki i bamaluy kanu mga langit andu lupa, andu su kapambidaya nu magabi andu malemag anduu su pagadan a balalaguy sa lagat a pakang-guna kanu mga manusya andu kina-patulun sa ig sa abpun sa langit, inuyag nin su lupa a minatay, sabap kanu ig andu pinam buwadin sya sa lupa i langun na mga malanap- lanap andu su kapeg kabembalu sambal andu su gabun, apiya andaw paka-sangul kanu pageltan nu langit andu su lupa,na mga tanda intu sya kanu mga taw a maka-pamikil.
Andu kaped kanu manusya na bangaden pan silan sa salakaw kanu Allah a mga kadenan a kalilinyan nilan sa mana bun su Allah (i kalilini nilan lun), su mga bamamaginugut na ya nilan kalilinyan na su Allah, umana bu ka maylay nu mga kafeer su gay a kaylay nilan kanu siksa, na madtalu nilan i bagel na kanu Allah langun, andu su Allahu na mapasang i siksa nin.
Su kutika (lusa gay a mauli) a kab pukas nu mga taw a inunutan nu mga dupang andu maylay nilan i siksa andu na tabpad sakanilan i sabapan na kalipus nilan. (andu matebped su kinadtatagapeda nilan)
Andu madtalu nu mga namangunut o makambalingan tanu bu, na abpukas tanu sakanilan, sa mana bun kinapukas nilan salakitanu, mamba i kapab pagilay nu Allah kanu mga galbakan nilan, maka duwan-duwan silan andu dala ka lyu nilan sa naraka.
Sekanu a mga taw, kan kanu sya kanu lupa sa halal a mapiya, di nu bagunuti i mga sangkad nu mga shaitan, ka saben-sabenal su shaitan na satru nu a mapayag
Ya ipad sugu na shaitan salkanu na mawag andu maladsik, ka andu nu madtalu (kadtebwanu) su Allah sa dinu katawan.
Amayka pidtalu sakanilan i unuti nu su initulu nu Allah, nya nilan pedtalun na ya nami bu unutan su nalayaman kanu mga kalukasan nami, apiya pan su mga kalukasan nilan antu na dala ungangan nin apiya pan paydu andu di pamaka tuntul.
Andu ya upaman nu mga kafeer na mana su mga binatang a kinagkag yanin bu makinag na swara andu tawag, bisu silan sa bantang andu maw andu pisek, dala itungan nilan.
Sekanu a mga bamaginugut, kan kanu sa mga mapiya, iniridzki nami salkanu andu adsukur kanu sa kanu Allahu, amayka sekanin i padsimban nu.
Ya nin ini-haram salkanu na su dala masumbali andu su lugu andu su baboy andu su sinumbali sa salakaw sa Allah,na su naka sendud a dikena pan darwaka andu dikena bagukag, dala dusa nin amayka kuman, ka saben-sabenal su Allah na bangampon a malimu.
Su mga taw a i bagana nilan su initulun nu Allah kanu kitab andu i bamasa nilan (su ayatan) sa paydu a alaga, na silan na dala makan nilan sya kanu tiyan nilan, ya tabiya na apuy andu dili imbitialay nu Allah silan sa gay a mauli andu di silan ma sutti, andu ka nilan i siksa a malipades.
Antu ba i mga taw a pinamasa nilan i katadinan sa tutulu, andu siksa sa ampun, na ngen den a katigkal i kanilan sa apuy.
Kagina saben-sabenal su Allah na initulun nin su Qur-an a bantang, na su mga taw namimbida-bida silan kanu kitab, sa mawatan gayd i pamagaltan nilan.
Dikena ya mapiya i kasangul nu biyas nu sa tampal sa sabangan atawka ka tampal sa sadapan, ugayd nya mapiya na su nangimbanal sa Allah andu su Malaaikah andu su kitab, andu su mga nabi andu su inenggay nin i tamuk nin sa pagali nin andu su mga yatim andu su mga miskinan andu su natanaw andu su bamangani andu su mga natamukan (gatebus nin su ginawa nin) andu midsambayang sa tidtu andu min zakat andu tinumuman sa pasad amayka mibpasad silan andu midsabar kanu kadala nilan andu kadalu nilan andu su ka pambunwa, silan i mga taw a benal a mapiya, andu silan a mga taw i magilek sa Allah.
Sekanu a mga bamaginugut ifardu salkanu i ka-qisaas (kukuman a bantang) sya kanu namamatay, su daludaya na daludaya andu su ulipan sa ulipan bun, su babay na babay bun, su inampun nin ka di den Qumisaas na mangatuk sa diyat sa mapiya, andu itunay mambu salkanin sa dala talibed, antu na ini-pegkag abpun sa kadenan nu andu limu nin, Anteyn idtibaba sa ulyan na (kinakukum lun) na antu ba na lakanin i siksa a malipadas.
Andu samba su kauyag nu kanu kapag-qisaas, (sa malilintad) sekanu a aden mga akal nin, ka malmu-lamu salkanu i magilak kanu sa Allah.
Ini fardu salekanu, amengka nakawma kanu isa salekanu su kapatay, amengka aden natagak nin a tamuk, na manutuma sa mapya su duwa a mimbata andu su mga pagali sa mapya, bantang kanu magilek sa Allah.
Anteyn i sambyan nin i Wasiyyah sa ulyan na kina- kineg nin, na su dusa na lu bun kanu pem-baluba kanu Wasiyyah, su Allah i paka-kineg a mataw.
Su nagilekan sa panutuma a lamig, ataw ka kadusan, na inumbayan nin kanilan na dala dusa nin, ka su Allahu i mangampun a malimu.
Sekanu a mga bamaginugut Ini-fardu su puasa (Ramadhan), sa mana bun kina fardu kanu mga taw a nangawna salekanu, ka malmu-lamu salekanu i kagilekan kanu.
