1. Pushapa Ako sa Ibut ko ungkai a Ingud (a Makkah),-
2. A Suka na Mababaling sangkai a Ingud,-
3. Go so Mimbawata a go so Inimbawata,
4. Ka Sabunsabunar a Inadun Ami so Manosiya si-i ko karomasayan:
5. Ba niyan tatarima-a sa da dun a phakapa-aron a isa bo?
6. Gi-i niyan Tharo-on: A miyakailang ako sa tamok a madakul!
7. Ba niyan tatarima-a sa da-a miyakailai ron a isa bo?
8. Ba Ami da sunggai sukaniyan sa dowa mata?
9. Go dila go mbala a modol?
10. Go Pinggonanao ami sukaniyan ko dowa a lalan?
11. Na ino niyan da Panagontamani so mapigul,-
12. Na antawa-a i miyakandao Ruka o antona-a so mapigul?-
13. So Kapumaradika sa Oripun,
14. O di na so kapakakana si-i ko Alongan a kaor,
15. Ko Wata a ilo a madasug,
16. O di na so Miskin a Midudukut ko botha;
17. Oriyan niyan na miyabaloi a pud ko siran a Miyamaratiyaya, a go iniphipi-isa iran so Kaphantang, go iniphipi-isa iran so Kapangalimo.
18. Na siran man i manga tao ko kawanan.
19. Na so siran a Miyamangongkir ko manga Ayat Ami, na siran i manga tao ko diyowang;
20. A kakokoloban siran sa Apoi.
