Nditsuba khubamalaika bakhunyulanga (emioyo cha bakhayi) nende amaani.
Nende balia barusinjia (emioyo chiabasuubili) kaala.
Nende balia bakulukhanga mwikulu bukulukha.
Nende balia bashilananga tsimbilo (nende emioyo chiabasuubili okhuyila mwikulu).
Nende balia bachesinjia amakhuwa (emioyo emibii nichinyoola eshinyasio, ne emilayi nichisangaasibwa).
Inyanga yolwika lulifurwamwo lweyimbeli (lulirenjia buli eshindu).
Ne olwika lundi lulilondakhwo.
Inyanga eyo emioyo chilirengarenga khuburi.
Tsimoni tsiachio tsilikhookha (tsilihenga hasi).
(Abakhayi) baboolanga mbu: “Khulikalusibwa toto shinga khwali (khulilamusibwa)?
Olwakhuliba ebikumba biabulungukha?”
Baboola mbu: “Okhukalusibwa okho khulibulamwo obukhala (khwifwe)!”
Kho toto okhulamusibwa okho ni oluyoka lulala lwonyene.
Hawo na hawo buli eshiloonje shiliba mushikuri eshiya.
Koo! Lwakhuulilakhwo olukano lwa Musa?
Olwa Nyasaye wuwe Omulesi yamulanjila mulitwoma lioluyali lia T’uwaa.
“Tsia ewa Firauni. Toto ye yaburirira.
Omuboolele mbu: 'Koo, chama obe Omutswenufu?
Ekhwimilile khu Nyasaye wo Omulesi onyoole okhumuria.'”
Mana namwechesia ebimanyisio ebikhongo muno.
Ne nakatsula mana nakhaila elala.
Khandi nakalukha inyuma, nakhola eshinani (okhukania Abandu balafuchilila Musa tawe).
Nakhung’asia Abandu nalaanga.
Naboola mbu: “Nesie nyasaye wenyu omulesi ohuli hekulu muno.”
Kho Nyasaye namutila namuhelesia eshinyasio khukayaboola kokhumalilikha (‘nesie Nyasaye wenyu omukhongo’), nende kayaranjilila (‘abulaho Nyasaye wundi owulali esie’).
Toto esho neshimanyisio khubalia baria Nyasaye.
Koo! Nobutinyu okhubaloonga enywe nohomba likulu? Ye niye waliumbakha!
Yalichingula hekulu, nalikasia obulayi muno.
Ne nara eshilima mushilo shiayio, ne nayiniamwo eshitere.
Okhurula awo nakwalasia liloba.
Narusiamwo amatsi kalio nende emimela.
Ne efikulu nafitinyia mwiloba.
Bibe biokhwisangasia bwenyu nende ebiayo bienyu.
Olwamatinyu amakhongo kaliula,
Inyanga eyo omundu aliitsulila kayakhola.
Ne Jahannamu ililolesibwa yalolekha khu ulola.
Kho ulia waburirira mubufuru.
Mana nachama muno obulamu bweshialo.
Toto Jahannamu ni habundu wuwe wokhumenya!
Ne ulia waria okhwema imbeli wa Nyasaye wuwe Omulesi, mana nakaania omwoyo kukwe eshihonya.
Toto oyo Omukunda kwomwikulu nikuliba habundu wuwe wokhumenya!
Bakhurebanga ebise bieyindukho biliba lina?
Ne shiomanyile shiosishiosi khubio khobabolere tawe.
Obumalilishi bweyinyanga eyo buli khu Nyasaye wuwo Omulesi.
Toto ewe oli butswa Omwikanyilisi khu ulia owaria inyanga eyo.
Olwa baliyilola inyanga eyo, balikaala mbu shibaamenyakhwo (khushialo) tawe halali ingolobe ndala nohomba eshitere shiayo.