Mga gay a kambilang-bilang bu, na anteyn salekanu i pedsakit, atawka ka belalakaw a gapasangan, bilangenin i da nin kabpwasay,ka abpwasan nin sa ped a gay andu su di pakagaga (ebpwasa) sabap sa katuwa na ab-pidya sa kapakan sa miskinan, na su umana nin su fardu sa sunnat na nya labi i kapiya nin, andu(amayka) ab-pwasa kanu na nya labi i kapiya nin salekanu, amengka katawan nu bu i pahala nin.
Su ulan-ulan nu Ramadhan i kina-tulun nu Qur-an, a tutulu sa mga taw andu minayag sa tutulu andu napad-sanggaya sa bantang andu batal, antayn i nakailay salkanu sa ulan-ulan, na abpwasan nin andu su padsakit atawka balalakaw ka dala makab-pwasa, na abpwasan nin sa kaped a gay, ya kyug nu Allaho Taala salekanin,na kalamwan kanu, di nin kalinyan i kalgenan kanu, andu sampulna nu (talutup nu) su bilangan nu andu takbir kanu sa Allaho Taala sa initulun nin salekanu, andu malmu-malmu salekanu i kad-sukur nu.
Andu inidsa aku nu mga ulipen ku saleka (Muhammad) na saki na masupeg aku, taliman ku su pangenin nu bangeni amayka nangeni salaki, na taliman nilan i suguwan ku andu mangimbenal silan sa laki ka malmu-lemu kanilan imaka tidtu silan.
Inihalal salekanu sa magabi nu Ramadhan i sumbaken nu su mga kaluma nu, ka silan na (babay) mana bun balegkas nu, sekanu manem (mama) i balegkas nilan, natawan nu Allah i sekanu i gapagakalan nu i ginawa nu, tinawbat kanu nu nin (Allah) na saguna na pamakay nu den silan andu tuntut nu su pina-makay nu Allah salekanu andu kan kanu andu inum kanu taman sa di pan mapayag salkanu su kintel a maputi abpun kanu kintel a maytem (fajar) a tidtu, mawli na sampulna nu su pwasa nu taman sa kasadep nu senang andu tangkay nu su mga kaluma nu, ka sekanu na ped-tana kanu sya sa masgit antuba i mga dulunan nu Allah, na di nu sumikani, ka mamba ikapeb-payag nu Allah sa mga tanda nin kanu mga taw, ka malmu-lemu i magilek silan sa Allah.
Andu di nu kuman su mga tamuk nu sa pamageltan nu sa batil andu apiya pakaukit sa kag-kukom, asal na gakan nu i kaped kanu mga tamuk nu mga taw sa batil, atawka kadusan andu sekanu na katawan nu bun.
Ibagidsa nilan saleka (Muhammad)su ulan-ulan adtalu ka i mga waktu nu mga taw andu kag-kagi andu dikena ya mapiya i lumudep kanu sa mga walay sa semungu sa taligkudan ugeyd na ya mapiya na su magilek sa kanu Allah andu ludep kanu sa mga walay lu kanu mga bungawan nin andu ikagilek nu su Allah, ka malmu-lamu salekanu i maka untung kanu.
Ambunwa kanu sa lalan sa Allah kanu mga taw a i pam-bunwa kanu nin,na da kanu banibaba, ka su Allah na di nin kalinyan i mga matibaba.
Andu bunu nu silan sa apya andaw nu kasampenan silan, andu palyu nu silan-ka pina-lyu kanu nilan bun, su kasakutu na muna pan sa kabunu, na di nu silan pembunwa lu sa masjidil Haram taman sa di kanu nilan bunun, amengka pem-bunun kanu nilan na bunu nu bun silan- ka mamba i kabalas kanu mga sinumupak (kafeer).
192 Amayka minenda silan na su Allah a bangampun a malimu.
Andu im-bunwa nu silan taman sa dala den sakutu andu ma-aden su agama (Islam) a kanu Allah amayka minenda silan na dala kapagukag ya tabiya na su mga dupang.
(Nyaba) su ulan-ulan a inipalinta (su kasulung) samba a ulan-ulan a inipalinta (da kanu magalangalang) (ku galebakan ngka) su mga iniharam na qisasen, na anteyn su ad-tibaba salkanu na-adtibabi nu sa mana bun kinad-tibaba nilan salkanu andu ikagilek nu su Allah andu tuntayi nu su Allah na salta kanu mga taw a magilek salekanin.
Am-baranggya kanu sa lalan sa Allah di nu pad-tagel sa ginawa nu i maka binasa lun andu abpya- pya kanu, ka su Allah na kalinyan nin i mga mapiya.
Andu sampulna nu su Hajj andu su umrah sa para kanu Allah, amayka da kanu maka-talus tumawaf, na sumbali kanu sa had-yah andu di nu tumabungaw su buk nu, taman sa di mawma su ukul nin,antayn salkanu i pendalu, atawka masakit i ulu nin, na ab-fidyah sa abpwasa, atawka zadaqah, atawka sumumbali sa kambing, amayka mapya kanu den na su nag- umrah sa timpu nu kag- kagi na wagib salkanin i Da (kasumbali) su dala kambing nin na ab-pwasa sa talu gay andu pitu gay manem amayka nakawli sa dalpa nin antu ba i sapulu a sampurna- su antu na su taw sa mawatan, dikena taw sa masjidil Haram andu ikagilek nu su Allah andu tuntayi nu su Allah na mapasang i siksa nin.
Su kag-kagi na tantu bu i timpu nin, su na-fardu den salekanin su kag-kagi na naka-ih ram den-na di den sumumbak sa kaluma andu di adtalu sa malat andu di den ab-palawa andu langun nu pang –galbaken nu a mapiya na katawan nu Allah andu ambalutu kanu-ya mapiya geyd a lutuwan- na gilek sa Allah andu i kagilek aku nu(Allah) sekanu a aden mga akal nin.
Andu dala bun dusa nu u maman-tyali kanu sa limu nu kadenan nu, amayka naka pasad kanu den lu sa arafah- na tademi nu su Allah lu sa mas-jidil Haram (Muj-dalifah), andu tademi nu ka sekanin i tinumu- tulu salkanu,a saben-sabenal sa da kanu nin pan matutulu na tadin kanu.
Mawli na abpalak -palak kanu-sa kapalak nu mga taw andu pa-ampun kanu sa Allah, ka saben-sabenal su Allah na mangampun a malimu.
Amengka napasad nu su galbek nu na tademi nu su Allah sa mana su katadem nu sa mga lukes nu, atawka minuna pan, na ped-kanu mga manusya i ped-talun nin i kadenan ku inggay kami siya sa dunya sa mapiya andu dala den salekanin i bagi(umun) sa Akhirat.
Andu kaped sa kanilan na nya nilan padtalun na Hee kadenan nami inggay kami sya sa dunya sa mapya andu lu sa akhirat sa mapya andu lepas kami ngka kanu siksa sa apuy sa naraka.
Antu ba a mga taw na kanilan i umun sa pantiyali nilan andu su Allah na manga-gan i ka-kukum nin.
Andu tadami nu su Allah kanu gay a paydu (Lusa Mina) su bamagayas sa duwa gay bu na dala dusa nin andu su panggagawli sa talu gay na dala bun dusa nin, su nagilkan sa Allah andu ika-gilek nu andu tuntayi nu i sekanu na lu kanu bun mabulig (sa Allah).
Andu ped sa kanu manusya na kalinyan nengka i kadtalu nin sa kauyag sa dunya andu pad saksyan sa Allah su dalem na pamusungan nin, inunta na mawag i kapagukag nin.
Andu amayka naka taligkud silan (salka Muhammad) na ming-galbek sa maka binasa andu binasan nin i pina mumula andu mga pipis(binatang), na su Allah na di nin kalinyan i kabinasan.
Andu amengka pidtalu salekanin i ikagilek nengka su Allah na kinwa nin a kinab-papulu nu kadusan nin, nya bu mataw lun su naraka (Jahannam), mawag a benal i kad- takenan nin.
Andu ped kanu manusya i pabpasan nin su ginawa nin sa kasuwat nu Allah andu su Allah na mananun kanu mga ulipen nin.
Hee sekanu anan atagin a mga bamaginugut, ludep kanu- sa agama Islam, sa langun, (mapayag-masulen) andu di nu munuti i mga sangkad nu shaitan, ka saben-sabenal su shaitan na satru nu a mapayag.
Na amayka mid-tadingan kanu sa ulyan nu kinawma nu mapayag(Qur-an) salkanu-na tuntayi nu su Allah na mapulu a mawngangen.
Dala ga-pagangapan nilan ya tabya itingguma nu Allah sa kanilan i masilung a dadtem andu su Malaaikah a ped-siksa sa kanilan, andu napasad su kanggula, andu lu bun sa Allah pakambalingan su langun a anggaga-isa.
Idsa nengka (Muhammad)kanu tupu nu Israel-u piladen i naka-inggay nami kanilan a ayat a mapayag (na dala nilan bun palityalay) na su taw a sambyan nin i limu nu (kadtalu nu) Allah sa ulyan na kinawma nin salkanin, na su Allah na mapasang i siksa nin.
Pinagkapiya kanu mga kafeer- su kauyag sa dunya andu pagumpaken nilan su mga bamaginugut, na su magilek sa Allah i mapulu kanilan sa gay a mawli andu su Allahu i bamaridzki kanu magkahanda nin sa dili magkila-kila.
Nya kaaden nu mga taw na isa bu i agama nilan-ngin pan ka mimbida-bida silan na pinambwat nu Allah i mga Nabi a mapakalilini(mamanudtul) sa agama andu mapakagilek sa naraka andu initulun nin (Allah) kanilan i kitab a bantang ka andu nilan makakukum kanu pageltan nu mga taw kanu kapembida-bida nilan andu dala mimbida kanu kitab, ya tabiya na su inenggan sa ulyan a kinawma nu mga mapayag kanilan, sabap sa dengki i pamageltan kanilan, na tinitulu nu Allah su mga bamaginugut, kanu pembibidayan nilan abpun sa bantang sa kahanda nu, andu su Allah i pedtutulu sa mag-kahanda nin sa lalan a matidtu.
Atawka ga-antap nu i makaludep kanu sa surga dala makawma salkanu su mana su nagedam nu mga nawna salkanu, nakabetad kanilan i mapasang a kambunwa andu kinadalu andu lininug silan sa mapasang taman sa madtalu nu sinugu (Rasul) andu su mga bamaginugut i kanu i tabang nu Allah? dikena ka su tabang nu Allah na masupeg.
Ibagidsa nilan salka u ngen i ambaranggyan adtalu ka (Muhammad) su nganin a ambaranggyan nu na ya mawna a anggan nu na su duwa a mimbata salkanu, antu pan su mga suled nu andu mga yatim, andu mga miskinan, andu su natanaw (wata sa lalan), andu ngin a penggalbaken nu a mapiya na saben-sabenal su Allah i labi a mataw lun.
Inibpalyugat salkanu i kambunwa sa agama a gabansyan nu, na tabiya bun ka su di nu galinyan a anggagaysa na antu ba i makagkapiya salkanu, na tabiya bun ka su galinyan nu a ang-gagaysa na makabinasa salkanu, andu su Allahu i mataw kanu di nu katawan.
Ibagidsa nilan salka(Muhammad) su mga ulan-ulan a haram i kambunwa, adtalu ka (Muhammad) i kambunwa kanu (Muharram- Rajab- Zul-Qa'dah- Zul-haji) na masla a kasiksan, andu su kasapal sa agama Islam andu su kagkafeer lun, andu su masjidil Haram, andu su kapalyu sa taw nin na muna pan i kasla nin sa Allah, andu su kasakutu na nya masla sa kabunu, andu di nilan pindan i kabunu nilan salkanu (Muslim) taman sa di nilan mapandeng su agama nu amayka magaga nilan, andu su pamurtad salkanu sa agama nin, na upama ka minatay na kafeer bun sekanin- na silan i nagugul i mga galbek nilan sa dunya andu akhirat andu silan a mga taw i tigkwan sa apuy a dala kalyu nilan sa naraka.
Su mga bamaginugut manem na silan a mga taw na ginanatan nilan i dalpa nilan, andu min-jihad silan sa lalan sa Allah, na silan i bagingalap kanu limu nu Allah andu su Allah i bangampun a malimu.
Ibagidsa nilan salka(Muhammad) su makalangut andu kandalmet, adtalu ka i masla a kadusan andu pakambarapantag bun sa kano mga taw, su kadusan nin na ya masla kanu kapantag nin, andu ibagidsa nilan su ipambaranggya nilan adtalu ka i sawad, (subla nu pantyali) namba i kapebpayag nu Allah salkanu kanu mga ayatan nin ka malmu-lamu i maka-pamikir kanu.
Sya kanu dunya andu akhirat andu ibagidsa nilan salka su mga yatim, adtalu ka i kapagungaya kanilan i mapiya, andu iped-simbul nu silan na pagali nu bun silan, andu su Allah i mataw sa pembinasa kanu bagungayan nu, andu upama ka pigkahanda bu nu Allah na den pinaka-pasangan kanu nin, ka saben-sabenal su Allah i mapulu a mataw.
Andu di nu mangaluma su mga babay na Mushrikah(bamanakutu) taman sa di silan mag-Islam, andu su ulipen a babay a baginugut,na yapan mapiya sa babay a Mushrikah(bamanakutu) apiya pan manisan, andu di nu mapagkaluma i Mama na Mushrik(bamanakutu) kanu babay nu, taman sa di mag-Islam, ka su ulipen a Mu'min(Mama )na ya pan mapiya sa Mushrik a (Mama),apiya ngin den ikapiya nin, ka silan antu na bangeng-gat sa naraka, andu su Allah i bangeng-gat lu sa surga andu ampun sa kahanda nin, andu ipeb-payag nin i mga ayatan nin kanu mga taw ka andu malamu-lamu sa kanilan i makatadem silan.
Andu ibagidza nilan salka (Muhammad) su babay a hayd, adtalu ka i maledsik- itagak nu su mga babay a ga hayd pan sekanin, na di nu sumumbak silan taman sa di silan masuttie, amayka masutie den silan na sumbak nu silan sa kanu suguwan nu Allah salkanu, saben-sabenal su Allah na kalilinyan nin su taw a bara-tawbat andu bara-suttie.
Su mga kaluma nu na timbang a pamamulanan nu, na angay kanu sa pamulan nu sa andaw i kiyug nu, andu unani nu su ginawa nu sa mapiya, andu ikagilek nu su Allah, andu tuntayi nu i sekanu na mabaratamu nu sekanin, andu panudtol ka kanu mga bamaginugut.
Di nu mamaluya su kad-zapan nu sa Allah sa makasapal salkanu sa kabpiya-piya nu sa taw, atawka kagilek nu sa Allah, atawka kapag-kapiya nu sa pageltan nu mga taw, andu su Allah i pakakineg a mataw.
Di ka nu bun siksan nu Allah kanu dikena tangga a kinad-sapa nu, ugeyd na siksan kanu nin kanu sapa a nakaganat sa pamusungan nu, andu su Allah i bangampun a malimu.
Su mga Mama a mid-zapa sa di nin sumbaken su mga kaluma nilan, na angatan sa pat ulan,na amayka sinumbak nilan bun, na su Allah i bangampun.
Andu amayka naka-unut su pamusungan nin (natagkes) sa kambelag, na saben-sabenal su Allah i pakakineg a mataw.
Andu su mga babay a binelag, na ipagangap nilan i ginawa nilan sa makatelu ma-hayd, andu di mapakayan kanilan i kapagema nilan sa binaluy nu Allah kanu dalem na raahim (magingay) amayka benal a bangimbenal silan sa Allah andu gay a mawli, andu su mga kaluma nilan bun i wagib a makasuli kanilan, amayka aden pan kiyug nilan sa kapagumbaya, andu aden kanilan i kawagib, sa mana bun su kinawagib kanilan sa mapiya,andu aden manem kanu mga mama i bangkatan a mapulu kanu mga babay,andu su Allah i mapulu a mawngangen.
Su kambelag na maka-duwa bu, kamalan su babay sa kasasangan, atawka pambelagen silan sa mapiya, andu di ma-halal salekanu (a mama) i kumwa kanu sa kanu i naka-sunggud nu kanilan apiya paydu, ya tabiya na kagilkan su adtiwalay sa di nilan katindegan su hukuman nu Allah, na dala dusa nu (babay) sa tumendan sekanin kanu maharin (imbalinga nin su Mahar nin) antu ba i dulunan nu Allah, na di nu manibabay, andu su taw a ad-tibaban nin su dulunan nu Allah na silan a mga taw a dupang.
Na amayka binelag nin (su babay) na di ma-halal salkanin a (mama) i sulin nin sa ulyan na nakatelu a (kinambelag), taman sa di makag-kaluma (su babay) sa isa a mama, na amayka binelag nu (mama antu) na dala dusa nilan sa ad-zulya silan (kanu nawna a kaluma nu babay), amayka antapan nilan i katindegan nilan su dulunan nu Allah ipeb-payag nin kanu mga taw, ka andu nilan katawan.
Andu amayka binelag nu su mga kaluma nu- na ipasampay kanilan su (iddah) na suli nu silan sa mapiya,atawka patalus nu i kabelag nu sa mapiya, andu di nu sumuli silan sa kagkaydan silan, sa makad-zasaluman sa Iddah, su anggalbek sa antu ba na dinupang nin su ginawa nin,andu ga-umbal nu su ayatan nu Allah sa gapagangyas, andu tademi nu su limu nu Allah salkanu, andu su initulun nin salkanu a kitab andu Hikmah(kawngangen), ibpangindaw nilan salkanu, andu ikagilek nu su Allah, andu tuntayi nu su ka saben-sabenal su Allah na katawan nin su langun a anggaga-isa.
Andu amayka binelag nu su kaluma nu na nasampay nilan su (Iddah) nilan, na di nu silan sumapali sa kag-kaluma nilan, amayka namagayun silan sa mapiya, antu ba na indawan sa antayn salkanu ibangimbenal sa Allah, andu gay a mauli, na antu ba i suttie salkanu andu maka limpyu salkanu, andu su Allah i mataw andu sekanu na di nu katawan.
Andu su mga Ina- pasusun nilan i mga wata nilan sa duwa lagun a sampurna, sa kanu minyug sa a masampurna i kapa-susu, andu wagib kanu lukes a mama i ridzqiyan nin silan, andu kapam-balegkas kanilan a kanga-sasangan, dala ab-palyugati i isa, ya tabiya na su magaga nin, dili pakapasangan su ina sabap kanu wata,andu di bun pakapasangan su ama sabap kanu wata andu maytu bun ba su mawarith, amayka a myug silan- duwa sa kapanda kanu wata sa pinagayunan nilan, andu pinagumpungan nilan na dala dusa nilan duwa, amayka ya nu kalilinyan i pasusu nu su mga wata nu na (sa kaped) na dala bun dusa nu amayka ineng-gay su ipem-bayad andaw i kasasangan, andu ikagilek nu su Allah, andu tuntayi nu su Allah na gaylay nin i pang-galbaken nu.
Andu su silan antu a minatay salkanu (Mama) na aden natagak nin a mga kaluma- ipagangap nilan i ginawa nilan sa pat ulan andu sapulu gay, na amayka na sampay nilan na dala dusa nilan kanu mga ama nilan (wali\") kanu galbekan nilan sa ginawa (sa agakaluma silan) a nangasasangan (naka-sugat sa Islam), andu su Allah na katawan nin i mga galbekan nu.
Andu dala dusa nu mga mama sa kapanindil nu sa kagkaluma- atawka sya den mun sa ginawa nu sa dalem na Iddah, natawan nu Allah i sekanu a mga mama na katademan nu su silan a mga babay, ugeyd na di nu silan abpasadi sa masulen ya tabiya na kadtalu a mapiya, andu di nu pangaluma silan sa timpu na Iddah, taman sa masampay nu kitab su ajal, andu tuntayi nu su Allah na katawan nin i dalem nu ginawa nu, na ingati nu andu tuntayi nu su Allah na bangampun a malimu.
Dala dusa nu amayka binelag nu su mga babay sa dala nu pan ka dukhuli, atawka dala nu pan makanggay su mah'r(sunggudan), anggay nu silan (kanu tamuk nu), su maluwag i katamanan nin (andaw i magaga) andu su masimpit igatamanan nin (andaw i magaga) intu na kasasangan a wagib kanu mga taw a mga mapya.
Andu upama ka binelag nu silan sa dala nu pan ka Dukhuli-na aden naka sunggud nu kanilan, na sabad bu i makam- balingan salkanu, nya tabiya na dili den kumwua su mga ulipen a babay, atawka di kumwa so mga mama, su dili nu kakwa na antu ba i masiken kanu gilek sa Allah, andu di nu lumimpangi i kag-kakalimwa kanu pageltan nu, su Allah na kailay nin i peng- galbekan nu.
Tuganul nu su mga sambayang, andu su sambayang a nasasangan, andu tindeg kanu sa Allah sa pangani kanu.
Na amayka kagilekan kanu (satru) na lakaw kanu atawka agkuda kanu, amayka nakatana kanu den, na tadami nu su Allah ka pina-katawan nin salkanu su di nu katawan.
Andu atagin su silan antu a namamatay salkanu a aden mga kaluma nin na Ini-wasiyyah nin kanu mga kaluma nin i salagun i dili kalyu a naka-sanggay su uyag-uyag nin andu pegkalabenan nin, amayka linumyu silan na dala dusa nu ama nilan sa galbek nilan sa lawas nilan a nangasa- sangan. Su Allah i mapulu a mataw (nyaba a ayatan napasad na ayat antu a ayatul Meeraath, andu su pat ulan andu sapulu gay)
Andu aden kanu binelag nu (babay) i kalilinyan (gastu)a nasasangan, a wagib a ing-gay nu magilek (sa Allah).
Mamba i kapab-payag nu Allah salkanu sa mga ayatan nin ka andu malamu-lamu salekanu i makapamikir kanu.
Dala nengka katawi (Muhammad) su mga taw a linumyu sa dalpa nilan a ngibwan silan, sabap sa kapeb-palaguy sa kapatay, na pidtalu nu Allah kanilan ibpatay kanu, mawli na inuyag nin silan, su Allah i kigkuwan sa kalbihan kanu mga taw, ugeyd na ya madakel sa mga taw na di silan makad- sukur.
Andu ambunwa kanu sa lalan sa Allah andu tuntayi nu ka saben-sabenal su Allah na pakakineg a mataw.
Antayn I atagin a pa-utangen nin su Allahu Taala sa mapiya na takapen nu Allah salekanin sa madakel a katakep andu su Allah i papeg-kasimpit sa Ridzqi andu papegkakalag, andu lu bun salkanin (Allah) i kauliyan.
Dala nangka katawi (Muhammad) su kanga-unutan kanu tupu na Israel, sa ulyan nu Musa, a pidtalu nilan kanu nabi nilan i pambwati kami sa kaunutan nami sa kambunwa sa lalan sa Allah, tigu nabi nilan tabiya bun ka i-Fardu salkanu i kambunwa na dikanu am-bunwa, pidtalu nilan i dala salkami i dikami am- bunwa sa lalan sa Allah, a pinalyu kami sa dalpa nami andu su mga wata nami, guna i Fardu kanilan su kambunwa na minanda silan, ya tabya na paydu bu kanilan (i mimbunwa), andu su Allah i mataw kanu mga taw a darwaka.
247 Andu pidtalu nu nabi nilan sa kanilan su Allah na pinambwat nin salkanu a kaunutan nu si Talut, ya nilan pidtalu panun ikinandatu nin salkami i sekami i wagib an-datu salkanin, dala tamuk nin a madakel, tigu nabi nilan: pinamili nu Allah salkanu andu nya madakel i ilmu nin andu mabagel i lawas nin, andu su Allahu i menggay saka-datu kanu magkahanda nin, andu su Allah i mawlad i limu nin a mataw.
Andu pidtalu nu nabi nilan- ya tanda na kan-datu (Talut) na itingguman nin salkanu sakeena (sa makatana su ginawa nu), abpun sa kanu kadnan nu, andu su nangadsama kanu mga naganatan nu a kadakel nu Musa andu si Harun,a pananggiten nu Malaa-ikah, nakadalem luba i mga ayat salkanu, amayka benal kanu a mga bamaginugut.
Guna ipeng-ganat ni Talut su mga Tantara(sundalu) nin, pidtalu nin i batalun kanu nu Allah sa katepas sa lawas na ig,na antayn i minum na dikena kuyug salaki, andu su di manem minum kanu ig na silan i kuyug salaki, nya tabiya (a kainum) na semanduk sya sa lima nin ka inumen nin, (madakel a nakainum) ya tabiya dala maka-inum na paydu bu kanilan,na guna nilan matepas su lawas na ig andu su mga minunut salkanin na nya nilan pidtalyu na dala bagel tanu saguna kanu Giaaluut andu su mga tantaru(sundalu) nin, nya nilan pidtalu sa natagu sa ginawa nilan, imbaratamu nilan su Allah, na madakel i lumpukan a paydu i bilangan nin a tinumalaw sa lumpukan na madakel i bilangan nin, andu su Allah na salta kanu mga ma-sabar.
Andu guna nilan makad-sangula su Gialuut andu su mga tagapeda nin na nya pidtalu nu mga bamaginugut, kadenan nami panu kami sa kad-sabar, andu di ka mapakisu i mga palu nami, andu tabangi kami kanu mga taw a mga kafeer.
Tinalaw nu mga bamaginugut su mga kafeer sa kahanda nu Allah andu binunu ni Daud si Gialuut, andu inang- gan nu Allah sekanin sa ka-datu andu Hikmah(kawngangen) andu pinag kataw nin sa kanu nag-kahanda nin a katawan nin, andu dikena bu su pangalaw nu Allah sa mga taw, na su sabad kanilan kanu sabad, na mabinasa su lupa atawka su dalpa ugeyd na su Allah igkuwan sa kalbihan atawa limu kanu taw na dunya.
Antu ba na mga ayatan nu Allahu, pambatyan nami salka (Muhammad) sa bantang, andu seka na kuyug ka kanu mga sinugu.
Su mga sinugu na inilabi nami su sabad kanu sabad, (kina sugu lun)inimbityalay nu Allah, andu inipulu nin i bangkatan nu ped kanilan, andu inenggay nami kani Eisha a wata ni Maryam i (Mamakagayp) sa mga mapayag, andu pimbagelan nami (Eisha) kanu Gibriel, na upeg-kahanda bu nu Allah, na dala silan makam-bubunwa sa ulyan na kinawma nu mga mapayag kanilan, (tigu Allah) ugeyd na mimbida-bida silan, aden kanilan i nangimbenal andu aden mig-kafeer upeg- kahanda bu nu Allah na di silan makam-bubunwa ugeyd na penggulan nu Allah i mag-kahanda nin.
Hee sekanu atagin a mga bamaginugut- imbaranggya nu su ped kanu ipe-ridzqi nami salkanu sa unan a di pakawma su gay a ab-pasay,andu dala kag-kakalimwa, andu dala kad-tatabanga, andu su mga kafeer i mga dupang sa ginawa nilan, andu kaped nilan.
Dala wagib a ped-simban,ya tabiya na su Allah, uyag- uyag a ped-tindeg sa ginawa nin, dala salkanin i tulatud andu katulug, lekanin i dalem nu mga langit andu su lupa,dala maka-safa-at lusa-lekanín a Allah, ya tabiya su sugutan nin, katawan nu Allah su sya sa kasangulan nin andu nata-ligkudan nilan, andu dala katawi nu mga taw su ilmu nu Allah, nya tabiya na su pig-kahanda nin, andu mawlad su kursi nin sa mga langit andu su lupa,andu di kalgenan su Allah sa kaped-tuldu nin (kaped-tyakap nin), andu sekanin i mapulu a masla.
Di itegel su agama, ka napayag kanilan i tidtu, andu su naka-sibay, antayn i supaken nin su taagut (kapangumbal sa banimban atawka panaligan na ginawa a salakaw kanu kadnan) andu mangimbenal sa Allah na nakakapet sa inugut sa (Allah) a malanut a dkana magetas,andu su Allah i paka-kineg a mataw.
Su Allahu Taala i ped-tabang kanu atagin a mga bamaginugut, a palyu nin silan sa kalibutengan, abpawang sa malinawag, andu su mga kafeer na nya ped-tabang kanilan i mga shaitan a pab-pelyun silan sa malinawag abpawang sa malibuteng, silan a mga taw igkuwan sa apuy a silan na dayun-dayun kanu apuy.
Dala nengka katawi (Muhammad) su mib-palawa kani nabi Ibrahim kanu kadnan nin, inenggan nu Allah sa ka datu (Namrud) nya pidtalu ni Ibrahim na su kadnan ko na pangimatay andu banguyag, nya kadtalu ni (Namrud) saki na banguyag aku bun a bangimatay, ya tigu Ibrahim su Allah a kadnan ku na paped-sebangen nin su senang sa kanu sebangan, na upama ka kadnan ka na sya ka pasebang sa sadepan, dala makad-talu, sa tinaban su kafeer, andu su Allah na di nin tutulun su mga kafeer.
Atawka mana si (uzair) a nasagadan nin i dalpa a nagubal a dala taw nin a naka-lundub, nya nin pidtalu- na panun i ka-uyag nu Allah sa nya a dalpa sa ulyan na kinapatay nilan?! Inimatayan nu Allah sekanin sa naka magatus lagun, mawli na pinambwat nu Allah andu inid-san nin u ngin i kinawget nengka, nya nin nadtalu na naka sagay atawka seged bu sa gay, tigu Allah naka magatus lagun, ilayka su pagken nengka andu su paginumen nengka ka dala bun napalinan nin, andu ilayka su pegkudan nengka a Himar, andu binaluy nami seka tanda sa kanu mga taw, andu ilayka su tulan nu mga himar nengka u panon i kapapa-magulita nami lun, mawli na bawsan nami sa sapu, guna mapayag salkanin na yanin pidtalu-katawan ku den su Allah kanu langun anggaga-isa na kagaga nin.
Andu labit ka (Muhammad) su kinadtalu ni Ibrahim sa kadnan ku ipailay nengka salaki u panun i kabpaguyag nengka sa namamatay, nya kadtalu nu Allah dika basen bangim-benal? tigu Ibrahim bangimbenal aku, ugeyd na andu pedtakena su pamusungan ku, tigu Allah, kwa ka sa pat-timan a papanuk sa ted-tad ka a pad-sisimbul ka,mawli na ibetad nengka lusa palaw sa pat lumpuk, mawli na tawag ka silan, ka mangagan i kawma nilan saleka sa nakaulit(abpagayas-ayas) i mga palas nilan, tuntayi ka su Allah i mapulu a mawngangen.
Inupaman su silan antu atagin a mga taw a pembaranggyan nilan i mga tamuk nilan sa lalan sa Allah na mana satiman na lagas a minatu sa pitu ugkay, uman ni isa ka ugkay na magatus manem i unud nin, andu su Allah na takapen nin pan su mag-kahanda nin, andu su Allah na mawlad i limu nin a mataw sa ika-limu nin.
Silan antu a mga taw atagin a pam-baranggyan nilan i mga tamuk nilan sa lalan sa Allah, na di nilan tundugen su nambaranggya nilan sa kapangaluy andu makaya (kapamanula, pamalabiten) kanilan i balas lusa kadnan nilan,andu dala gilek nilan, andu dala kanilan i kalidu na ginawa nilan.
Su kadtalu a mananaw andu makapiya sa ginawa nu bangeni na- yapan mapiya kanu sadaqah a pinangaluy, andu su Allah i kawasa a malasam.
Hee Sekanu atagin a mga bamaginugut, di nu pembinasa su mga sadaqah nu sa kapangaluy andu su makaya, ka su taw a pembaranggyan nin i tamuk nin sa mata nu taw bu,na di bun bangimbenal sa Allah andu sa gay a mawli, na yanin pagidsan na lakungan a aden libubuk nin,guna masugat na ulan na dala nasama kano libubuk, natagak nin i mategas a matilak, dala magaga nilan abpun kanu ping-galbek nilan, andu su Allah na di nin tutulun su mga kafeer.
Andu nya upaman nu mga taw pem-baranggyan nilan i mga tamuk nilan sa tuntut nilan sa kasuwat nu Allah, andu ipembaagel nilan sa ginawa nilan, na mana su pamulan sa bukulud a nasugat na ulan, na natakep su unga nin,upama ka di manem gasugat na ulan na andang-a aden bun unga nin, andu su Allah na kanu peng-galbeken nu na gaylay nin.
Ngintu ya kiyug nu isa salkanu na aden pamulan nin a kayu kulma andu inab (anggul) pelagilay sa kababanin i mga lawas a ig, aden ambalangan na unga nin, ngin pan ka migkatuwa,na aden mga wata nin a malubay, na nasugat na lipules su pamulan nin a aden apuy nin na nangatutung, mamba i kapeb-payag nu Allah salkanu sa kanu mga ayatan nin ka malmu-lemu salkanu i kapamikir nu.
Hee sekanu atagin a bamaginugut em-baranggya kanu abpun kanu mga mapya a napantiyali nu, andu su pabpagetun nami salkanu san sa lupa,andu di nu mangalam (mamili) su mawag santu ba i em-baranggyan nu, andu di nu bun kiyugan kumwa (amayka inggay salakanu),ya tabya na di nu den maylay, andu tuntayi nu su Allah na kawasa a peb-pugin.
Su shaitan na panging-gilken kanu nin sa kadadtel(kag- kamiskin) andu pedsugun kanu nin sa maledsik,na su Allah na pebpasadan kanu nin sa ampun andu kalbihan, andu su Allah na mawlad i limu nin a mataw.
Inggay nin su ungangen kanu mag-kahanda nin, su naka-kwa sa ungangen, na nakakwa sa mapya a madakel, andu dala ma-indaw nya tabiya na su mga aden akal nin.
Andu apiya ngini inim-baranggya nu, ataw ka samaya nu (kad-zamaaya) na saben-sabenal su Allah na katawan nin, andu dala kano mga kafeer i makad-tabang kanilan.
Amayka ipayag nu su kad-sadaqah nu na mapya bun andu amayka ipagena (masulen), andu ilunu den kanu mga Faqeer na labi den i kapiya nin salkanu, andu ipeb-punas salkanu kanu mga dusa nu, andu su Allah na su nganin a panggalabaken nu na katawan nin.
Dala salka (Muhammad) i katutulu kanilan, ugeyd na su Allah iped-tutulu sa kag-kahanda nin, andu su inim- baranggya nu a mapya, na kana ginawa nu bun,andu dala imbaranggya nu nya tabya na panunuwat nu kano pamenengan no allah ( giginaway nin) , andu su pembarangyan nu a mapya na makwa nu bun i balas nin, andu dika nu mad-talimbut.
Inggay kanu mga Faqeer a mangalubay a di den pakamung silan sa kambunwa sa lalan sa Allah, di silan pakagaga palalakaw kanu lupa sa kadzukat (kapamantyali), bangantapen silan u di mataw kanilan i mga kawasa silan sabap sa katigkel, na makilala nengka silan kanu tanda nilan a di silan mamangeni sa mga taw sa tagel (mamages) atawka dikena tagel, andu su ipem-baranggya nu a mapya, na saben-sabenal su Allah na katawan nin.
Atagin su mga taw a pem-baranggya sa mga tamuk nilan sa magabi andu malemag-mapayag andu masulen, na kanilan ibalas nilan kanu kadnan nilan, andu dala gilek nilan andu dala kanilan i malidu i ginawa nilan.
Atagin u mga taw manem a pegkan sa Riba (iseg) di silan makatindeg sa Qubur, nya tabiya na mana su katindeg nu buneg sa pakayda shaitan, kagina nya nilan pidtalun na pagidzan na Riba su kabpasay (kandagang), andu ini-halal nu Allah su kabpasay andu ini-haram i Riba, su taw a nawma na indawan abpun kanu kadnan nin na minenda, (tinagak nin su kapaiseg sa tamuk)lekanin su nawna(dili siksan) andu su Allah i mataw lun, su midzaluman bun na silan igkuwan kanu apuy sa dayun silan sa siksa.
Iyawa nu Allah i ka-barakat nu Riba, yanin pambarakaten i mga sadaqah,andu su Allah na di nin kiyugan i langun a kafeer ka bara-dusa.
Atagin su mga bamaginugut a ming-galbek sa mga mapiya, andu initunay nilan i sambayang andu zakat,kanilan i balas nilan lu sa kadnan nilan, andu dala kanilan i malidu i ginawa nilan.
Hee sekanu atagion a mga bamaginugut ikagilek nu su Allah, andu itagak nu den su nad-zama a Riba, amayka sekanu a bamaginugut kanu.
Amayka di nu anggulan i panduwan nu Allah, na tuntayi nu su kabunu (sa pabpagiseg) na abpun kanu Allah andu su sinugu nin, andu amayka midtawbat kanu, na su puna nu tamuk nu (ina nu tamuk) i kwa nu, dika nu makad-talimbut,andu dika nu mambu madtalimbut.
280 Nando amayka kalgenan pan so minotang, na angapani kalowagin, o iped-sadaqah no menem (dino den kuan) na labi i kapiya nin salkano, umanabo ka katawano.
Andu i-kagilek nu su gay a kawli nu sa Allah, mawli na makwa nyu uman-isa su lalaw(padsa) nu galbek nin, andu silan na dili mad- talimbut silan.
Hee sekanu atagin a mga bamaginugut, amayka minggu- bayadan kanu sa bayadan sa taman a ukul a kam-bayada, na i sulat nu andu, nya sumulat lun salkanu na su bantang, andu di maka-enda (makabpalaw) su ped-sulat sa kasulat nin, sa mana su pina katawan nu Allah salkanin a isulat nin,andu nya manem adtalu kanu iped-sulat na su minutang, andu ikagilek nu su Allah a kadnan nin, andu di nin kulangan apiya paydu, na amayka su aden kawagib salkanin (su minutang) ka di mataw (sumulat),atawka malubay atawka ka di makagaga sekanin muntul, na nya manem adtalu na su walie (sinaligan nin) sa bantang andu padsaksi kanu sa duwa kataw salkanu a mama, amayka dala duwa kataw a mama,na sakataw a mama andu duwa kataw a babay kanu gasuwatan nu a makad-saksi, upama ka kalimpangan nu isa kanilan duwa, na katademan nu isa kanilan duwa, andu di maka-enda su mga saksi amayka tinawag silan, na anda kanu ed-zemu (abpok)sa kasulat sa manot matiwalu kanu ajal nin (lumpakan nin), ka antu ba i kabantang sa Allah andu matidtu akad-saksi, andu masupeg a di nu kanduwa-duwa, nya tabiya na-amayka kapandagang a sagugunay, a papagisagen nu (baguntung) kanu mga pageltan nu ka dala dusa nu amayka dinu den maka- sulat, andu pad-saksi kanu amayka mibpasay kanu, andu di binasan nu sinumulat andu su mid-saksi, ka amayka anggulan nu (binasan) intuba, na antu ba i kalyu nu sa inugut sa kadnan nu, andu ikagilek nu su Allah, andu pamandun kanu nu Allah andu katawan nu Allah su langun nu anggaga-isa.
Andu amayka sya kanu natabu sa lakawan sa dala katawan nu a padsulat na sanda a kakamalan (sa dala iseg nin), amayka nakatana den su sabad kanu sabad na itunay nin su salig salkanin, andu ikagilek nin su Allah a kadnan nin na di nu magema su kadsaksi, ka su taw a ipagema nin na mindusa su pamusungan nin,andu katawan nu Allah i langun a peng-galbeken nu.
Kanu Allah su dalem nu mga langit andu lupa, andu magidsan i ipayag nu su dalem nu ginawa nu- atawka isulen nu, na kukumen bun nu Allah, ampunen nin su mag- kahanda nin, andu siksan nin su mag-kahanda nin, su Allah kanu langun a anggaga-isa na kagaga nin.
Nangimbenal su sinugu (Muhammad) kanu initulun salkanin abpun kanu kadnan nin, andu su mga bamaginugut, uman isa na nangimbenal sa Allah andu su Malaa- ikah andu su kitab nin, andu su mga sinugu nin, di nami pambibidayan i isa kanu mga sinugu nu Allah, andu pidtalu nilan i nakineg nami andu naginugut kami, ampun kami kadnan nami, andu sambun salekai kadzunudan.
Dala ib-palyugat nu Allah sa isa, nya tabiya na magaga nin lekanin i malat-mapiya a napantiyali nin sya sa dunya, kadnan nami di kami sumiksa kanu nalimpangan nam,i, atawka nalipatanan nami, kadnan nami dika mapapa-nanggit salkami i mapasang, mana su inipa-pananggit negka kanu nangawna salkami, kadnan nami di kami lamulani sa di nami magaga andu lasam kami andu ampun kami, andu i kalimu kami nengka ka seka iped-tuldu salkami, tabangi kami kanu mga taw a mga kafeer.
